បាត់ដំបង ៖ ជនសង្ស័យចំនួនពីរនាក់ ដែលមានជំនាញខាងបង្ហើបឃ្លុបកែបម៉ូតូលួចលុយ និងសម្ភារៈផ្សេងៗ ត្រូវបានកម្លាំងកងរាជអាវុធហត្ថស្រុកមោងឬស្សី ឃាត់ខ្លួនបានបន្ទាប់ពីជនទាំងពីរនាក់នេះបានធ្វើសកម្មភាពបង្ហើបកែបម៉ូតូលួចលុយអស់ជិត២លានរៀល ខណៈដែលម្ចាស់លុយរវល់លាងទឹកឲ្យជ្រូកមួយភ្លែតប៉ុណ្ណោះ។
ការឃាត់ខ្លួននេះគឺបានធ្វើឡើងកាលពីវេលាម៉ោង៥ល្ងាច ថ្ងៃទី២២ ខែធ្នូ ឆ្នាំ២០១៥ ត្រង់ចំណុចស្តង់សត្តឃាតមួយកន្លែង ស្ថិតក្នុងភូមិពោធិ២ ឃុំគារ ស្រុកមោងឬស្សី ខេត្តបាត់ដំបង ដោយកម្លាំងកងរាជអាវុធហត្ថស្រុកមោងឬស្សី ដឹកនាំដោយលោកអនុសេនីយ៍ឯក ហម ភ័ណ្ឌ មេបញ្ជាការរង។
គួរបញ្ជាក់ដែរថា ក្រោយពីទទួលបានពាក្យបណ្ដឹងពីជនរងគ្រោះឈ្មោះ រឿន ចន្ថា ភេទប្រុស អាយុ៤៧ឆ្នាំ រស់នៅភូមិរាមគន់ ឃុំគារ ស្រុកមោងឬស្សី បានបញ្ជាក់ថា នៅវេលាម៉ោង២និង២៥នាទី លោកបានទុកលុយនៅក្នុងឃ្លុបកែបម៉ូតូចំនួន១.៨៦០.០០០រៀល ហើយបានចតម៉ូតូចោលនៅខាងមុខស្តង់កាប់ជ្រូកនោះ ដោយលោករវល់ចូលទៅលាងទឹកឲ្យជ្រូកមួយភ្លែត ពេលត្រឡប់មកវិញក៏ស្រាប់តែបាត់លុយនោះអស់រលីងតែម្ដង។ មិនបានប៉ុន្មានម៉ោងផង ក្រោយពេលកើតហេតុ សមត្ថកិច្ចបានស្រាវជ្រាវ ព្រមទាំងបានឃាត់ខ្លួនជនសង្ស័យចំនួនពីរនាក់ ដោយទី១-ឈ្មោះ រី ចាន់រ៉ា ភេទប្រុស អាយុ២៣ឆ្នាំ រស់នៅភូមិតាតុក១ ឃុំមោង មុខរបរធ្វើស្រែ និងទី២-ឈ្មោះ សល់ សុភ័ក្ត្រ ហៅចិន ភេទប្រុស អាយុ២៤ឆ្នាំ រស់នៅភូមិបឹងទឹម ឃុំតាប៉ុន មុខរបរធ្វើស្រែដូចគ្នា។
នៅចំពោះមុខសមត្ថកិច្ច ជនសង្ស័យទាំងពីរបានសារភាពថា ពួកគេពិតជាបានបង្ហើបឃ្លុបកែបម៉ូតូ ដើម្បីលួចយកលុយនោះពិតប្រាកដមែន ដូច្នេះបច្ចុប្បន្នសមត្ថកិច្ច នៃកងរាជអាវុធហត្ថស្រុកមោងឬស្សី កំពុងរៀបចំកសាងសំណុំរឿងដើម្បីបញ្ជូនជនទាំងពីរនាក់នេះទៅតាមផ្លូវច្បាប់ហើយ៕
ឃាត់ខ្លួនជនដែលជំនាញបង្ហើបឃ្លុបកែបម៉ូតូ ដើម្បីលួចលុយ
0 Comments