អ្នកប្រដាល់ ផង់ សុភ័ស្ស ក្លិបតាឡីដំរីមានរិទ្ធ ត្រូវបានគេផ្គូអោយជួបប្រកួតជាមួយ ហួន សុខនីម អ្នកប្រដាល់ក្លិបមហិទ្ធរិទ្ធតាដំបងដែក នាល្ងាចថ្ងៃសុក្រុទី០១មករា២០១៦នេះ នៅលើសង្វៀនបាយ័នស្ទឹងមានជ័យ។
ហួន សុខនីម បាត់មុខមួយរយៈយូរ បន្ទាប់ពីគេវាយឈ្នះកន ចន្ថា អ្នកប្រដាល់ក្លិបក្រសួងការពារជាតិក្នុងទឹកទី៤ កាលពីថ្ងៃទី៣១ មីនា ២០១២កន្លងមកនោះ ហើយបានវិលត្រឡប់មកសង្វៀនវិញ នាថ្ងៃទី២៥តុលា២០១៥ ។តាំងពីវិលមកសង្វៀនវិញនេះ គេឡើងប្រកួតបាន៤លើកហើយ ដោយវាយឈ្នះ៣លើកនិងចាញ់១លើក ។ ការប្រកួតលើកចុងក្រោយនេះ(២៥ធ្នូ២០១៥)គេ វាយឈ្នះផាន ចំណាន អ្នកប្រដាល់ក្លិបរាជសីហ៍ខេត្តរតនគិរីដោយពិន្ទុ ។
សុខនីមជាអ្នកប្រដាល់ស្រករមុនផង់ សុភ័ស្ស តែគេមិនមានឈ្មោះល្បីនោះឡើយ ។ តាមក្បាច់គុនដែលគេបញ្ចេញលើសង្វៀនកន្លងមក ឃើញថាល្អគ្រាន់បើដែរ ហើយចិត្តប្រដាល់ធំ ទើបអាចវាយឈ្នះលើគូប្រកួតនោះ។
ផង់ សុភ័ស្ស មិនជាខ្លាំងដែរ តែអ្នកប្រដាល់រូបនេះ មានចិត្តធំណាស់ មិនថាតែពេល មានប្រៀបលើគេទេ បើប៉ះដៃគូខ្លាំងគេក៏ហ៊ានវាយប្តូរ ដើម្បីប្តូរយកជ័យជំនះបានមកវិញដែរ ។ គេធ្លាប់ប្រកួតជាមួយថៃកន្លងមក ទោះបីជាមិនឈ្នះ តែគេវាយបាន៥ទឹកពេញ ដែលបញ្ជាក់ថា ក្រៅពីចិត្តធំសុភ័ស្សមានកម្លាំងស៊ុហ្វរឹងមាំថែមទៀត ។ គេប្រកួតចុងក្រោយ វាយ ចាញ់អ្នកប្រដាល់ថៃA Nouk Vath ដោយពិន្ទុ។
ទោះជាយ៉ាងណា សម្រាប់ការជួបគ្នារវាងផង់ សុភ័ស្ស និង ហួន សុខនីមនេះ មិនមាននរណាហ៊ានទាយមុនថា អ្នកណាឈ្នះ អ្នកណាចាញ់នោះឡើយ។ ព្រំ វី អ្នកប្រដាល់ជើងចាស់ក្លិបខ្លារខិនមានរិទ្ធ ត្រូវគេផ្គូផ្គងអោយជួបប្រកួតជាមួយម៉ន ភីរម្យ អ្នកប្រដាល់ក្លិបការិយាល័យទី៥ កងទ័ពជើងគោក ដោយប្រកួតគ្នាក្នុងប្រភេទទម្ងន់៥៧គីឡូក្រាម។
ភីរម្យ គេជាអ្នកប្រដាល់ស្រករក្រោយ ឯព្រំ វីគេជាអ្នកប្រដាល់ស្រករមុន ។ ទោះជាបែបនេះក្តី អ្នកប្រដាល់ទាំងពីរនាក់នេះ ធ្លាប់ប៉ះគ្នាពីរលើកហើយកន្លងមក ដោយព្រំ វី វាយចាញ់ម៉ន ភីរម្យដោយពិន្ទុទាំង២លើក។
