ភ្នំពេញ ៖ រដ្ឋសភាកម្ពុជា ក្រោមការដឹកនាំកិច្ចប្រជុំដោយសម្ដេចពញ្ញាចក្រី ហេង សំរិន ប្រធានរដ្ឋសភានៅព្រឹកថ្ងៃទី៣០វិច្ឆិកានេះ បានប្រជុំអនុម័តច្បាប់ថវិកាឆ្នាំ២០១៦ ជាឯកច្ឆន្ទដោយគាំទ្រ៦៦សំឡេងលើ៦៦ នៃសមាជិកសភាចូលរួម ដើម្បីបើកផ្លូវឲ្យរាជរដ្ឋាភិបាលប្រើប្រាស់ថវិកាជាតិឆ្នាំ ២០១៦ ទាំងចំណូល និងចំណាយ ជាប្រយោជន៍សម្រាប់ការអភិវឌ្ឍប្រទេសជាតិឲ្យមានការរីកចម្រើន។
សេចក្ដីព្រាងច្បាប់នេះ គ្រោងចំណាយប្រមាណ១៧.៤៦២.៤៧៧លានរៀល ឬស្មើនឹងជាង ៤.២០០លានដុល្លារ។ គឺកំណើនចំណាយជាង១៦ភាគរយ ធៀបនឹងច្បាប់ថវិកាជាតិឆ្នាំ២០១៥ ដែលស្មើនឹងជាង២១ភាគរយ នៃផលិតផលសរុបក្នុងស្រុក។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ រៀបចំឡើងនៅក្នុងបរិការណ៍ដែលកម្ពុជាកំពុងទទួលបានពីសន្តិភាព ឯកភាពទឹកដី ឯកភាពជាតិ ស្ថិរភាពនយោបាយ និងការអភិវឌ្ឍ។
លោកបញ្ជាក់ថា ច្បាប់ថវិកា២០១៦ ត្រូវបានរៀបចំគិតគូរក្នុងទិសដៅកែទម្រង់ជាក់លាក់ ដើម្បីធានាចលនាកំណែទម្រង់ ព្រមទាំងតម្រង់ និងតម្រឹមគោលដៅ នៃកំណែទម្រង់ស្របតាមគោលបំណងប្រាថ្នារបស់ប្រជាជនកម្ពុជា ក៏ដូចជាសម្រេចឲ្យនូវគោលដៅជាយុទ្ធសាស្ត្រចតុកោណដំណាក់កាលទី៣ ដើម្បីកំណើនការងារ សមធម៌ និងប្រសិទ្ធភាពនៅកម្ពុជា។
ច្បាប់ថវិកា២០១៦នេះ បានផ្ដោតយកចិត្តទុកដាក់ខ្លាំងលើវិស័យសង្គមកិច្ច ,ការបណ្ដុះបណ្ដាលធនធានមនុស្ស ,ការបន្តវិនិយោគលើវិស័យរចនាសម្ព័ន្ធរូបវន្ត, ការអភិវឌ្ឍវិស័យកសិកម្ម, ពង្រឹងវិស័យអភិបាលកិច្ច និងដំឡើងប្រាក់បៀវត្សចូលមន្ត្រីមន្ត្រីរាជការគ្រប់កម្រិត ចាប់ពីខែមករា ឆ្នាំ២០១៦ផងដែរ។
លោកបណ្ឌិតរដ្ឋ ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម រដ្ឋសភាបានមានប្រសាសន៍ថា សេចក្ដីព្រាងច្បាប់ ស្ដីពីការគ្រប់គ្រងថវិកាឆ្នាំ២០១៦នេះ នឹងបើកផ្លូវឲ្យរាជរដ្ឋាភិបាលអាចចំណាយថវិកាជាតិស្របតាមច្បាប់សម្រាប់អភិវឌ្ឍន៍ប្រទេសជាតិឲ្យមានការរីកចម្រើនទៅតាមវិស័យចាំបាច់នីមួយៗ។
លោកបន្តថា គម្រោងចំណាយថវិកាឆ្នាំ២០១៦នេះ អាចប្រសិទ្ធិនាមបានថា ថវិកា នៃការប្រមូលផ្ដុំនូវកម្លាំងធនធានមនុស្ស សំដៅសម្រេចបាននូវសមិទ្ធផលសំខាន់ៗបន្ថែមទៀតដើម្បីធានាបាននូវដំណើរផ្លាស់ប្ដូរឆ្ពោះទៅរកការអភិវឌ្ឍប្រកបដោយគុណភាព និងចីរភាពដោយផ្សារភ្ជាប់ការគិតគូរតុល្យភាព នៃកំណើនសេដ្ឋកិច្ចកម្ពុជា និងនៅលើពិភពលោក។
សេចក្ដីព្រាងច្បាប់ ស្ដីពីហិរញ្ញវត្ថុ ឆ្នាំ២០១៦នេះ បានទម្លាក់ថវិកាជាតិច្រើនទៅលើវិស័យសង្គមកិច្ច ដែលមានរហូតទៅដល់១.០៥០លានដុល្លារ ខណៈវិស័យការពារជាតិ សន្តិសុខ និងសណ្ដាប់ធ្នាប់សាធារណៈ បានឈរលេខរៀងទី២ ក្នុងទឹកប្រាក់ចំនួន៦៥០លានដុល្លារ រីឯវិស័យអប់រំ បានឈរលេខ៣ ដែលបានទទួលថវិកាជាតិចំនួន៤៩៧លានដុល្លារ។
សេចក្ដីព្រាងច្បាប់នេះ ក៏គ្រោងចំណាយលើវិស័យសុខាភិបាលចំនួន២៧២លានដុល្លារ លើវិស័យកសិកម្មចំនួន៤៦លានដុល្លារ និងគ្រោងចំណាយលើវិស័យអភិវឌ្ឍន៍ជនបទប្រមាណជា៣៦លានដុល្លារប៉ុណ្ណោះ៕
រដ្ឋសភា អនុម័តច្បាប់ថវិកាឆ្នាំ២០១៦ ដោយសំឡេងគាំទ្រ៦៦សំឡេង លើ៦៦
0 Comments