ភ្នំពេញ ៖ ប៉ូលិសខណ្ឌសែនសុខបាននិយាយថា ករណីចាប់ខ្លួនមនុស្សចំនួន៣២នាក់នៅក្នុងប្រតិបត្តិការបង្ក្រាបគ្រឿងញៀនទ្រង់ទ្រាយធំ ដឹកនាំដោយ លោកស្នងការរងឈ្មោះប៊ន សំអាត និងលោកម៉ក់ ហុង អធិការ នគរបាលខណ្ឌសែនសុខ សហការជាមួយមន្ត្រីតុលាការម្នាក់ឈ្មោះកែវ សុជាតិ ព្រះរាជអាជ្ញារងតុលាការ អមសាលាដំបូងរាជធានីភ្នំពេញនៅភូមិត្រពាំងឈូក សង្កាត់ទឹកថ្លា ម្តុំមុខពេទ្យលោកសង្ឃ កាលពីរសៀលថ្ងៃទី១៩ ចុងសប្ដាហ៍មុននេះ ឥឡូវត្រូវបាន តុលាការជម្រះអប់រំដោះលែងឲ្យត្រឡប់ទៅផ្ទះវិញអស់ហើយនៅដើមសប្ដាហ៍នេះដោយពុំមានអ្នកណាម្នាក់ជាប់ពន្ធនាគារអ្វីឡើយ។
មនុស្សដែលត្រូវបានចាប់ខ្លួនទាំង៣២នាក់ក្នុងនោះមានស្រីម្នាក់ ដែលពួកគេទាំងនោះ មានឈ្មោះ ដូចខាងក្រោមនេះ ៖-១/ហួន សុផា ភេទស្រី អាយុ២១ឆ្នាំ មុខរបរលក់ថ្នាំញៀន ស្នាក់នៅ ភូមិត្រពាំងឈូក សង្កាត់ទឹកថ្លា។ ២/ ហែម សម្បត្តិ ភេទប្រុស អាយុ២០ឆ្នាំ មុខរបរព្រូឡាន នៅកំពង់ស្ពឺ។ ៣/ ជា ចិនប៉ាវ អាយុ២០ឆ្នាំ មុខរបរជាងឡានស្នាក់នៅសង្កាត់ភ្នំពេញថ្មី។ ៤/លាង កាន អាយុ៣២ឆ្នាំ មុខរបរជាងម៉ូតូ ស្នាក់នៅខណ្ឌចំការមន។ ៥/ កែវ ភក្តី មុខរបរជាង ជាងភ្លើងនៅអ្នកលឿង ខេត្តព្រៃវែង។ ៦/ជឿន ចេស្តា អាយុ២០ឆ្នាំ មុខរបរជាងភ្លើងជាមួយឈ្មោះកែវ ភក្តី។ ៧/វ៉ាត ចំណាប់ អាយុ២៩ឆ្នាំ គ្មានមុខរបរ នៅខេត្តកំពង់ស្ពឺ។ ៨/ វី វឿន អាយុ២៥ឆ្នាំ ទិញលក់អេតចាយ។ ៩/ អ៊ូ ខុង អាយុ១៨ឆ្នាំ គ្មានទីលំនៅ និងមុខរបរពិតប្រាកដ។ ១០/ សន ប៊ុនសៀង អាយុ១៧ឆ្នាំជានិស្សិតស្នាក់នៅភូមិព្រៃទា សង្កាត់ចោមចៅ។ ១១/ នោង ហ៊ុន អាយុ៣៥ឆ្នាំ មុខរបរជាងជួសជុលទូរស័ព្ទដៃ។ ១២/ ឡៃ ឆៃយ៉ា អាយុ២៥ឆ្នាំ មុខរបរលក់ដូរ ស្នាក់នៅភូមិត្រពាំងឈូក សង្កាត់ទឹកថ្លា។ ១៣/ តាំង សុធី អាយុ២៦ឆ្នាំ កម្មករ មានទីលំនៅខណ្ឌពោធិ៍សែនជ័យ។ ១៤/សុក វិចិត្រ អាយុ២៨ឆ្នាំ គ្មានទីលំនៅ និងមុខរបរច្បាស់លាស់។ ១៥/ សុខុន ភក្ត្រា អាយុ១៦ឆ្នាំគ្មានទីលំនៅ និងមុខរបរ។ ១៦/ សាវង់ អាយុ២៣ឆ្នាំ គ្មានមុខរបរ និងទីលំនៅ។ ១៧/ ធូ ភារ៉ា អាយុ៣០ឆ្នាំ មុខរបររត់ម៉ូតូឌុប។
