ភ្នំពេញ ៖ ពានរង្វាន់សន្តិភាព ដែលមានឈ្មោះថា “The Gusi Peace Prize” ត្រូវបាននាំមកដល់ប្រទេសកម្ពុជាហើយកាលពីវេលាម៉ោង១ រសៀលថ្ងៃទី២៦ ខែវិច្ឆិកា ឆ្នាំ២០១៥ តាមរយៈលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលបានទៅទទួលដោយផ្ទាល់នៅប្រទេសហ្វីលីពីន កាលពីថ្ងៃទី២៥ ខែវិច្ឆិកា ឆ្នាំ២០១៥ ជាមួយជ័យលាភីចំនួន១៨ នាក់ផ្សេងទៀត មកពីតាមបណ្តាប្រទេសនានាលើពិភពលោក។
លោក ហ៊ុន ម៉ានី បានមានប្រសាសន៍ទៅកាន់អ្នកសារព័ត៌មាននៅព្រលានយន្តហោះអន្តរជាតិភ្នំពេញថា ពានរង្វាន់ The Gusi Peace Prize នេះគឺបានបង្ហាញពីអ្វីមួយ ដែលយើងបានខិតខំប្រឹងប្រែងទាំងអស់គ្នាក្នុងការធ្វើការងារមនុស្សធម៌ និងការងារស្ម័គ្រចិត្ត តែអ្វីដែលជាកត្តាសំខាន់មួយទៀត គឺថ្ងៃនេះដែលយើងបានឃើញច្បាស់នូវពានរង្វាន់ The Gusi Peace Prize ដែលបាននាំមកនូវការអបអរសាទរចំពោះការរួបរួមគ្នាមួយ ពីព្រោះពានរង្វាន់ The Gusi Peace Prize នេះមិនមែនសម្រាប់តែលោកម្នាក់ទេ គឺវាបានចេញមកពីការខិតខំដើម្បីប្រទេសជាតិ។
លោក ហ៊ុន ម៉ានី បានបញ្ជាក់ថា “នេះគឺជាមោទនភាពមួយ ប៉ុន្តែអ្វីដែលជាមោទនភាពជាតិមិនអាចទៅរួច ប្រសិនបើគ្មានការចូលរួមអបអរសាទរពីទាំងអស់គ្នានោះទេ។ ការមកទទួលខ្ញុំណាពេលនេះ ក៏ដូចជាក្រុមការងារ ដែលទៅទទួលពានរង្វាន់ Gusi Peace Prize គឺជាកាចូលរួមមួយ និងរួបរួមមួយ ធ្វើយ៉ាងណាឲ្យតម្លៃនៃ Gusi Peace Prize នេះមិនត្រឹមតែជាពានរង្វាន់មួយប៉ុណ្ណោះនោះទេ ប៉ុន្តែវាជាអ្វីមួយ ដែលធ្វើឲ្យមានការរួមរួមជាតិ មានមោទនភាពជាតិ ហើយជាតម្លៃមួយសម្រាប់ប្រទេសជាតិផងដែរ”។
លោកបញ្ជាក់ដែរថា “ខ្ញុំគិតថានេះជាកត្តាសំខាន់ ដែលមានការផ្សាយ ក៏ដូចជាព័ត៌មានជាច្រើនពាក់ព័ន្ធជាមួយប្រទេសកម្ពុជា ជាការពិតហើយប្រទេសយើងនៅមានសេសសល់បញ្ហា ដែលយើងត្រូវរកដោះស្រាយ ក៏ប៉ុន្តែយើងត្រូវទទួលស្គាល់ប្រទេសជាតិយើងថា មានសក្តានុពលច្រើន មានសេចក្តីរីករាយច្រើន មានស្នាមញញឹមច្រើន មានភាពកក់ក្តៅច្រើន ពីប្រជាពលរដ្ឋខ្មែរ នេះហើយជាអ្វីដែលយើងត្រូវបង្ហាញ និងដល់ពេលដែលខ្មែរត្រូវរួមគ្នាបង្ហាញពីស្នាដៃ ពីសក្តានុពលនៅលើឆាកអន្តរជាតិ”។
