ប៉ៃលិន ៖ បុរសម្នាក់បានស្លាប់បាត់បង់ជីវិតនៅនឹងកន្លែង ឯម្នាក់ទៀតរងរបួសស្រាល ខណៈពេលកំពុងជិះម៉ូតូឌុបគ្នាក្នុងល្បឿនលឿនគេចពីសត្វឆ្កែ ក៏ត្រូវរថយន្តហៃឡែនឌ័រមកពីមុខបុកពេញទំហឹង ក្នុងស្ថានភាពបញ្ច្រាសទិសគ្នា បណ្ដាលឲ្យបាត់បង់ជីវិតតែម្ដង។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៥ទៀបភ្លឺ ថ្ងៃទី២៥ ខែធ្នូ ឆ្នាំ២០១៥ លើកំណាត់ផ្លូវជាតិលេខ៥៧ ត្រង់ចំណុចភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
សមត្ថកិច្ចមូលដ្ឋានបានឲ្យដឹងថា ជនរងគ្រោះដែលស្លាប់ឈ្មោះ ខឹម ស៊ីនេត ភេទប្រុស អាយុ៣២ឆ្នាំ ជាកម្មករ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ជាអ្នកបើកម៉ូតូសង់កូរ៉េ អត់ស្លាកលេខ ខូចខាតធ្ងន់ ឯអ្នករួមដំណើរជាមួយឈ្មោះ ចាន់ សារឿន ភេទប្រុស អាយុ១៨ឆ្នាំ ជាកម្មករ រស់នៅភូមិឃុំជាមួយគ្នា រងរបួសស្រាល។ ចំណែកម្ចាស់រថយន្តមានឈ្មោះ លីន ភេទប្រុស អាយុប្រហែល៣០ឆ្នាំ បានរត់គេចខ្លួន។ រថយន្តបង្កម៉ាកហៃឡែនឌ័រ ពណ៌ខ្មៅ ពាក់ស្លាកលេខភ្នំពេញ2AA-8211។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសពីរនាក់ជិះម៉ូតូមួយគ្រឿងម៉ាកសង់កូរ៉េ អត់ស្លាកលេខ បើកបរពីកើតមកលិច លុះដល់កន្លែងកើតហេតុ ស្រាប់តែមានរថយន្ត១គ្រឿងម៉ាកហៃឡែនឌ័រ ពណ៌ខ្មៅ ពាក់ស្លាក់លេខភ្នំពេញ2AA-8211 ក្នុងទិសដៅបញ្ច្រាសទិសគ្នា បោះពួយយ៉ាងលឿនមកពីមុខ ហើយបានបុកម៉ូតូយ៉ាងពេញទំហឹង បណ្ដាលឲ្យមនុស្សម្នាក់ស្លាប់នឹងកន្លែង និងម្នាក់ទៀតរងរបួសស្រាល រីឯម៉ូតូដាច់ជាពីរ។
បច្ចុប្បន្នសពជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីឯស្រុកកំណើតខេត្តកំពង់ចាម រីឯជនរងគ្រោះដែលរងរបួសស្រាល ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្ត។ ចំណែកម៉ូតូជនរងគ្រោះ និងរថយន្តបង្ក យកទៅរក្សាទុកនៅការិយាល័យចរាចរណ៍ នៃស្នងការនគរបាលខេត្តប៉ៃលិន ហើយសមត្ថកិច្ចកំពុងសហការគ្នាតាមរកម្ចាស់រថយន្តដែលបង្កគ្រោះថ្នាក់នោះ ដើម្បីឲ្យម្ចាស់ចូលខ្លួនមកដោះស្រាយទៅតាមផ្លូវច្បាប់៕
ហៃឡែនឌ័រ បុកអ្នកជិះម៉ូតូ ស្លាប់ម្នាក់ របួសស្រាលម្នាក់
0 Comments