១៨ / សៀន សារ៉េត អាយុ២៨ឆ្នាំ មុខរបរជាងជួសជុលទូរស័ព្ទ។ ១៩/ ញ៉ុម ចំណប់ អាយុ
២៥ឆ្នាំ មុខរបររត់ម៉ូតូឌុបស្នាក់នៅ ខណ្ឌចំការមន។ ២០/ ហែម ដាមិច អាយុ២៥ឆ្នាំ កម្មករ។
២១/ សួន ចន្ថា អាយុ៣៥កម្មករស្នាក់នៅសង្កាត់ភ្នំពេញថ្មី។ ២២/ ទូច សុវណ្ណោ អាយុ២៩ឆ្នាំ មុខរបររត់ម៉ូតូឌុបនៅផ្សារដេប៉ូ ខណ្ឌទួលគោក។ ២៣/ សៅ រដ្ឋាអាយុ២៨ឆ្នាំ កម្មករនៅផ្សារដេប៉ូ។ ២៤/ដុំ ដឺអាយុ២៨ឆ្នាំមុខរបរជាងចម្លាក់មានទីលំនៅភូមិអូរបែកក្អម សង្កាត់ទឹកថ្លា។ ២៥/ គិន នៅ អាយុ១៥ឆ្នាំជាសិស្សមានទីលំនៅក្បែរចំណុចកើតហេតុ។ ២៦/យ៉ុង សុខជា អាយុ២៥ឆ្នាំ នៅផ្ទះសង្កាត់ផ្សារដេប៉ូ៣ ខណ្ឌទួលគោក។ ២៧/ចាន់ ពៅ អាយុ២០ឆ្នាំ។ ២៨/ហែម ភារម្យ អាយុ៣១ឆ្នាំ មានទីលំនៅស្វាយរលំ ស្រុកស្អាងខេត្តកណ្តាល។ ២៩/ ជា សុវណ្ណារ៉ា អាយុ៣៥ឆ្នាំ មុខរបរជាងឡាន មានទីលំនៅខណ្ឌទួលគោក។ ៣០/ ម៉េង យ៉ា អាយុ១៨ឆ្នាំ និស្សិត មានទីលំនៅខេត្តកំពង់ឆ្នាំង។ ៣១/ លាង ចាន់បញ្ញា អាយុ១៥ឆ្នាំ។ ៣២/ ឈ្មោះ ស៊ុន រីណា អាយុ១៨ឆ្នាំ មុខរបរជាងភ្លើង ម៉ាស៊ីនត្រជាក់ មានទីលំនៅក្នុងភូមិព្រៃទា សង្កាត់ចោមចៅខណ្ឌពោធិ៍សែនជ័យ។
លោកវរសេនីយ៍ឯក ម៉ក់ ហុង អធិការ នៃអធិការដ្ឋាននគរបាលខណ្ឌសែនសុខបានមានប្រសាសន៍ប្រាប់កម្ពុជាថ្មីនៅព្រឹកថ្ងៃទី២៥ ខែវិច្ឆិកា ឆ្នាំ២០១៥នេះថា ករណីនៃការចាប់ឃាត់ខ្លួនក្រុមជនជាប់សង្ស័យ ពាក់ព័ន្ធគ្រឿងញៀនចំនួន៣២នាក់នោះ ក្រោយការស្រាវជ្រាវ(ធ្វើកោសល្យវិច័យពិនិត្យទឹកនោម) បានរកឃើញថា ពួកគេទាំងនោះសុទ្ធតែជាអ្នកប្រើប្រាស់ទេ ហើយប៉ូលិសបានបញ្ជូនពួកគេទាំងនោះទៅឲ្យតុលាការជម្រះអស់ហើយកាលពីដើមសប្តាហ៍នេះ។
នៅពេលសួរលោកអធិការថា តើមានជនជាប់ចោទប៉ុន្មាននាក់ត្រូវបានដាក់ទោសទណ្ឌនៅឯពន្ធនាគារ និងប៉ុន្មាននាក់ត្រូវដោះលែងនោះ លោកបានឆ្លើយដោយស្ទាក់ស្ទើរថា …អត់មានបានបញ្ជូនជនណាម្នាក់ទៅដាក់ពន្ធនាគារនោះទេគឺ តុលាការបានជម្រះ អប់រំដោះលែងឲ្យត្រឡប់ទៅវិញអស់ហើយ។