លោក នួន វាសនា តំណាងឲ្យសហភាពសហព័ន្ធយុវជនខេត្តកំពង់ស្ពឺដែលបាននាំយុវជនចំនួន៥០ នាក់ទៅចូលរួមទទួលលោក ហ៊ុន ម៉ានី ដល់ព្រលានយន្តហោះអន្តរជាតិភ្នំពេញបានថ្លែងថា យើងទាំងអស់គ្នាសប្បាយរីករាយក្នុងយុវជនខ្មែរទាំងអស់ ហើយយើងគិតថា ពានរង្វាន់នេះ គឺជាមោទនភាពរបស់យុវជនកម្ពុជា ជាមោទនភាពប្រជាជនកម្ពុជា ជាមោទនភាពរបស់ប្រទេសជាតិយើង ដែលមានឥស្សរជនដ៍ឆ្នើម គឺលោក ហ៊ុន ម៉ានី ដែលបានទទួលពានរង្វាន់នៅថ្ងៃនេះ ហើយពានរង្វាន់នេះ គឺជាគំរូមួយសំរាប់លើកទឹកចិត្តរបស់យុវជនទាំងអស់គ្នាឲ្យធ្វើការងារដើម្បីប្រទេសជាតិយើង សាមគ្គីភាព ដើម្បីផលប្រយោជន៍ជាតិយើងទៅថ្ងៃមុខ ហើយលោកសង្ឃឹមថា សហភាពសហព័ន្ធយុវជនកម្ពុជា ដែលដឹកនាំដោយលោក ហ៊ុន ម៉ានី នឹងផុលផុសបន្ថែមទៀត ហើយសកម្មភាពទាំងអស់នេះ នឹងក្លាយទៅជាប្រយោជន៍រួមរបស់ប្រទេសជាតិយើងទាំងមូល ជាពិសេសសំរាប់យុវជនកម្ពុជា។
ដោយឡែកកញ្ញា សាយ៉ា លីនដា តំណាងសហភាពសហព័ន្ធយុវជនកម្ពុជាវិស័យអប់រំយុវជននិងកីឡា មានថ្លែងថា “ខ្ញុំមានអារម្មណ៍សប្បាយរីករាយសប្បាយចិត្ត និងមានមោទនភាពយ៉ាងខ្លាំងចំពោះព័ត៌មាន ដែលលោក ហ៊ុន ម៉ានី ដែលគាត់បានទទួលនូវពានរង្វាន់ទាំងពីរ គឺពានរង្វាន់ The Gusi Peace Prize និងពានរង្វាន់ The ASEAN People’s Award បានបញ្ជាក់ថា បើទោះជាយើងជាប្រទេសតូច តែយើងមានយុវជន និងវរជនជាច្រើនរូប ដែលបានទទួលពានរង្វាន់ថ្នាក់ពិភពលោកជាបន្តបន្ទាប់ ហើយនាងខ្ញុំមានការកោតសរសើរចំពោះស្នាដៃការងារទាំងអស់ ដែលបងប្រធាន ហ៊ុន ម៉ានី ទទួលបានកន្លងមក ហើយវត្តមានរបស់បង ហ៊ុន ម៉ានី មិនមែនជាការបង្ហាញស្នាដៃតែគាត់មួយមុខនោះទេ គឺគាត់ពាំនាំមកនូវកិត្តិតយសរបស់ប្រទេសជាតិទាំងមូលទៅលើឆាកអន្តរជាតិ”។
ដោយឡែកនៅក្នុងពិធីអបអរសាទរនាស្តាតអូឡាំពិក លោកជំទាវឧបនាយករដ្ឋមន្ត្រី ម៉ែន សំអន បានមានប្រសាសន៍ថា នេះគឺជាមោទនភាពសម្រាប់គ្រួសារសហភាពសហព័ន្ធយុវជនកម្ពុជាយើង ក៏ដូចជាប្រជាជនកម្ពុជាទាំងអស់ ដែលបានខិតខំកន្លងមក ហើយអ្វីដែលយើងទទួលបាននេះ គឺជាការហាត់ពត់លត់ដំ និងជាការខិតខំប្រឹងប្រែងជំនះនូវគ្រប់ឧបសគ្គទាំងឡាយ ដើម្បីតស៊ូ រួមជាមួយរាជរដ្ឋាភិបាល