*សំណាង ឌីណា ជួប ឯម សុធី
ឈិន ក្វាន់ង៉ុយ អ្នកប្រដាល់ក្លិបម្កុដរាជសីហ៍ត្រូវឡើងប្រកួតទូទាត់បំណុលជាមួយ នេន វណ្ណា អ្នកប្រដាល់ក្លិបខ្លារខិនមានរិទ្ធនាល្ងាចថ្ងៃអាទិត្យ ទី០៦ ខែធ្នូ ឆ្នាំ២០១៥នេះ នៅលើសង្វៀនបាយ័នបឹងស្នោ។
ពីរនាក់នេះ ធ្លាប់ជួបគ្នាពីរដងតាំងពីចុងឆ្នាំ២០១២ម្ល៉េះ ដោយវាយឈ្នះចាញ់គ្នាដោយពិន្ទុម្ដងម្នាក់។ សម្រាប់ការជួបគ្នាលើកទី៣នេះ ពុំដឹងថា នរណាជាអ្នកឈ្នះនោះទេ?។
ក្វាន់ង៉ុយ ជាអ្នកប្រដាល់ស្រករក្រោយ នេន វណ្ណា ទេ តែគេពុំមែនជាអ្នកប្រដាល់ដែលខ្សោយនោះឡើយ។ ពីមុនគេអាចថា ក្វាន់ង៉ុយ អន់ខ្សោយមែន ប៉ុន្តែសម្រាប់បច្ចុប្បន្នគឺវាខុសគ្នាឆ្ងាយខ្លាំងណាស់ ដោយ ក្វាន់ង៉ុយ សម្រាប់ការប្រកួតជាមួយអ្នកប្រដាល់រួមជាតិដូចគ្នា ដូចជាគ្មាននរណាអាចយកឈ្នះលើរូបគេបាននោះឡើយ។ មានតែអ្នកប្រដាល់ថៃប៉ុណ្ណោះ ដែលម្តងម្កាលបានវាយឈ្នះគេនោះ ។
អ្នកប្រដាល់ទាំងពីរនាក់នេះ ជាម្ចាស់ខ្សែក្រវាត់ដូចគ្នា។ ពួកគេទាំងពីរមានកម្ពស់ខ្ពស់ប្រហាក់ប្រហែលគ្នាទេ តែកម្លាំងកាយសម្បទាមានការខុសគ្នា ដោយ ក្វាន់ង៉ុយ រាងខ្លាំងជាង ហើយសម្រាប់បច្ចេកទេសប្រកួតវិញ ក៏គេលើ នេន វណ្ណា ដែរ ។
ឈិន ក្វាន់ង៉ុយ ទើបតែប្រកួតឈ្នះ ម៉ន ចៅក្របី អ្នកប្រដាល់ក្លិបការិយាល័យទី៥ កងទ័ពជើងគោកដោយពិន្ទុ។ និយាយរួម ក្វាន់ង៉ុយ វាយល្អ និងស៊ូក្នុងការប្រកួត ហើយមានផ្លែល្អទៀតផង។
នេន វណ្ណា គេក៏មានស្នៀតកែង និងជង្គង់ល្អដែរ តែរាងអន់កម្លាំងក្នុងការចាប់ដៃគូប្រកួតមិនជាប់ ដើម្បីប្រើជង្គង់នោះ។ ការប្រកួតចុងក្រោយរបស់នេន វណ្ណ គឺវាយឈ្នះ ឯម សាវឿន អ្នកប្រដាល់ក្លិបឫទ្ធីពោធិសែនជ័យក្នុងទឹកទី២។ ចាំមើល តើនេន វណ្ណា អាចយកឈ្នះ ឈិន ក្វាន់ង៉ុយ បានឬអត់នោះ ?។
ឯម សុធី អ្នកប្រដាល់ក្លិបឫទ្ធីពោធិសែនជ័យនឹងត្រូវជួបប្រកួតជម្រះបញ្ជីជាមួយ សំណាង ឌីណា អ្នកប្រដាល់ក្លិបដួងសែនសុខគុនខ្មែរ។ ពួកគេពីរនាក់នេះ ធ្លាប់ប៉ះគ្នាចំនួនបីដងពីមុនមក។ ក្នុងការជួបគ្នាបីលើកនេះ សុធី វាយឈ្នះ ឌីណា បានតែម្តងប៉ុណ្ណោះ ឯពីរលើកទៀតគឺចាញ់ ឌីណា។
