បន្ទាយមានជ័យ ៖ កម្លាំងនគរបាលក្រុងសិរីសោភ័ណមួយក្រុមនៅយប់ថ្ងៃទី៨ ខែធ្នូ ឆ្នាំ២០១៥បានចុះធ្វើការល្បាតនៅតាមដងផ្លូវ និងធ្វើការឆែកឆេររកអាវុធជាតិផ្ទុះនៅចំណុចមុខស្ថានីយប្រេងតេលា ឃាត់ខ្លួនបានជនសង្ស័យចំនួន៤នាក់ក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
ជនសង្ស័យទី១កំពុងចែកចាយគ្រឿងញៀនយ៉ាងសកម្មពេលនោះនគរបាលឃាត់ខ្លួនមានឈ្មោះឡាក់ លូវី ភេទប្រុស អាយុ៣៧ឆ្នាំ មុខរបររត់ម៉ូតូឌុប រស់នៅក្នុងភូមិអូរអំបិល សង្កាត់អូរអូរអំបិល ក្រុងសិរីសោភ័ណ ខេត្តបន្ទាយមានជ័យ រកឃើញថ្នាំប្រភេទមេតំហ្វេតាមីនអាយស៍ ម៉ាទឹកកកចំនួន៥កូនថង់តូចស្នើនឹងទម្ងន់០.៦ក្រាម។ ជនសង្ស័យទី២ឈ្មោះ ចាន់ សីហា ភេទប្រុស អាយុ៣៣ឆ្នាំអ្នកជួញដូរគ្រឿងញៀន ទី៣ឈ្មោះ ឡុង ស្រីលក្ខ័ ភេទស្រី អាយុ១៨ឆ្នាំ មុខរបររត់ម៉ូតូឌុប អ្នកប្រើប្រាស់អ្នកទាំង២រស់នៅក្នុងភូមិកំពុងស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ទី៤ឈ្មោះ សួន សត្យា ភេទស្រី អាយុ២២ឆ្នាំ មុខរបរអ្នកលេងក្នុងតន្ត្រីអ្នកប្រើប្រាស់រស់នៅក្នុងភូមិ៣សង្កាត់ព្រះពន្លា ក្រុងសីរីសោភ័ណ ខេត្តបន្ទាយមានជ័យ ដកហូតបានវត្ថុតាងគ្រឿងញៀនមេតំហ្វេតាមីន គ្រាប់ពណ៌ក្រហម ចំនួន៩គ្រាប់។
នគរបាលក្រុងសិរីសោភ័ណបានបញ្ជាក់ទៀតថា ក្រោមការបញ្ជាផ្ទាល់ពីសំណាក់លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យលោកបានដាក់ផែនការឲ្យកម្លាំងនគរបាលទាំងជំនាញ និងមូលដ្ឋានបន្តការស្រាវជ្រាវ និងល្បាតទាំងយប់ទាំងថ្ងៃ ដើម្បីតាមចាប់មុខសញ្ញាចែកចាយ និងប្រើប្រាស់គ្រឿងញៀនក្នុងមូលដ្ឋានយកមកផ្ដន្ទាទោសតាមច្បាប់ឲ្យទាល់តែអស់។
លោកបានបន្តថា ជនសង្ស័យទាំង៤នាក់បានឆ្លើយសារភាពប្រហាក់ប្រហែលគ្នាថា ទាំង៤នាក់បាននាំគ្នាជក់ និងលក់គ្រឿងញៀននេះមានរយៈពេលជាយូរខែកន្លងមកហើយ ពេលទិញជក់ម្តងៗចំណាយលុយអស់៣០០បាទ ដែលខ្លួនបានមកពីធ្វើការផ្សេងៗ ដោយមានចម្លើយសារភាព និងមានវត្ថុតាងផងនោះនគរបាលក្រុងសិរីសោភ័ណបានកសាងសំណុំរឿងជនសង្ស័យទាំង៤នាក់បញ្ជូនទៅតុលាការដាក់ទោសតែម្តង៕
ឃាត់ខ្លួនជនសង្ស័យ៤នាក់ ពាក់ព័ន្ធករណីគ្រឿងញៀន
0 Comments