រដ្ឋមន្ត្រីក្រសួងការបរទេសរុស្ស៊ីបានឲ្យដឹងថា ការបាញ់ទម្លាក់យន្តហោះចម្បាំងរបស់រុស្ស៊ីមួយគ្រឿងនៅក្នុងប្រទេសស៊ីរីដោយប្រទេសទួរគីហាក់ដូចជាការបង្កហេតុដែលបានគ្រោងទុកជាមុន។ លោកបានបន្ថែមថា រដ្ឋាភិបាលទីក្រុងអង់ការ៉ាបានបរាជ័យក្នុងការប្រាស្រ័យទាក់ទងជាមួយរុស្ស៊ីលើឧប្បត្តិហេតុនេះ។
លោក Lavrov បាននិយាយថា “យើងមានការសង្ស័យយ៉ាងខ្លាំងដែលថា ទង្វើនេះគឺដោយអចេតនា។ វាមើលទៅហាក់ដូចជាការបង្កហេតុដែលរៀបចំទុកជាមុន”។
លោក Lavrov បានបន្ថែមទៀតថា ដៃគូជាច្រើនរបស់រុស្ស៊ីបានហៅឧបទ្ទវហេតុនេះថាជា “ការវាយឆ្មក់ជាក់ស្តែង”។
លោកបាននិយាយថា ការធ្លាក់យន្តចម្បាំងរបស់រុស្ស៊ីបានកើតឡើងក្នុងរយៈពេលខ្លី បន្ទាប់ពីកងទ័ពអាកាសរុស្ស៊ីបានបើកការវាយប្រហារតាមអាកាសទៅលើរោងចក្រ និងក្បួនឡានដឹកប្រេងរបស់ក្រុមភេរវកម្ម។
ជាមួយគ្នានោះដែរ អ្នកការទូតរុស្ស៊ីបានរិះគន់ដល់អង្គការណាតូចំពោះការមិនបានសម្ដែងនូវការរំលែកទុក្ខចំពោះប្រទេសរុស្ស៊ី លើការបាត់បង់ជីវិតនៃកងទ័ពរបស់ខ្លួន។
លោក Lavrov បានថ្លែងថា “សេចក្ដីថ្លែងការណ៍ចម្លែកបំផុតត្រូវបានគេធ្វើឡើងបន្ទាប់ពីកិច្ចប្រជុំរបស់អង្គការណាតូអំពាវនាវដោយទួរគី ដែលមិនបានសម្ដែងនូវការសោកស្ដាយ ឬមិនបានចូលរួមរំលែកទុក្ខណាមួយក្នុងគោលបំណងគ្របដណ្ដប់នូវអ្វីដែលកងទ័ពអាកាសរបស់ប្រទេសទួរគីបានធ្វើ”។
ទោះបីជាយ៉ាងណាក៏ដោយ លោក Lavrov បានរំលឹកឡើងវិញនូវសេចក្ដីថ្លែងការណ៍របស់ក្រសួងការពារជាតិរុស្ស៊ីដែលបានបដិសេធចំពោះការចោទប្រកាន់របស់រដ្ឋាភិបាលទីក្រុងអង់ការ៉ាដែលថា យន្តចម្បាំងរបស់រុស្ស៊ីបានរំលោភលើដែនអាកាសរបស់ប្រទេសទួរគី។
លោក Lavrov បាននិយាយបន្ថែមទៀតថា ទំនាក់ទំនងរបស់ប្រទេសរុស្ស៊ីជាមួយទួរគីនឹងផ្លាស់ប្ដូរបន្ទាប់ពីមានការវាយប្រហារមួយនៅលើយន្តហោះរបស់រុស្ស៊ី។ ប្រទេសទួរគីដែលបច្ចុប្បន្ននេះបានអំពាវនាវឲ្យមានកិច្ចចរចានោះ គួរតែធ្វើបន្ថែមទៀត ដើម្បីប្រាស្រ័យទាក់ទងជាមួយរុស្ស៊ីមុនពេលនិងបន្ទាប់ពីការឧប្បត្តិហេតុនេះ។
លោក Lavrov បានបន្តថា ក្រុងមូស្គូនឹងវាស់វែងការឆ្លើយតបរបស់ខ្លួន ដើម្បីកំណត់ការខូចខាតចំពោះពាណិជ្ជករទួរគី និងរុស្ស៊ីដែលគ្មានអ្វីទាក់ទងទាំងអស់ជាមួយឧប្បត្តិហេតុនេះហើយនឹងសម្រេចចិត្តលើសកម្មភាពត្រឹមត្រូវ។
លោក Lavrov បាននិយាយបន្ទាប់ពីលុបចោលដំណើរទស្សនកិច្ចរបស់លោកទៅកាន់ទីក្រុងអ៊ីស្តង់ប៊ុលថា ក្រុងមូស្គូគ្មានបំណងបញ្ជូនមន្ត្រីជាន់ខ្ពស់ណាមួយទៅកាន់ប្រទេសទួរគី ឬទទួលក្រុមមន្ត្រីទួរគីជាន់ខ្ពស់ណាមួយឡើយ។
រដ្ឋមន្ត្រីរុស្ស៊ីបាននិយាយបញ្ជាក់ថា មានសំណួរមួយនៃការចូលរួមរបស់អាមេរិកនៅក្នុងការបាញ់ទម្លាក់យន្តហោះរុស្ស៊ីនេះ។ បើយោងតាមប្រភពរបស់គាត់បានឲ្យដឹងថា អាមេរិកបានទាមទារឲ្យសមាជិកនៃក្រុមចម្រុះប្រឆាំង IS ដែលដឹកនាំដោយទីក្រុងវ៉ាស៊ីនតោនទាំងអស់ដែលបានប្រើយន្តហោះយោធាសហរដ្ឋអាមេរិកត្រូវធ្វើការសម្របសម្រួលការដាក់ពង្រាយទាំងអស់ជាមួយនឹងយោធាអាមេរិក៕
RT
លោក Lavrov ៖ ការបាញ់ទម្លាក់យន្តហោះចម្បាំងរុស្ស៊ី ហាក់ដូចជាមានការគ្រោងទុក
0 Comments