ភ្នំពេញ ៖ គណបក្សអំណាចខ្មែរ នឹងចំណាយប្រាក់ប្រមាណ១៨ ម៉ឺនដុល្លារ ដើម្បីសាងសង់ផ្ទះជូនប្រជាពលរដ្ឋចំនួន១០០ គ្រួសារតាមព្រំដែនកម្ពុជា-វៀតណាម ដើម្បីពង្រឹងការរស់នៅរបស់ពលរដ្ឋខ្មែរនៅតំបន់ព្រំដែន ហើយប្រតិបត្តិការនេះនឹងចាប់ផ្តើមនៅពេលឆាប់ខាងមុខ នេះបើតាមការបញ្ជាក់ពីមន្ត្រីជាន់ខ្ពស់គណបក្ស។
តាមប្រភពព័ត៌មានបានឲ្យដឹងថា គណបក្សអំណាចខ្មែរនឹងសាងសង់ផ្ទះជូនប្រជាពលរដ្ឋនៅតាមព្រំដែន ដែលមានគំរូ និងទំហំដូចគ្នាទាំងអស់ គឺមាន ទំហំ៥ម៉ែត្រ គុណ ៧ម៉ែត្រ ដែលដំបូលប្រក់ហ្វីប្រូ ហើយជញ្ជាំង បិទស័ង្កសី ចំណែកឯរនាបធ្វើពីឈើ ហើយដែលផ្ទះមួយខ្នងៗមានតម្លៃ១៨០០ ដុល្លារ។ បើតាមគម្រោង នឹងចាប់ផ្តើមសាងសង់ធ្នូ ឆ្នាំ២០១៥ ហើយជំហានដំបូង គឺគ្រោងសង់ផ្ទះជូនពលរដ្ឋតាមព្រំដែនត្រឹម១០០ គ្រួសារសិន ហើយនឹងអាចបន្តសាងសង់បន្ថែមទៀត បើប្រជាពលរដ្ឋនៅតែខ្វះខាត។
ទាក់ទងប្រភពខាងលើនេះ លោក សួនសេរីរដ្ឋា បានថ្លែងប្រាប់កម្ពុជាថ្មី កាលពីថ្ងៃទី៣០ ខែវិច្ឆិកា ឆ្នាំ២០១៥ ថា ព័ត៌មាននោះជាការពិត ហើយយើងជឿថា អាជ្ញាធរ នឹងមិនរារាំងទេ បើអាជ្ញាធរមិនរារាំងនោះ មានន័យថា ជាអាជ្ញាធរខ្មែរចង់ការពារទឹកដីខ្មែរ និងចង់ឲ្យពលរដ្ឋខ្មែរ នៅតំបន់ជាយដែនមានផ្ទះសម្រាប់រស់នៅ ដើម្បីសហការជាមួយនឹងខ្លួន ការពារព្រំដែន និងការពារទឹកដី។ លោកបញ្ជាក់ថា នេះជាសេវាមួយផ្នែក ដែលគណបក្សអំណាចខ្មែរ យើងគិតថា យើងអាចធ្វើបាន ដើម្បីជួយពង្រឹងស្មារតីពលរដ្ឋខ្មែរនៅជាយដែនឲ្យមានភាពកក់ក្តៅ កុំឲ្យពួកគាត់រងាឯកោ។
ពិសេសគណបក្សអំណាចខ្មែរ យើងធ្វើនយោបាយ មិនមែនអង្គុយចាំតែចាប់កំហុស ហើយមិនធ្វើអ្វីសោះ ក្នុងពេលដែលយើងអាចរួមចំណែកធ្វើបាននោះទេ។