នេះមិនមែនជាលើកទី១នោះទេ ដែលអ្នកទោសជាប់ពាក់ព័ន្ធគ្រឿងញៀនចាប់បាននៅម្តុំមុខពេទ្យលោកសង្ឃត្រូវបានប៉ូលិសបង្ក្រាបបានម្តងៗ ពេលខ្លះ៨០នាក់ ពេលខ្លះ៧០នាក់ ត្រូវបានតុលាការបញ្ជាបង្គាប់ឲ្យប៉ូលិសដោះលែងនោះ ហើយភាគច្រើនធ្វើឡើងនៅក្រោមរូបភាពបញ្ជូនទៅអប់រំនៅមណ្ឌលកែប្រែ ឱកាសខ្ញុំ ប៉ុន្តែជនទាំងនោះមិនមានមុខនៅក្នុងមណ្ឌលកែប្រែទាំងនោះទេ។ ក្រោយមកច្រើនតែលេចឮពាក្យមិនល្អស្តាប់ថា បាន រួចខ្លួនពីការមិនដាក់គុកនេះ ដោយមានអ្នកជួយរត់ការ។
ដោយសារតែប៉ូលិសចាប់ តុលាការដោះលែងរហូតនេះហើយទើបធ្វើឲ្យតំបន់ ទីផ្សារងងឹតលក់ដូរថ្នាំញៀនដ៏ល្បីល្បាញនៅភូមិត្រពាំងឈូកនៅមុខពេទ្យលោកសង្ឃ ប៉ូលិសបង្ក្រាបមិនចេះអស់ ហើយជនល្មើសឃើញមុខដដែលៗ។ លើសពីនេះ ពួកក្រុមជនទាំងនេះបានបង្កឲ្យសង្គមអាប់អួ កើតមានអំពើហិង្សា លួច ឆក់ ប្លន់ សព្វបែបយ៉ាង ហើយអនាគតយុវជនខ្មែរជាច្រើននាក់បានធ្លាក់ចូលក្នុងអន្ទាក់គ្រឿងញៀននេះ។ ពួកគេមិនត្រឹមតែមិនបានជួយសង្គម និងរកប្រាក់ចិញ្ចឹមក្រុមគ្រួសារគេទេ ថែមទាំងមិនអាចជួយទាំងខ្លួនឯងបានផង ពោលគឺដើរអុកឡុកគេឯង បង្កបទល្មើស ធ្វើឲ្យសង្គមអាប់អួ។
មហាជនទាំងអស់នាពេលបច្ចុប្បន្ននេះ បានសម្តែងការព្រួយបារម្ភពីបញ្ហាគ្រឿងញៀនកើតរីករាលដាលធំឡើងៗទូទាំងប្រទេស ហើយសមត្ថកិច្ចជំនាញរកមុខមេខ្លោងធំៗមិនឃើញ ឬដូចពាក្យចចាមអារ៉ាមគ្រប់តំបន់រិះគន់សមត្ថកិច្ចថា ចាប់តែអ្នកប្រើប្រាស់ មិនហ៊ានចាប់មេខ្លោងធំៗដាក់គុកទេ ព្រោះខ្លាចអស់បុណ្យស័ក្ដិ ? ដោយគេសង្ស័យថា មេខ្លោងជួញដូរថ្នាំញៀន ដែលធំជាងគេបំផុត ពួននៅក្រោយខ្នងលោកធំមានអំណាចនៅស្រុកខ្មែរ ដែលមិនមានអ្នកណាហ៊ានប៉ះពាល់។ នេះគ្រាន់តែជាសម្ពាធរិះគន់ពីប្រជាពលរដ្ឋ និងកងកម្លាំងសមត្ថកិច្ចតូចតាចមួយចំនួនធំ ចំពោះគ្រឿងញៀន នៅស្រុកខ្មែរ ហើយសកម្មភាពនៃបទល្មើសវាស៊ីចង្វាក់គ្នាពិតណាស់ត្រង់ថា គ្រឿងញៀនមិនអាចបង្ក្រាបបានជោគជ័យនៅស្រុកខ្មែរ តួយ៉ាងដូចជានៅម្តុំមុខពេទ្យលោកសង្ឃ ជាដើមលក់ដូរដូចទីផ្សារ ហើយប្រជាជននៅទីនោះជាច្រើនរកស៊ីកាក់កប ដោយចាំទទួលផ្ញើម៉ូតូយកលុយពីពួកចូលមកទិញ ឬសេពថ្នាំញៀននៅក្នុងតំបន់នេះ។ តើនៅថ្ងៃមុខនឹងទៅជាយ៉ាងណាបើនៅតែរបៀបនេះរហូតនោះ?៕
ជនជាប់ពាក់ព័ន្ធគ្រឿងញៀន៣២នាក់នៅមុខពេទ្យលោកសង្ឃ ត្រូវតុលាការដោះលែង
0 Comments