ជាមួយមន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ទាំងអស់ ដែលបានខិតខំគាំទ្រនូវសុខសន្តិភាព ស្ថេរភាពនយោបាយ ហើយសុខសន្តិភាពនេះហើយ ដែលពិភពលោកទទួលស្គាល់ និងបានផ្តល់នូវពានរង្វាន់សន្តិភាពនេះ។ លោកជំទាវឧបនាយករដ្ឋមន្ត្រី ម៉ែន សំអន បានបញ្ជាក់ថា “ពានរង្វាន់សន្តិភាព The Gusi Peace Prize ដែលអន្តរជាតិបានផ្តល់ឲ្យប្រទេសជាតិយើង ប្រជាពលរដ្ឋយើង តាមរយៈថ្នាក់ដឹកនាំឯកឧត្តម ហ៊ុន ម៉ានី នេះ គឺជាមោទនភាពសម្រាប់ប្រទេសជាតិ ដូច្នេះយើងត្រូវតែខិតខំប្តេជ្ញា ដើម្បីថែរក្សាពង្រឹងសុខសន្តិភាព មានការអភិវឌ្ឍន៍លើគ្រប់វិស័យ ជាពិសេសយើងនឹងបន្តបេសកកម្មក្នុងការបម្រើប្រជាពលរដ្ឋ និងយុវជន ដើម្បីចូលរួមចំណែកកាត់បន្ថយភាពក្រីក្រ ពង្រឹងសុខសន្តិភាព លើកតម្កើងវប្បធម៌ប្រពៃណីរបស់យើង”។
ចំណែកនៅលើលិខិតរបស់លោកជំទាវឧបនាយករដ្ឋមន្ត្រី ម៉ែន សំអន ផ្ញើជូនលោក ហ៊ុន ម៉ានី បានលើកឡើងថា “ក្នុងនាមជាប្រធានគណៈនាមជននៃគណៈកម្មាធិការកណ្តាលគណបក្សប្រជាជនកម្ពុជា និងតំណាងសមាជិកសមាជិកាគណៈចលនាមហាជនទូទាំងប្រទេស ខ្ញុំមានសេចក្តីរំភើបរីករាយឥតឧបមា និងសូមចូលរួមអបអរសាទរចំពោះឯកឧត្តម ក្នុងឱកាសដែលសហភាពសហព័ន្ធយុវជនកម្ពុជាក្រោមការដឹកនាំរបស់ឯកឧត្តមបានទទួលនូវ៣រង្វាន់ប្រជាជនអាស៊ាននៅទីក្រុងកូឡាឡាំពួ ប្រទេសម៉ាឡេស៊ី និងសូមអបអរសាទរចំពោះ ឯកឧត្តម ផ្ទាល់ដែលទទួលបាន៣រង្វាន់សន្តិភាពអន្តរជាតិ GUSI សម្រាប់ ការដឹកនាំយុវជន ការងារមនុស្សធម៌ និងការតស៊ូដើម្បីបេតិកភណ្ឌវប្បធម៌ពីមូលនិធិ GUSI នៅទីក្រុងម៉ានីលប្រទេហ្វីលីពីននេះ”។
លោកជំទាវឧបនាយករដ្ឋមន្ត្រី ម៉ែន សំអន បានបញ្ជាក់ដែរថា “តាមរយៈរង្វាន់ទាំងពីរខាងលើ ដែលស្តែងចេញពីការដឹកនាំ ការខិតខំប្រឹងប្រែង ពុះពារនិងគំនិតច្នៃប្រឌិតដ៏មោះមុតរបស់ឯកឧត្តម ក្នុងការងារដើម្បីបុព្វហេតុសង្គម ខ្ញុំពិតជាមានមោទនភាពចំពោះឯកឧត្តមផ្ទាល់ ក៏ដូចជាចំពោះយុវជនខ្មែរជំនាន់ក្រោយដែលបានចូលរួមចំណែកដើម្បីបុព្វហេតុសង្គមកម្ពុជាទាំងមូល។
