ក្រសួងហិរញ្ញវត្ថុរុស្ស៊ីបាននិយាយថា រុស្ស៊ីបានប្ដេជ្ញាថា នឹងដាក់បណ្ដឹងប្រទេសអ៊ុយក្រែន ប្រសិនបើក្រុងគៀវមិនបានសងប្រាក់បំណុលរបស់ខ្លួន មកឲ្យក្រុងមូស្គូនៅថ្ងៃទី ២០ ខែធ្នូទេនោះ និងបានបន្ថែមថា អាមេរិកបានបដិសេធជាផ្លូវការថា នឹងមិនផ្ដល់ការធានាហិរញ្ញវត្ថុសម្រាប់បំណុលរបស់អ៊ុយក្រែននោះទេ។
ក្រសួងហិរញ្ញវត្ថុរុស្ស៊ីបាននិយាយនៅក្នុងសេចក្ដីថ្លែងការណ៍មួយថា នៅសប្ដាហ៍នេះយើងបានទទួលនូវការបដិសេធជាផ្លូវការពីរដ្ឋាភិបាលអាមេរិក ក្នុងការផ្ដល់ការធានាចំពោះកាតព្វកិច្ចរបស់ប្រទេសអ៊ុយក្រែន។ ហេតុដូច្នេះ យើងមិនមានជម្រើសណាផ្សេងក្រៅពីចាត់វិធានការតាមផ្លូវច្បាប់ប្រឆាំងនឹងប្រទេសអ៊ុយក្រែន នៅក្នុងករណី ដែលអ្នកខ្ចីប្រាក់នេះមិនបានបំពេញកាតព្វកិច្ចឥណទានរបស់ខ្លួនឲ្យបានពេញលេញ នៅមុនថ្ងៃទី ២០ ខែធ្នូនោះទេ។ ទីភ្នាក់ងារព័ត៌មានTASS បានរាយការណ៍ដូច្នេះ។
បំណុលខ្ពស់បំផុតរបស់អ៊ុយក្រែនចំពោះរុស្ស៊ី នៅពេលបច្ចុប្បន្នឈរនៅក្នុងចំនួន ៣ ពាន់លានដុល្លារ។ បំណុលនេះបានកើតមានឡើង ដោយសារកិច្ចព្រមព្រៀងមួយរវាង ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងអតីតប្រធានាធិបតី អ៊ុយក្រែន លោក វិចទ័រ យ៉ានូកូវិច ដែលបានចុះហត្ថលេខានៅក្នុងឆ្នាំ ២០១៣ និងគិតថា ក្រុងមូស្គូនឹងទិញមូលបត្របំណុលអ៊ុយក្រែនតម្លៃ ១៥ ពាន់លានដុល្លារ។ ប្រទេសរុស្ស៊ីបានទិញមូលបត្របំណុលតម្លៃ ៣ ពាន់លានដុល្លារនៅថ្ងៃទី ២០ ខែធ្នូ ឆ្នាំ ២០១៣ ហើយបំណុលនេះត្រូវបានសន្មតថា នឹងសងវិញនៅថ្ងៃទី ២០ ខែធ្នូ ឆ្នាំ ២០១៥ ។
នាយករដ្ឋមន្ដ្រី អ៊ុយក្រែន លោក អាសេ នីយ៉ាតសេនីយុក បាននិយាយដដែលៗថា អ៊ុយក្រែននឹងមិនសងបំណុលរបស់ខ្លួនទៅឲ្យក្រុងមូស្គូនោះទេ ប្រសិនបើគ្មានការរៀបចំរចនាសម្ព័ន្ធហិរញ្ញវត្ថុឡើងវិញទេនោះ។
នៅក្នុងកិច្ចប្រជុំកំពូលរបស់ G20 នៅ Antalya ប្រទេសទួរគី លោក វ្ល៉ាឌីមៀរ ពូទីន បានប្រកាសនូវសំណើមួយដើម្បីរៀបចំរចនាសម្ព័ន្ធបំណុលរបស់អ៊ុយក្រែនឡើងវិញ ដោយអនុញ្ញាតឲ្យអ៊ុយក្រែនសងប្រាក់វិញចំនួន ១ ពាន់លានដុល្លារក្នុងមួយឆ្នាំ នៅក្នុងរយៈពេល ៣ ឆ្នាំ ចាប់ពីឆ្នាំ ២០១៦ ដល់ឆ្នាំ ២០១៨ ប្រសិនបើអាមេរិក សហភាពអឺរ៉ុប ឬក៏ស្ថាប័នអន្ដរជាតិថ្នាក់ទី ១ នឹងផ្ដល់ការធានាចំពោះប្រទេសអ៊ុយក្រែន។
ប្រទេសរុស្ស៊ីបានសង្កត់ធ្ងន់ដដែលៗថា លក្ខខណ្ឌដែលបានស្នើឡើងនេះ គឺមានលក្ខណៈល្អជាងលក្ខខណ្ឌ ដែលបានចែងដោយអង្គការមូលនិធិរូបិយវត្ថុអន្ដរជាតិ(IMF) និងបានបន្ថែមថា សេចក្ដីសម្រេចមួយទាក់ទងនឹងសំណើនេះត្រូវតែបានប្រកាន់យកឲ្យបានឆាប់ តាមដែលអាចធ្វើទៅបាន។ យ៉ាងណាក៏ដោយ ក៏ប្រទេសរុស្ស៊ីមិនបានទទួលនូវចម្លើយផ្លូវការចំពោះសំណើរបស់ខ្លួនពីក្រុងគៀវនោះទេ។ អនុរដ្ឋមន្ដ្រីក្រសួងហិរញ្ញវត្ថុរុស្ស៊ី លោក Sergey Storchak បាននិយាយនៅ ថ្ងៃទី ០១ ខែធ្នូ និងបានបន្ថែមថា រុស្ស៊ីនៅតែមានក្ដីសង្ឃឹមថា នឹងទទួលបានចម្លើយមួយ នៅថ្ងៃទី ០៨ ខែធ្នូ។
លោក Storchak បានថ្លែងដូច្នេះ ហើយត្រូវបាន TASS ដកស្រង់មកនិយាយថា យើងមានបំណងដើម្បីសម្រេចបាននូវកិច្ចព្រមព្រៀងមួយ នៅមុនថ្ងៃទី ០៨ ខែធ្នូ ដោយសារនៅថ្ងៃទី ០៨ ខែធ្នូ IMF នឹងបោះឆ្នោតស្ដីអំពីការផ្លាស់ប្ដូរគោលនយោបាយរបស់ខ្លួន៕
អាមេរិកមិនធានាចំពោះបំណុលអ៊ុយក្រែន ខណៈរុស្ស៊ីនឹងប្ដឹងផ្ដល់ ប្រសិនបើក្រុងគៀវមិនសងប្រាក់នៅចុងខែធ្នូ
0 Comments