ទោះជាយ៉ាងណា សម្រាប់ការជួបគ្នាលើកនេះ គេពិបាកនឹងទាយថា អ្នកណាឈ្នះ អ្នកណាចាញ់នោះដែរ ព្រោះថាព្រំ វី ថ្វីត្បិតតែជាអ្នកប្រដាល់ជើងចាស់ តែព្រំ វី រាល់លើកដែលជួបប្រកួតជាមួយត្រកូលម៉ន(ម៉ន ភីរម្យនិងម៉ន រដ្ឋា) គឺពុំដែល ឈ្នះនោះទេ គឺចាញ់ពិន្ទុទាំងរាល់លើក ។ គេឡើងប្រកួតចុងក្រោយ ជួបជាមួយម៉ន ភីរម្យ (ថ្ងៃទី២០ធ្នូ២០១៥) ដោយវាយចាញ់ភីរម្យដោយពិន្ទុ ។
ទោះជាយ៉ាងនេះក្តី សំរាប់ការឡើងប្រកួតលើកនេះ ក្រុមអ្នកវិភាគប្រដាល់គេនៅតែពុំមានជំនឿទុកចិត្តលើព្រំ វី ថាអាចវាយឈ្នះលើម៉ន ភីរម្យដែរ ។ ដូច្នេះ ចាំមើលតើការប្រកួតលើកនេហ ព្រំ វី អាចសងសឹកម៉ន ភីរម្យ បានឬអត់?។
អ្នកប្រដាល់ក្មេងស្រករក្រោយ ចាន់ សាន់ ក្លិបនិរោធមានជ័យ នឹងជួបប្រកួតជាមួយ សិទ្ធី ស័ក្ត អ្នកប្រដាល់ក្លិបរស្មីកុមារកំព្រា ។ ពីរនាក់នេះ ប្រកួតគ្នាក្នុងទម្ងន់៥៤គីឡូក្រាម ។ ចាន់ សាន់ ធ្លាប់ជួបជាមួយសិទ្ធី ស័ក្ត ម្តងហើយកាលពីថ្ងៃទី០៦ធ្នូ២០១៥កន្លងមក ដោយវាយចាញ់សិទ្ធី ស័ក្តដោយពិន្ទុ ។
អ្នកប្រដាល់វ័យក្មេងចាន់ សាន់នេះ គេវាយមិនដកដៃទេ ដោយអាងមានកម្លាំងស៊ុហ្វខ្លាំង តែយ៉ាងណាជួបរិទ្ធី ស័ក្ត ប្រហែលជាពិបាកឈ្នះហើយ ព្រោះសិទ្ធី គេក៏វាយខ្លាំងនិងមានល្បិចកលក្នុងការប្រកួតច្រើនដែរ ។
ការប្រកួតចុងក្រោយនេះ ចាន់ សាន់ វាយចាញ់ម៉ន វ៉ាន្នី អ្នកប្រដាល់ក្លិបការិយាល័យទី៥ កងទ័ពជើងគោកដោយពិន្ទុ ហើយរិទ្ធី ស័ក្ត ប្រកួតលើកចុងក្រោយ វាយឯម ខ្លឹមសរ អ្នកប្រដាល់ក្លិបនិរោធមានជ័យដោយពិន្ទុ ។ចាំមើល ចាន់ សាន់ គេអាចសងសឹកយកឈ្នះម៉ន ភីរម្យ បានឬអត់ ? ។
ឈិត សេរីវណ្ណថន អ្នកប្រដាល់ក្លិបរាហ៊ូកីឡា ត្រូវជួបប្រកួតជាមួយខុន សីហា អ្នកប្រដាល់កុមារទេពមានរិទ្ធ ក្នុងទម្ងន់៥១គីឡូក្រាម ខណះដែលសេង ឆ្លូញ ក្លិបកងពលតូចទ័ពឆ័ត្រយោង៩១១ នឹងជួបបប្រកួតជាមួយនី ចាន់រ៉ា៕
ផង់ សុភ័ស្ស ជួប ហួន សុខនីម លើសង្វៀនស្ទឹងមានជ័យ ព្រំ វី ឡើងសងសឹក ម៉ន ភីរម្យ
0 Comments