សំណាង ឌីណា ជាអ្នកប្រដាល់ដែលមានចិត្តប្រដាល់ធំ។ ហ៊ានប្ដូរកណ្ដាប់ដៃ និងកែងជាមួយគូប្រកួត។ ដូច្នេះប៉ះជាមួយ ឯម សុធី គឺត្រូវគ្នាតែម្តង ព្រោះ សុធី ក៏មានចិត្តប្រដាល់ធំដែរ។ ទោះជាយ៉ាងណា គូនេះគេមានជំនឿចិត្តថា ឯម សុធី នឹងអាចឈ្នះ ឌីណា ព្រោះពេលនេះ សុធី គេល្អ និងខ្លាំងជាង ឌីណា។
ការប្រកួតចុងក្រោយរបស់ សំណាង ឌីណា គឺគេវាយចាញ់ ផាន ផាត់ យុទ្ធ អ្នកប្រដាល់ក្លិបសាលវ័ន្តកីឡាក្នុងទឹកទី៤ ឯការប្រកួតចុងក្រោយរបស់ ឯម សុធី វិញ គឺវាយចាញ់ សុខ ធី អ្នកប្រដាល់ក្លិបសានសៅយ៉ាន់នាគាដោយពិន្ទុ។
ចាន់ ឆាយម៉ៅ អ្នកប្រដាល់ក្លិបនិរោធមានជ័យត្រូវគេផ្គូឲ្យជួបប្រកួតជាមួយ កង មករា អ្នកប្រដាល់ក្លិបកងពលតូចទ័ពឆ័ត្រយោង៩១១ ដោយជួបគ្នាក្នុងទម្ងន់៦៣,៥០០គីឡូក្រាម។ ពីរនាក់នេះ ពុំធ្លាប់ដែលជួបគ្នាទេកន្លងមក។
ឆាយម៉ៅ គេប្រកួតមិនសូវទៀងទាត់ទេ ជួនល្អ ជួបអន់ ហើយភាគច្រើនវាយចាញ់គេថែមទៀត។ តាមកម្លាំងកាយសម្បទារបស់គេ គឺល្អ និងខ្លាំង គ្រាន់តែវាយមិនសូវច្បាស់ប៉ុណ្ណោះ។
ការប្រកួតលើកចុងក្រោយរបស់អ្នកប្រដាល់ទាំងពីរនាក់នេះ គឺ ឆាយម៉ៅ វាយចាញ់ ហួន សុខនីម អ្នកប្រដាល់ក្លិបមហិទ្ធិរិទ្ធតាដំបងដែកក្នុងទឹកទី៤ ឯ កង មករា វាយចាញ់ ប៉ូ វណ្ណស័ក្ត អ្នកប្រដាល់ក្លិបគីសែមានរិទ្ធក្នុងទឹកទី៣។
ទោះជាយ៉ាងណា សម្រាប់ការជួបគ្នាលើកនេះ ពុំដឹងថា ឆាយម៉ៅ ឬ កងមករា ឈ្នះនោះទេ?។
គង់ ហ៊ូវ អ្នកប្រដាល់ក្លិបកងពលធមអន្តរាគមន៍លេខ២ ត្រូវជួបប្រកួតជាមួយ ចាន់ គឹមលន់ អ្នកប្រដាល់ក្លិបនិរោធមានជ័យ ដោយប្រកួតគ្នាក្នុងទម្ងន់៥៧គីឡូក្រាម។ រវាងពីរនាក់នេះ បើតាមសន្និដ្ឋាននោះ ចាន់ គឹមលន់ ប្រហែលជាមិនឈ្នះ គង់ ហ៊ូវ នោះទេ។
ចាន់ គឹមលន់ ប្រកួតចុងក្រោយនេះ វាយចាញ់ បឺត សង្ឃឹម ក្លិបរ៉ាហាប់ស្វាយប៉ាកក្នុងទឹកទី៣ ខណៈដែល គង់ ហ៊ូវ គេបានផ្ដួល ងួន គា ក្លិបតាឡីដំរីមានរិទ្ធក្នុងទឹកទី៣ដែរ៕
ឈិន ក្វាន់ង៉ុយ ជួបទូទាត់បំណុលជាមួយ នេន វណ្ណា លើសង្វៀនបឹងស្នោ
0 Comments