ភ្នំពេញ ៖ ចាប់តាំងពីឆ្នាំ២០០៣មក សហភាពអឺរ៉ុបតាមរយៈប្រតិភូអឺរ៉ុបប្រចាំកម្ពុជាបានផ្ដល់ទឹកប្រាក់ប្រមាណ២៧លានអឺរ៉ូ ដើម្បីគាំទ្រដល់គម្រោងនានា ក្នុងផ្នែកលើកកម្ពស់ ការពារសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋនៅក្នុងប្រទេសកម្ពុជា ដែលផ្ដោតសំខាន់លើសិទ្ធិជនជាតិដើមភាគតិច សិទ្ធិកាន់កាប់ដីធ្លី ការបោះឆ្នោត ការចូលរួមរបស់ស្ត្រីក្នុងឆាកនយោបាយ សេរីភាព ក្នុងការបញ្ចេញមតិ ប្រព័ន្ធផ្សព្វផ្សាយឯករាជ្យ យុត្តិធម៌ អនីតិជន និងការជួញដូរមនុស្ស។ បន្ថែមលើនេះទៀត សហភាពអឺរ៉ុបបានរួមចំណែកផ្ដល់កញ្ចប់ថវិកា ១៧.៥លានអឺរ៉ូ ដល់អង្គការមិនមែនរដ្ឋាភិបាលក្នុងស្រុក និងអន្តរជាតិ ព្រមទាំងអាជ្ញាធរមូលដ្ឋាន ដើម្បីពង្រឹងសមត្ថភាពរដ្ឋបាលថ្នាក់ក្រោមជាតិក្នុងការផ្ដល់សេវាដល់ប្រជាពលរដ្ឋកម្ពុជា។
បើតាមការឲ្យដឹងនៅក្នុងសន្និសីទសារព័ត៌មាន ស្ដីពីទិវាសិទ្ធិមនុស្សសកល កាលពីល្ងាចថ្ងៃទី១០ ខែធ្នូ ឆ្នាំ២០១៥ នៅស្ថានទូតអឺរ៉ុបប្រចាំកម្ពុជា ដែលសន្និសីទនេះបានប្រព្រឹត្តទៅក្រោមវត្តមានលោក George EDGAR ឯកអគ្គរដ្ឋទូតសហភាពអឺរ៉ុបប្រចាំកម្ពុជា។
ឯកអគ្គរដ្ឋទូតរូបនេះបានអះអាងថា បញ្ហាសិទ្ធិមនុស្សជាមូលដ្ឋានសំខាន់បំផុតសម្រាប់ប្រទេសលទ្ធិប្រជាធិបតេយ្យ និងនីតិរដ្ឋ។ លោកបន្ថែមថា ការការពារ និងលើកកម្ពស់សិទ្ធិមនុស្សនៅលើពិភពលោកគឺជាគុណតម្លៃស្នូលរបស់សហភាពអឺរ៉ុប ក៏ដូចជាលទ្ធិប្រជាធិបតេយ្យ និងនីតិរដ្ឋផងដែរ។
សហភាពអឺរ៉ុបប្ដេជ្ញាចិត្តយ៉ាងមុតមាំក្នុងការដាក់បញ្ចូលសេរីភាព ការបង្កើតសមាគម ការបញ្ចេញមតិ និងបញ្ហាសិទ្ធិមនុស្សនានា ទៅក្នុងចំណុចស្នួលនៃគោលនយោបាយ និងសកម្មភាពទាំងអស់របស់សហភាពអឺរ៉ុប ដើម្បីលទ្ធិប្រជាធិបតេយ្យ នីតិរដ្ឋ សន្តិភាព ស្ថិរភាព ការអភិវឌ្ឍរួមប្រកបដោយនិរន្តភាព ព្រមទាំងការចូលរួមរបស់ពលរដ្ឋ នៅក្នុងកិច្ចការសាធារណៈផងដែរ”។
សូមបញ្ជាក់ថា សម្រាប់សិទ្ធិមនុស្សអន្តរជាតិក្នុងឆ្នាំនេះ អង្គការសហប្រជាជាតិចាប់ផ្តើមប្រារព្ធពិធីពេញមួយឆ្នាំ សម្រាប់ខួបលើកទី៥០ នៃកតិកាសញ្ញាអន្តរជាតិស្ដីពីសិទ្ធិពលរដ្ឋ និងនយោបាយ(ICCPR) និងកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គមកិច្ច និងវប្បធម៌(ICESCR) ដែលបានចុះហត្ថលេខាកាលពីឆ្នាំ១៩៩៦។ កតិកាសញ្ញាដ៏សំខាន់ទាំងពីនេះ បានកំណត់សិទ្ធិពលរដ្ឋ នយោបាយ សេដ្ឋកិច្ច វប្បធម៌ និងសង្គម ដែលមនុស្សជាតិមានតាំងពីកំណើត និងអស់មួយជីវិត ព្រមទាំងបានផ្លាស់ប្ដូរជោគវាសនារបស់មនុស្សជាច្រើនផងដែរ៕
សហភាពអឺរ៉ុប បានផ្តល់ទឹកប្រាក់ឲ្យកម្ពុជា ប្រមាណ៤៤.៥លានអឺរ៉ូ
0 Comments