ពាន់រង្វាន់ពីរនេះគឺជាការតបស្នងដ៏ស័ក្តិសមចំពោះវិភាគទានដ៏មានតម្លៃរបស់ឯកឧត្តម និងសហការីទាំងអស់សម្រាប់ជាតិ និងប្រជាពលរដ្ឋខ្មែរទាំងមូល។ គណៈចលនាមហាជនជឿជាក់យ៉ាងមុតមាំថា ឯកឧត្តមនឹងបន្តនាំមកនូវភាពជោគជ័យថ្មីៗបន្ថែមទៀតជូនដល់សង្គមកម្ពុជាទាំងនៅឆាកជាតិ និងលើឆាកអន្តរជាតិ ហើយសូមជូនពរឲ្យឯកឧត្តមសម្រេចបាននូវរាល់ភារកិច្ចដ៏ឧត្តមនានា”។
សូមបញ្ជាក់ថា ខណៈពេលចុះពីយន្តហោះ លោក ហ៊ុន ម៉ានី ត្រូវបានទទួលអបអរសាទរយ៉ាងខ្លាំងនៅឯព្រលានយន្តហោះអន្តរជាតិភ្នំពេញ ពីសំណាក់យុវជនពីតាមបណ្តារាជធានី ខេត្តនានាទូទាំងប្រទេស ហើយត្រូវបានដង្ហែតាមរថយន្តពីព្រលានយន្តហោះឆ្ពោះមកកាន់ស្តាតអូឡាំពិក ដោយមានម៉ូតូកង់បីអមប្រមាណ៥០០ គ្រឿងនិងម៉ូតូជាច្រើនគ្រឿងផងដែរ។ ចាប់ពីព្រលានយន្តហោះរហូតមកដល់ស្តាតអូឡាំពិក គេឃើញមានយុវជន ប្រជាពលរដ្ឋ មន្ត្រីរាជការ សិស្ស និស្សិត តាមដងផ្លូវរាប់ម៉ឺននាក់ បានចេញមកឈរអបអរសាទរចំពោះការទទួលបានពានរង្វាន់ The Gusi Peace Prize នេះ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា គឺជាឥស្សរជនវ័យក្មេងទី១ របស់កម្ពុជា បានឡើងទទួលពានរង្វាន់ The Gusi Peace Prize ពីមូលនិធិ Gusi Peace Prize នៅក្នុងទីក្រុងម៉ានីល ប្រទេសហ្វីលីពីនកាលពីរសៀលថ្ងៃទី២៥ ខែវិច្ឆិកា ឆ្នាំ២០១៥ ក្នុងចំណោមឥស្សរជនលើពិភពលោកចំនួន១៨ រូប។ ពានរង្វាន់ Gusi Peace Prize ត្រូវបានបង្កើតឡើងដោយលោក Barry Gusi ក្នុងគោលបំណងឧទ្ទិសដល់ឪពុករបស់លោក គឺលោក Gemeniano Javier Gusi អតីតយុទ្ធជននាសម័យសង្គ្រាមលោកលើកទីពីរ ដែលបានតស៊ូប្រយុទ្ធប្រឆាំងជប៉ុន ហើយក្រោយមកបានក្លាយជាអ្នកនយោបាយ និងជាសកម្មជនសិទ្ធិមនុស្ស។ ចាប់ពីឆ្នាំ២០០២ មក ពានរង្វាន់ដែលចែកចេញជាច្រើនផ្នែកនេះ ត្រូវបានប្រគល់ជនដល់ឥស្សរជន និងស្ថាប័ន ដែលធ្វើការងារលើការពង្រឹងសន្តិភាព និងការពង្រីកសកម្មភាពផ្សេងៗ។ ពិធីចែករង្វាន់ត្រូវបានកំណត់ធ្វើឡើងនៅថ្ងៃពុធ សប្តាហ៍ទី៤ នៃខែវិច្ឆិកា នៅក្នុងទីក្រុងម៉ានីលប្រទេសហ្វីលីពីន។