តាមលោក សួន សេរីរដ្ឋា បានបញ្ជាក់ថា “ចំនួនតាមគំរោងដំបូងគឺនឹងសង់ចំនួន១០០ ផ្ទះជូនគ្រួសារពលរដ្ឋខ្មែរណា ដែលគ្មានផ្ទះមានតែដី និងមានតែកូនខ្ទមប្រក់ស្លឹកតូចៗ។ តែយើងនឹងពិនិត្យល្អិតល្អន់ពីប្រវត្តិគ្រួសារ ជីវភាពគ្រួសារ និងពិសេសជំហរជាគ្រួសារពលរដ្ឋខ្មែរ ដែលសុខចិត្តតស៊ូរស់នៅតំបន់ជាយដែនដើម្បីជួយឃ្លាំមើលការរំលោភព្រំដែន និងដើម្បីជួយការពារព្រំដែនខ្មែរ។
ផ្ទះមួយខ្នងដែលសង់ពី គ្រោងឆ្អឹងដែក ដំបូលហ្វីប្រូស៊ីម៉ង់ ទ្វាបង្អួចធ្វើពីឈើ និងបាតចាក់ក្រាលបេតុង គ្រោងចំណាយថ្លៃទិញសម្ភារៈអស់១៨០០ ដុល្លា ហើយកម្លាំងសាងសង់ និងក្រុមជាង គឺជាក្រុមស្ម័គ្រចិត្ត ក្រុមយុវជនបៃតង នៃគណបក្សអំណាចខ្មែរ។ ថវិកាសាងសង់ ជាជំនួយពីសមាជិកអ្នកគាំទ្រ ចលនាអំណាចពលរដ្ឋខ្មែរ នៅក្រៅប្រទេស ដូចជាអាមេរិក កាណាដា អឺរ៉ុប អូស្ត្រាលី ញូហ្សឺឡែន និងពីពលករខ្មែរនៅប្រទេសសៀម”។
លោក សួន សេរីរដ្ឋា បានអះអាងថា មូលហេតុដែលគណបក្សអំណាចខ្មែរ សម្រេចចិត្តសាងសង់ផ្ទះជូនពលរដ្ឋខ្មែរ គ្រួសារក្រីក្រនៅព្រំដែន គឺដើម្បីពង្រឹងការរស់នៅរបស់ពលរដ្ឋខ្មែរ នៅតំបន់ព្រំដែន កុំឲ្យរត់ចូលដីកេរដូនតា ឬលក់ ជួលដីស្រែចម្ការឲ្យវៀតណាម ព្រោះតែខ្វះការយកចិត្តទុកពីសំណាក់អាជ្ញាធរ និងរដ្ឋាភិបាល។ មួយវិញទៀត គឺដើម្បីឲ្យតំបន់ព្រំដែនខ្មែរ គឺរក្សាបាននូវពលរដ្ឋខ្មែររស់នៅឲ្យបានកាន់តែច្រើន កុំឲ្យមានភាពភ័យខ្លាចរត់ចោលដីស្រែ ដីចម្ការខ្លួនឯង។
ទាក់ទងបញ្ហានេះ កម្ពុជាថ្មីនៅមិនទាន់អាចសុំការបំភ្លឺពីមន្ត្រីអ្នកនាំពាក្យក្រសួងមហាផ្ទៃបានទេ កាលពីរសៀលថ្ងៃទី៣០ ខែវិច្ឆិកា ឆ្នាំ២០១៥ ដោយទូរស័ព្ទមិនមានអ្នកទទួល ប៉ុន្តែបញ្ហាព្រំដែនកម្ពុជា-វៀតណាមបានក្លាយជាចំណុចក្តៅមួយសម្រាប់អ្នកនយោបាយនៅកម្ពុជា ជាពិសេសគណបក្សប្រឆាំង តែងតែលើកយកបញ្ហានេះ ធ្វើជាគោលដៅសំខាន់ក្នុងការវាយប្រហារលើគណបក្សកាន់អំណាច៕
គណបក្សអំណាចខ្មែរគ្រោងចំណាយថវិកាជិត២០ម៉ឺនដុល្លារដើម្បីសាងសង់ផ្ទះជូនពលរដ្ឋនៅតាមព្រំដែន
0 Comments