ភ្នំពេញ ៖ ការច្រានចោល ក៍ដូចជាបដិសេធនេះ ត្រូវបានលោកឧត្ដមសេនីយ៍ ហ៊ុន ម៉ាណែត ធ្វើឡើងបន្ទាប់ពីលោកឧត្ដមសេនីយ៍ បានដឹកនាំក្រុមការងារទៅជួបប្រជាពលរដ្ឋនៅតាមបណ្ដាប្រទេសមួយការងារមួយចំនួន នៅតាមបណ្តាប្រទេសនៅប៉ែកអឺរ៉ុប ដោយបានបញ្ជាក់ថា ការចោទប្រកាន់របស់បុគ្គលទាំងនោះ មិនត្រឹមតែគ្មានមូលដ្ឋានសមហេតុផលនោះទេ ប៉ុន្តែវាជាការវាយប្រហារទៅលើឧត្ដមគតិ កិត្តិយស និងសេចក្ដីថ្លៃថ្នូររបស់ប្រជាពលរដ្ឋជាច្រើន ហើយព្រមវាយប្រហារទៅលើប្រព័ន្ធច្បាប់របស់ប្រទេសបារាំងតែម្តង។
លោកឧត្តមសេនីយ៍ ហ៊ុន ម៉ាណែត នាយរងសេនាធិការចម្រុះ មេបញ្ជាការរងកងទ័ពជើងគោក ប្រធានក្រុមការងារយុវជនក្រៅប្រទេសនៃគណបក្សប្រជាជនកម្ពុជា បានសរសេរលើផេករបស់ខ្លួនកាលពីព្រឹកថ្ងៃអាទិត្យ ទី១៣ ខែធ្នូ ថា មានការលើកឡើងជាបន្តបន្ទាប់ពីសំណាក់បុគ្គលមួយចំនួនទាក់ទងនឹងទស្សនកិច្ចរបស់ក្រុមការងារយុវជនដែលខ្ញុំបានដឹកនាំទៅកាន់ប្រទេសមួយចំនួននៅអឺរ៉ុបនាពេលថ្មីៗនេះ ដូចជាថាក្រុមការងារបានយកលុយ ៦លានដុល្លា (ខ្លះថា ៣លានដុល្លារ) ដើម្បីយកទៅទិញប្រជាជនខ្មែរនៅអឺរ៉ុប (ដោយមានការលើកឡើងថាក្រុមការងារបានផ្តល់អាហារដោយឥតគិតថ្លៃ និងផ្តល់ថវិការចំនួន៣០០ អឺរ៉ូ ដល់អ្នកចូលរួមក្នុងពិធីម្នាក់ៗ) ហើយថាលុយនោះត្រូវបានគយបារាំងចាប់ ប៉ុន្តែត្រូវឲ្យមកក្រុមការងារវិញក្រោយពីមានអន្តរាគមន៍ពីស្ថានទូតខ្មែរប្រចាំនៅប្រទេសបារាំង។
លោកឧត្តមសេនីយ៍ ហ៊ុន ម៉ាណែត បញ្ជាក់ថា “ខ្ញុំសូមឆ្លើយតបបន្តិចទៅនឹងការលើកឡើងនេះ ក្នុងគោលបំណងការពារនូវកិត្តិយស និងសេចក្តីថ្លៃថ្នូររបស់បងប្អូនប្រជាពលរដ្ឋខ្មែររាប់ពាន់នាក់ ដែលកំពុងរស់នៅតាមបណ្តាប្រទេសនានាក្នុងសហគមអឺរ៉ុប ដែលបានចូលរួមជួបជុំគ្នាជាមួយក្រុមការងារយើងក្នុងលក្ខណៈជាមហាគ្រួសារខ្មែរ ព្រោះថាការចោទប្រកាន់របស់បុគ្គលទាំងនោះមិនត្រឹមតែគ្មានមូលដ្ឋានសមហេតុផលនោះទេ ប៉ុន្តែវាជាការវាយប្រហារទៅលើឧត្តមគតិ កិត្តិយស និងសេចក្ដីថ្លៃថ្នូររបស់ប្រជាពលរដ្ឋជាច្រើន ហើយព្រមវាយប្រហារទៅលើប្រព័ន្ធច្បាប់របស់ប្រទេសបារាំងតែម្តង។ ខ្ញុំនិងក្រុមការងារមានមោទនភាពយ៉ាងខ្លាំងចំពោះស្មារតីសាមគ្គីភាព ស្រលាញ់គ្នា ជួយគ្នាមិនរើសអើងក្នុងនាមជាជាតិខ្មែរតែមួយ របស់លោកអ៊ុំ ពូ មីង បងប្អូននៅតាមតំបន់នានានៃប្រទេសបារាំង ប៊ែលហ្សីក អាល្លឺម៉ង់ និងស្វីស និងសូមអរគុណចំពោះការស្វាគមន៍យ៉ាងកក់ក្តៅដល់ក្រុមការងាររបស់យើងខ្ញុំ។ បងប្អូនបានស្ម័គ្រចិត្តចំណាយពេលវេលានិងថវិកាផ្ទាល់ខ្លួនធ្វើដំណើរពីទីជិត ឆ្ងាយ (មានរហូតដល់បើករថយន្តជាង ៨០០គីឡូម៉ែតនិងឆ្លងប្រទេស) មកចូលរួមក្នុងកម្មវិធីជួបជុំ ដើម្បីបង្ហាញពីទឹកចិត្តសាមគ្គីគ្នា