សហរដ្ឋអាមេរិក​ត្រៀម​បណ្ដេញ​ជនអន្តោប្រវេសន៍​ក្នុង​ឆ្នាំ​ថ្មី​

សេចក្ដីរាយការណ៍​មួយ​បាន​ឲ្យ​ដឹង​កាលពី​ថ្ងៃ​ព្រហស្បតិ៍​ថា រដ្ឋបាល​របស់​លោក​ប្រធានាធិបតី​អាមេ​រិក​ បា​រ៉ា​ក់ ​អូ​បា​ម៉ា ​កំពុង​មាន​ផែនការ​ធ្វើ​ប្រតិបត្តិការ​មួយ​ ដើម្បី​ប្រមូល​ផ្តុំ​ ហើយ​បណ្ដេញ​គ្រួសារ​ចំណាកស្រុក​ដែល​រត់​ភៀសខ្លួន​ចេញពី​គ្រោះ​រាំង​ស្ងួត​ និង​អំពើ​ហិង្សា​នៅ​អាមេរិក​កណ្ដាល​។​

​

លំហូរ​នៃ​គ្រួសារ ​និង​កុមារ​​ពុំ​មាន​សាច់ញាតិ​ ដែល​បាន​ឆ្លងកាត់​ចូល​ចូលក្នុង​សហរដ្ឋអាមេរិក​មកពី​ប្រទេស​ម៉ិកស៊ីកូ​បាន​ធ្លាក់ចុះ​ក្នុង​ឆ្នាំ​២០១៥​ ប៉ុន្តែ​ចំនួន​នេះ​បាន​កើនឡើង​ជាថ្មី​ម្តង​ទៀត​នៅ​ខែតុលា​ និង​ខែវិច្ឆិកា​។​

​

ប្រទេស​អាមេរិកឡាទីន​ជាច្រើន​កំពុង​ជាប់​ក្នុង​អំពើ​ហិង្សា​គ្មាន​របៀបរៀបរយ ​និង​របប​អាកាសធាតុ El Nino ដែល​បណ្ដាល​ឲ្យ​បណ្ដា​ប្រទេស​ជាច្រើន​នៅក្នុង​តំបន់​នេះ​ធ្លាក់​ចូល​ទៅ​ក្នុង​គ្រោះ​រាំងស្ងួត​។​

​

ក្រសួង​សន្តិសុខ​មាតុភូមិ​មិនបាន​ជំទាស់​ចំពោះ​របាយការណ៍​នៅក្នុង​សារព័ត៌មាន Washington Post និង​កាសែត Wall Street Journal នេះ​ទេ​ដែល​ថា ការ​បង្ក្រាប​មួយ​គឺ​ជាក់ច្បាស់​។​

​

យោង​តាម​របាយការណ៍​បាន​ឲ្យ​ដឹង​ថា រាប់​រយ​គ្រួសារ​​កំពុង​រស់នៅ​ក្នុង​សហរដ្ឋអាមេរិក​ ដែល​ការ​ស្នើ​សុំ​សិទ្ធិ​ជ្រកកោន​ត្រូវ​បាន​បដិសេធ​នោះ​នឹង​ត្រូវ​បាន​គេ​ប្រមូល​ផ្តុំ​ ហើយ​បញ្ជូន​ទៅ​ស្រុក​វិញ​។​

​

អ្នកនាំពាក្យ​នាយកដ្ឋាន​គយ​និង​អន្តោប្រវេសន៍​របស់​ក្រសួង​សន្តិសុខ​មាតុភូមិ Gillian Christensen បាន​ប្រាប់ AFP ថា រដ្ឋមន្ត្រី​សន្តិសុខ​មាតុភូមិ​លោក Jeh Johnson បាន​បញ្ជាក់​ថា ​ព្រំដែន​របស់​យើង​គឺ​មិន​ត្រូវ​បាន​បើក​ចំពោះ​ជនអន្តោប្រវេសន៍​ខុសច្បាប់​នោះ​ទេ​។​

​

ប្រតិបត្តិការ​បែបនេះ​អាច​នឹង​ក្លាយជា​រឿង​ចម្រូងចម្រាស​។​

​

ក្រុម​សកម្មជន​សិទ្ធិ​ជនភៀសខ្លួន​បាន​អះអាង​ថា ក្រុម​គ្រួសារ​កំពុង​ភៀសខ្លួន​ចេញពី​អំពើពុករលួយ អំពើ​ហិង្សា​ និង​គ្រោះ​រាំងស្ងួត​នៅក្នុង​ប្រទេស​កំណើត​រប​ស់​ពួកគេ​គួរតែ​ត្រូវ​បាន​ចាត់ទុកថា ​ជា​ជន​ភៀស​ខ្លួន​។​

​

នៅ​ប្រទេស អែល សាល់​វ៉ា​ឌ័​រ គឺ​មាន​រលក​នៃ​អំពើ​ហិង្សា​ក្នុងឆ្នាំនេះ​។ ចន្លោះ​ពី​ខែមករា​ដល់​ខែវិច្ឆិកា​មាន​ករណី​ឃាតកម្ម​ចំនួន ៦០៦៥ ករណី​។​ នេះ​បើ​យោង​តាម​វិទ្យាស្ថាន​វេជ្ជសាស្ត្រ​កោសល្យវិច័យ​។​

​

នៅ​ប្រទេស ហុងឌុយរ៉ាស់ មានការ​បង្ក្រាប​របស់​ប៉ូលិស​ប៉ុន្តែ​អត្រា​មនុស្សឃាត​នៅតែ​ត្រូវ​បាន​គេ​រំពឹង​ថា​ នឹង​មាន​កម្រិត​ខ្ពស់​បំផុត​មួយ​នៅ​លើ​ពិភពលោក​នៅ​ឆ្នាំនេះ​ដោយមាន​៦២​នាក់​ក្នុងចំណោម​ប្រជា​ជន ១០០ ០០០ នាក់​។​

​

ហើយ​នៅក្នុង​ប្រទេស ហ្គា​តេ​ម៉ា​ឡា មាន​ករណី​មនុស្សឃាត​ចំនួន ៥.៩២៤ ករណី​នៅក្នុង​ឆ្នាំ ២០១៤​ខណៈ​ដែល​៧០​ភាគរយ​ក្នុងករណី​ទាំងនោះ​គឺ​បណ្ដាលមកពី​ការ​ស្លាប់​ដោយ​កាំភ្លើង​។​

​

ដោយឡែក​កាលពី​ខែ​មុន ទីភ្នាក់ងារ​អាកាសធាតុ​របស់​អង្គការសហប្រជាជាតិ​បាន​ព្រមាន​ថា បាតុ​ភូត El Nino ដែល​បង្កឡើង​ដោយ​ការ​ឡើង​កម្ដៅ​ផ្ទៃ​ទឹកសមុទ្រ​នៅក្នុង​មហាសមុទ្រ​ប៉ាស៊ីហ្វិក​គឺ​មាន​ភាពអាក្រក់​បំផុត​ក្នុង​រយៈពេល​ជាង​១៥​ឆ្នាំ​មកនេះ​៕

AFP

​

សហរដ្ឋអាមេរិក​ត្រៀម​បណ្ដេញ​ជនអន្តោប្រវេសន៍​ក្នុង​ឆ្នាំ​ថ្មី​