បន្ទាយមានជ័យ ៖ នៅវេលាម៉ោង១០ និង ១០នាទី ថ្ងៃទី២៤ ខែធ្នូ ឆ្នាំ២០១៥ កម្លាំងសមត្ថកិច្ចប្រឆាំងបទល្មើសគ្រឿងញៀន ដែលដឹកនាំដោយ លោកចាប សុផារិទ្ធ ស្នងការរងទទួលបន្ទុកនិងលោក ថិន សុដេត នាយការិយាល័យប្រឆាំងគ្រឿងញៀន ដែលជាវេនល្បាតប្រចាំខេត្តបន្ទាយមានជ័យ បានធ្វើការឃាត់ខ្លួនយុវជនចំនួន៣នាក់ដែលសង្ស័យថា ប្រើប្រាស់និងចែកចាយគ្រឿងញៀន។
ការឃាត់ខ្លួននេះធ្វើឡើងនៅចំណុចមុខផ្លូវសាលាគរុកោសល្យ ស្ថិតក្នុងភូមិ៣ក្រុងសេរីសោភណ្ឌខេត្តបន្ទាយមានជ័យ។
បើតាមលោកចាប សុផារិទ្ធ បានឲ្យដឹងថា តាមការស្រាវជ្រាវមុខសញ្ញា ចែកចាយគ្រឿងញៀនសមត្ថកិច្ចបានឈានទៅចាប់មេខ្លោងជួញដូរនិងចែកចាយនៅក្នុងតំបន់ក្រុងសេរីសោភណ្ឌ បន្ទាប់ពីឃាត់ខ្លួនក៏ឃើញយុវជន២នាក់ទៀតបានទៅចូលក្នុងតំបន់ ដែលជាតំបន់ចែកចាយ ក៏ធ្វើការឃាត់ខ្លួនធ្វើតេស្តទឹកនោមរកសារធាតុញៀន។
ក្នុងការឃាត់ខ្លួនជនសង្ស័យដែលជាអ្នកចែកចាយគ្រឿងញៀនសមត្ថកិច្ចរកមិនឃើញថ្នាំញៀនអ្វីទេ តែជននេះគឺជាមុខសញ្ញាចាស់ដែលចែកចាយថ្នាំញៀន។
បច្ចុប្បន្នសមត្ថកិច្ចបានបញ្ជូនទៅការិយាល័យដើម្បីធ្វើតេស្តទឹកនោមយុវជនទាំងអស់ហើយនិងធ្វើការស្រាវជ្រាវមុខសញ្ញាចែកចាយ។
សូមបញ្ជាក់ផងដែរថា ខេត្តបន្ទាយមានជ័យជារៀងរាល់យប់គឺមានការល្បាតនិងការការពារតាមគោលដៅក្នុងទីរួមខេត្តបន្ទាយមានជ័យចំនួន៥ចំណុចដែលក្នុងមួយយប់យាមល្បាតពីផែននីមួយៗ មួយយប់មួយការិយាល័យ ត្រូវយាម ដែលមានកម្លាំងប៉ូលិសស្រុក កម្លាំងប៉ូលិស ក្រុង ក៏ចូលរួមយាមដែរ តាមគោលដៅរបស់ខ្លួនរៀងៗខ្លួន៕
កម្លាំងល្បាតឃាត់ខ្លួនយុវជន៣នាក់សង្ស័យប្រើប្រាស់ និង ចែកចាយគ្រឿងញៀន
0 Comments