ការធ្វើទស្សនកិច្ចរបស់លោកវ៉្លាឌីមៀរ ពូទីន ទៅកាន់ប្រទេសជប៉ុននោះ ត្រូវបានលើកពេលដោយគ្មានកំណត់ នោះក៏ដោយសារតែមានការខឹងសម្បាដោយក្រុងតូក្យូ ចំពោះក្រុងមូស្គូ ដែលកាន់កាប់ទឹកដីមានជម្លោះអស់រយៈពេលមួយដ៏យូរមកហើយ ព្រមទាំងមានបញ្ហាដែលរុស្ស៊ី ជាប់ពាក់ព័ន្ធនៅក្នុងជម្លោះសីុរី ថែមទៀតផង។
តាមការគ្រោងទុក ប្រធានាធិបតីរុស្សី នឹងត្រូវធ្វើទស្សនកិច្ចមកកាន់ក្រុងតូក្យូ នៅដំណាច់ឆ្នាំនេះ ដើម្បីបើកកិច្ចពិភាក្សាជាមួយនាយករដ្ឋមន្ដ្រីជប៉ុន លោកសីុនហ្សូ អាបេ ស្ដីអំពីទឹកដីនៅភាគខាងជើងនោះ គឺក្រុមកោះចំនួន៤ដែលដណ្ដើមកាន់កាប់ពីប្រទេសជប៉ុន ដោយអតីតសហភាពសូវៀត តាំងតែពីសង្គ្រាមលោកលើកទីពីរបានបញ្ចប់ទៅ។
ជម្លោះដីកោះនោះហើយដែលបានធ្វើឲ្យប្រទេសទាំងពីរនេះខកខានមិនបានចុះហត្ថលេខាលើសន្ធិសញ្ញាសន្ដិភាពក្រោយសង្គ្រាមនោះ ហើយទំនាក់ទំនងប្រែក្លាយទៅជាស្រអាប់រវាងរដ្ឋាភិបាលបន្ដបន្ទាប់មកទៀតនោះ។
ជប៉ុន បានចោទប្រកាន់រុស្ស៊ីថា ធ្វើមិនឲ្យបានសម្រេចទាក់ទិនទៅនឹងបញ្ហាដីកោះដែលត្រូវបានគេស្គាល់ថា ជាប្រជុំកោះ Kurils ដែលបច្ចុប្បន្ននៅក្នុងទឹកដីរបស់រុស្ស៊ីនោះតាមរយៈការធ្វើទស្សនកិច្ចកាលពីពេលថ្មីៗនេះ ដោយមន្ដ្រីនយោបាយជាន់ខ្ពស់ ក្នុងនោះមានទាំងនាយករដ្ឋមន្ដ្រីរុស្ស៊ី លោកឌីមីទ្រី ម៉េដវីដេវ ផងដែរ។ ក្រុមមន្ដ្រីជប៉ុន បាននិយាយថា គេកំពុងតែបារម្ភអំពីករណីដែលរុស្ស៊ី លូកលាន់ចូលទៅក្នុងរឿងប្រទេសរុស្ស៊ី ដែលនៅក្នុងប្រទេសនោះរុស្ស៊ី បានទម្លាក់គ្រាប់បែកទៅលើក្រុមឧទ្ទាមដែលប្រឆាំងនឹងប្រធានាធិបតីស៊ីរី លោកបាសា អាល់ អាសាដ ដូចដែលក្រុងមូស្គូ បានប្រកាសអះអាងក៏ដូចជាការទម្លាក់គ្រាប់បែកនោះទៅលើទីតាំងឈរជើងដោយក្រុមរដ្ឋឥស្លាមនោះផងដែរ។
កាសែត Kyodo News បានកត់ត្រាប្រភពនានាដោយមិនបញ្ចេញឈ្មោះរបស់រដ្ឋាភិបាលជប៉ុន ដោយនិយាយថា ដំណើរទស្សនកិច្ចរបស់លោកពូទីន មកកាន់ប្រទេសជប៉ុននោះ ពិបាកនឹងកំណត់ឲ្យបានច្បាស់លាស់ណាស់រហូតដល់ដំណាច់ឆ្នាំនេះ ដោយបន្ថែមថា ការវាយប្រហារតាមផ្លូវអាកាសរបស់រុស្ស៊ី នៅក្នុងប្រទេសស៊ីរី គឺជារឿងដែលពិបាកនឹងសម្របសម្រួល។ លោកពូទីន មិនមានឈ្មោះនៅក្នុងបញ្ជីថ្នាក់ដឹកនាំ G7 ដែលនឹងចូលរួមជំនួបប្រជុំកំពូលនៅប្រទេសជប៉ុន នាឆ្នាំក្រោយនោះទេ បន្ទាប់ពីប្រទេសរុស្ស៊ី រងការកម្ចាត់ចេញពីក្រុមប្រទេសទាំងនោះ ដោយសារតែរុស្ស៊ី បានដាក់តំបន់ Crimea ឲ្យក្លាយទៅជាឧបសម្ព័ន្ធកាលពីឆ្នាំទៅមិញ៕
The Guardian
ទស្សនកិច្ចរបស់លោកវ៉្លាឌីមៀរ ពូទីន ទៅកាន់ប្រទេសជប៉ុន លើកពេលគ្មានកំណត់
0 Comments