រយៈពេល១៣ ឆ្នាំកន្លងមកនេះ លោក ហ៊ុន ម៉ានី គឺជាឥស្សរជនទីមួយរបស់កម្ពុជា ដែលបានឈ្នះពានរង្វាន់នេះ។ សម្រាប់ឆ្នាំ២០១៥ នេះ លោក ហ៊ុន ម៉ានី ដែលជាតំណាងរាស្ត្រគណបក្សប្រជាជនកម្ពុជាផងដែរនោះ ស្ថិតក្នុងចំណោមឥស្សរជនចំនួន១៨នាក់លើពិភពលោកដែលឈ្នះពាន Gusi Peace Prize។ លោក ហ៊ុន ម៉ានី ឈ្នះលើផ្នែក Youth leadership and Humanitarianism and Advocate of Cultural Heritage ហើយលោកក៏ជាជ័យលាភីដែលក្មេងជាងគេផងដែរ។ ជ័យលាភី១៨ នាក់ផ្សេងទៀត មកពីអូទ្រីស អូស្ត្រាលី បង់ក្លាដែស បេឡារុស ចិន ចចជា ឆេក អាល្លឺម៉ង់ ជប៉ុន កាហ្សាក់ស្ថាន គៀកហ្ស៊ីសស្ថាន ហូឡង់ ហ្វីលីពីន ព័រទុយហ្គាល់ កាតា រុស្ស៊ី អ៊ុយក្រែន និងសហរដ្ឋអាមេរិក។ ជ័យលាភីភាគច្រើនសុទ្ធតែជាបណ្ឌិត ហើយក្នុងនោះផងដែរ ហើយមានលោក Stanislav Shushkevich អតីតប្រធានាធិបតីបេឡារុស លោក Akskar Akayev អតីតប្រធានាធិបតីគៀកហ្ស៊ីសស្ថាន និងលោក Antonio Eanes អតីតប្រធានាធិបតីព័រទុយហ្គាល់។
ចំណុចសំខាន់ ដែលធ្វើឲ្យគណៈកម្មការទាំង២១ ប្រទេស សម្រេចចិត្តជ្រើសរើស លោក ហ៊ុន ម៉ានី ជាម្ចាស់ពានរង្វាន់ពិភពលោកមួយនេះរួមមាន ទី១. រក្សាឲ្យបាននូវសុខសុវត្ថិភាព យុត្តិធម៌ និងសេរីភាពរបស់យុវជន ដោយមិនរើសអើងជាតិសាសន៍ ពណ៌សម្បុរ វណ្ណៈសង្គម និង និន្នាការនយោបាយ ទី២. លើកកម្ពស់ចលនាចូលរួមដោយស្ម័គ្រចិត្តរបស់យុវជននៅក្នុងការអភិវឌ្ឍ ថែរក្សាបូរណភាពទឹកដី សេចក្ដីថ្លៃ ថ្នូរ សាមគ្គីភាព សន្តិភាព ទី៣. លើកកម្ពស់ការថែទាំសុខភាព កំសាន្ត កីឡា និង សិល្បៈ ទី៤. លើកទឹកចិត្តយុវជនក្នុងការស្វែងយល់អំពីប្រវត្តិសាស្ត្រ ប្រពៃណី ទំនៀមទម្លាប់ ទី៥. បង្កើតកិច្ចសហប្រតិបត្តិការ និងទំនាក់ល្អជាមួយ អង្គការសហគមន៍ជាតិ និងអន្តរជាតិ ទី៦. ផ្ដល់ការបណ្ដុះបណ្ដាលវិជ្ជាជីវៈ បំនិនជីវិត ការអប់រំយុវជន ជាពិសេសសម្រាប់ជនពិការ។
កាលពីថ្ងៃទី២១ ខែវិច្ឆិកា ឆ្នាំ២០១៥ លោក ហ៊ុន ម៉ានី ក្នុងនាមជាប្រធានសហភាពសហព័ន្ធយុវជនកម្ពុជា (UYFC) បានទទួលរង្វាន់ម្តងហើយ ដែលមានឈ្មោះថា “The ASEAN People’s Award” (រង្វាន់ប្រជាជនអាស៊ាន) ហើយរង្វាន់នេះ ត្រូវបានទទួលនៅក្នុងអំឡុងនៃកិច្ចប្រជុំកំពូលអាស៊ានលើកទី២៧ នៅក្នុងទីក្រុងគូឡាឡាំពួរ ប្រទេសម៉ាឡេស៊ី៕
មនុស្សរាប់ម៉ឺននាក់ចូលរួមអបអរសាទរការទទួលបានពានរង្វាន់ The Gusi Peace Prize ដែលនាំមកដោយលោក ហ៊ុន ម៉ានី
0 Comments