ក្រចេះ ៖ ករណីពុលស្រា.សសម្លាប់មនុស្ស៣នាក់នៅស្រុកសំបូរ, ករណីពុលស្រា.សនៅស្រុកស្នួលសម្លាប់មនុស្សដល់ទៅ៨នាក់ សមត្ថកិច្ចមិនទាន់ស្រាវជ្រាវរកមុខសញ្ញាអ្នកបង្កមកផ្ដន្ទាទោសផង ស្រាប់តែនៅថ្ងៃទី១០ ខែធ្នូ ឆ្នាំ២០១៥ នៅចំណុចអូរប៉ូ ភូមិព្រែកតាអាំ ឃុំបុសលាវ និងភូមិស្រែតាហេន ឃុំសំបុក ស្រុកចិត្របុរី មានករណីផ្ទុះរឿងប្រជាពលរដ្ឋពុលស្រា.សបន្តបន្ទាប់ទៀត ខ្លះបញ្ជូនទៅព្យាបាលនៅភ្នំពេញ និងខ្លះមកព្យាបាលនៅមណ្ឌលសុខភាពបុសលាវ រហូតខ្លះមកព្យាបាលក្នុងមន្ទីរពេទ្យខេត្តក្រចេះដើម្បីគេចផុតពីការស្លាប់ ដោយសារឃាតកជាតិពុលក្នុងស្រា.ស។
ចំពោះករណីពុលស្រា.ស ដែលកំពុងកើតពេញបន្ទុកក្នុងខេត្តក្រចេះកាលពីពេលកន្លងមករហូតមកទល់រយៈពេលប៉ុន្មានខែចុងក្រោយនេះ ទាំងប្រជាពលរដ្ឋរងគ្រោះ និងពលរដ្ឋ ដែលទទួលរងការឈឺចាប់បាត់បង់សាច់ញាតិជាទីស្រឡាញ់ ដោយសារករណីពុលស្រា.ស បានទទូចស្នើសុំឲ្យអាជ្ញាធរមានមន្ត្រីមន្ទីរ និងសមត្ថកិច្ចជំនាញពាក់ព័ន្ធ មេត្តាតាមប្រមាញ់ស្រាវជ្រាវស្វែងរកជនបង្កក្នុងនោះមានអ្នកបើកកន្លែងបិតស្រា.សមិនមានក្រមសីលធម៌ និងអ្នកលក់ស្រា.សលួចលាយមេបន្ថែម មកផ្ដន្ទាទោសតាមផ្លូវច្បាប់ជាកំហិត។
ជាមួយនឹងការស្នើសុំខាងលើ ពួកគាត់ក៏បានលើកឡើងជាទស្សនៈថា អាជ្ញាធរមានសមត្ថកិច្ចនៅមូលដ្ឋាន និងអ្នកជាប់ពាក់ព័ន្ធដាច់ខាតមិនត្រូវទៅស៊ុមគ្រលុំជាមួយម្ចាស់សិប្បកម្មបិតស្រា.ស ឬអ្នកលក់ស្រា.ស ដែលគិតតែផលប្រយោជន៍ផ្ទាល់ខ្លួន មិនគិតពីជីវិតគ្រួសារអ្នកដទៃនោះឡើយ ជាពិសេសពេលណាសមត្ថកិច្ចស្រាវជ្រាវ និងចាប់បានភស្តុតាងគ្រប់គ្រាន់ ត្រូវតែឲ្យបុគ្គលនោះទទួលទោសតាមច្បាប់ ទើបជនរងគ្រោះសុខចិត្ត និងជឿជាក់លើចំណាត់ការរបស់អាជ្ញាធរមានសមត្ថកិច្ច។
ពលរដ្ឋដដែលលើកឡើងបន្ថែមថា កន្លងមកមនុស្សស្លាប់ ដោយសារពុលស្រា.សកើតមានច្រើនលើកច្រើនសាមកហើយ មិនមែនទើបតែកើតពេលថ្មីៗនោះឡើយ ហើយមន្ត្រីជំនាញ និងសមត្ថកិច្ចពាក់ព័ន្ធបានត្រឹមតែយកស្រា.សមកពិនិត្យឆ្លើយថា មានជាតិមេតាណុលខ្ពស់ ដោយមិនបានស្រាវជ្រាវប្រភពស្រា.សនោះបានមកពីណា បិតក្នុងលក្ខណៈបច្ចេកទេសដូចម្តេច និងចាប់ជនបង្កមកផ្ដន្ទាទោសតាមច្បាប់ ឬមួយយ៉ាងណានោះឡើយ ពោលគឺនាំគ្នាផ្អើលមួយដង្ហើមចង្រិត ក៏ស្ងប់ស្ងាត់មិនរវល់ទុករឿងស្លាប់មនុស្សជារឿងធម្មតាទៅវិញ។
គួររម្លឹកផងដែរថា ការពុលស្រា.សសម្លាប់អ្នកភូមិសម្រាប់ខេត្តក្រចេះកើតឡើង៧ករណី បង្កឲ្យមនុស្សស្លាប់២១នាក់ រីឯអ្នករងគ្រោះរាប់សិបនាក់បន្ថែមទៀត។ ក្នុងនោះស្រុកព្រែកប្រសព្វស្លាប់៦នាក់ ស្រុកស្នួល៨នាក់ ស្រុកសំបូរ៣នាក់ និងស្រុកចិត្របុរី៤នាក់ ហើយបើរាប់បញ្ចូលអ្នកពុលស្លាប់ដោយសារសាច់សត្វឆ្កែនៅស្រុកស្នួលមានរហូតទៅ២៧នាក់ឯណោះ៕
ពលរដ្ឋសំណូមពរឲ្យវែកមុខជនបង្ក ដែលបណ្ដាលឲ្យមានការពុលស្រា.សផ្ទួនៗ
0 Comments