ស្រលាញ់គ្នាក្នុងនាមជាគ្រួសារខ្មែរតែមួយ ឈាមជ័រជាខ្មែរដូចគ្នា និងដើម្បីបានទទួលពត៌មានពីការវិវឌ្ឍន៍របស់ប្រទេសជាតិយើង។ ស្មារតីបែបនេះគួរតែជាមោទនៈភាពរបស់យើងទាំងអស់គ្នានិងគួរអបអរសាទរក្នុងនាមជាខ្មែរ ទោះជាអ្នកប្រកាន់និន្នាកាណាក៍ដោយ មិនគួរមើលងាយនូវទឹកចិត្តធំធេងរបស់បងប្អូនទេ ហើយការចោទថាក្រុមការងារយកលុយទៅទិញទឹកចិត្តរបស់ប្រជាជនខ្មែរនៅអឺរ៉ុប នោះជាការប្រមាថមាក់ងាយដល់កិត្តិយសនិងសេចក្តីថ្លៃថ្នូររបស់ប្រជាពលរដ្ឋខ្មែរដែលរស់នៅទីនោះធ្ងន់ណាស់ដែលគិតថា ឧត្តមគតិរបស់គាត់អាចយកលុយទៅទិញបាន”។
ចំពោះការលើកឡើងដែលថាលុយ៦ លានដុល្លារ (ខ្លះថា ៣លានដុល្លារ) ក្រុមការងារបានយកដើម្បីយកទៅទិញប្រជាជនខ្មែរនៅអឺរ៉ុប ហើយថាលុយនោះត្រូវបានគយបារាំងចាប់ ប៉ុន្តែត្រូវអោយមកក្រុមការងារវិញក្រោយពីមានអន្តរាគមន៍ពីស្ថានទូតខ្មែរប្រចាំនៅប្រទេសបារាំងនោះ និយាយអោយខ្លីគឺជាការប្រមាថទៅដល់ច្បាប់ និងអាជ្ញាធរអនុវត្តន៍ច្បាប់របស់ប្រទេសបារាំងតែម្តង ព្រោះថាបារាំងមិនអនុញ្ញាតអោយជនណាម្នាក់ដឹកលុយរាប់លានដុល្លារចូលទៅក្នុងប្រទេសគេដោយងាយនោះទេ។ ដូច្នេះសូមអស់លោកដែលបានបង្កើតពត៌មានគ្មានមូលដ្ឋានពិចារណាឡើងវិញថា ទោះជាគោលដៅរបស់អស់លោកចង់វាយប្រហារមកលើក្រុមការងារក្តី ប៉ុន្តែការវាយប្រហាររបស់អស់លោកគឺប៉ះពាល់ដល់ប្រជាពលរដ្ឋខ្មែររាប់ពាន់នាក់ដែលរស់នៅអឺរ៉ុប ព្រមទាំងប្រព័ន្ធច្បាប់របស់ប្រទេសបារាំងផងដែរ។
សូមបញ្ជាក់ថា ដំណើរទស្សនកិច្ចរបស់ក្រុមការងារនៅអឺរ៉ុបនោះ បានធ្វើឡើងពីថ្ងៃ២៨ វិច្ឆិកា – ៧ ខែធ្នូ ឆ្នាំ២០១៥ ហើយលោកឧត្តមសេនីយ៍ ហ៊ុន ម៉ាណែត លើកឡើងថា លោកមានមោទនភាពណាស់ចំពោះស្មារតីសាមគ្គីភាពរបស់បងប្អូនប្រជាជនខ្មែរ ដែលរស់នៅតាមបណ្តាប្រទេសនានានៃសហគមអឺរ៉ុប។ ការស្រលាញ់រាប់អានគ្នា ការជួយគ្នាក្នុងនាមជាជាតិខ្មែរតែមួយ ក៍ដូចជាការរួមរួមគ្នាថែរក្សាសាសនា អក្សរសាស្ត្រ សិល្ប: និងវប្បធម៌ជាតិ គឺជាកិច្ចការសំខាន់ណាស់សម្រាប់ជាតិ និងប្រជាជនខ្មែរយើងនៅគ្រប់ទិសទីនិងគ្រប់ជំនាន់។ ការជួបជុំគ្នាក្នុងលក្ខណ:ជាមហារគ្រួសារខ្មែរនៅតាមតំបន់មួយចំនួននៅប្រទេសបារាំង ប៊ែលហ្សិក អាល្លឺម៉ង់ និងស្វីស។
លោកឧត្តមសេនីយ៍ ហ៊ុន ម៉ាណែត លើកឡើងទៀតថា “ខ្មែរបែកបាក់ ខ្មែរខ្សោយ។ ខ្មែរសាមគ្គី ខ្មែរខ្លាំង។ ប្រជាពលរដ្ឋខ្មែរគ្រប់រូបទោះជារស់នៅទីណា ក៍នៅតែជាខ្មែរ។ ដូច្នេះការស្រលាញ់រាប់អានគ្នា គោរពគ្នា យោគយល់គ្នា ជួយគ្នា និងមិនរើសអើងនឹងគ្នា រវាងខ្មែរនិងខ្មែរ ជាមូលដ្ឋានគ្រឹះនៃកម្លាំងរបស់ជាតិខ្មែរយើង”៕
លោកឧត្ដមសេនីយ៍ ហ៊ុន ម៉ាណែត ច្រានចោលព័ត៌មានដែលថា បានយកលុយទៅទិញទឹកចិត្តប្រជាពលរដ្ឋនៅអឺរ៉ុប
0 Comments