ពេជ្រ សីហា ​និង​ផង់ សុភាព ជួប​ថៃ​នៅ​សង្វៀន​បាយ័ន​បឹង​ស្នោ​ ​

ប្រដាល់ ៖ អ្នក​ប្រដាល់​ជើង​ខ្លាំង​របស់​កម្ពុជា​២​រូប គឺ​ពេជ្រ សីហា សមាគម​កីឡា​ក្រសួងការពារជាតិ និង​ផង់ សុភាព ក្លិប​រាជ​សីហ៍​ខេត្ត​រតនគិរី ត្រូវ​ជួប​ប្រកួត​ជា​លក្ខណៈ​មិត្តភាព​អន្តរជាតិ​ជាមួយ​អ្នក​ប្រដាល់​ថៃ នា​ល្ងាច​ថ្ងៃអាទិត្យ​ ទី​២៧ ខែ​ធ្នូ ឆ្នាំ​២០១៥​នេះ នៅ​លើ​សង្វៀន​បាយ័ន​បឹង​ស្នោ។​

អ្នក​ប្រដាល់ ​ពេជ្រ សីហា ជើង​ខ្លាំង​របស់​កម្ពុជា​ដែល​មាន​បទពិសោធន៍​ជោកជាំ​ជាមួយ​ប្រដាល់​នោះ នឹង​ជួប​ជាមួយ​អ្នក​ប្រដាល់​ថៃ​ឈ្មោះ​Rarueng Lukchapachai ដោយ​ប្រកួត​ក្នុង​ទម្ងន់​៦៩​គីឡូក្រាម។ ពីរ​នាក់​នេះ​ធ្លាប់​ជួប​គ្នា​ម្តង​ហើយ​កាលពី​ថ្ងៃ​ទី​០៤ ខែ​មករា​ ឆ្នាំ​២០១៥ ដែល​ក្នុង​ការ​ជួប​គ្នា​នោះ ពួកគេ​ទាំងពីរ​ប្រកួត​ស្មើ​ពិន្ទុ​គ្នា។​

Rarueng Lukchapachai អ្នក​ប្រដាល់​ថៃ​រូប​នេះ ធ្លាប់​មក​ប្រកួត​នៅ​កម្ពុជា​ច្រើន​លើក​ហើយ ដោយ​វាយ​ឈ្នះ​ជើង​ខ្លាំង​កម្ពុជា​ជា​ច្រើន​នាក់ តែ​ចុងក្រោយ​គេ​បាក់អំនួត​ក្រោម​កណ្ដាប់​ដៃកែវ រំ​ចង់ និង​ក្រោយ​ថ្វី​ជង្គង់​និង​កែង​របស់​ឡុង សុ​ភី។

Rarueng គេ​មានប្រៀប​ខាង​កម្ពស់​តែម្ដង​ ដោយមាន​កម្ពស់​១,៨៣​ម៉ែត្រ​ឯណោះ បើ​ធៀប​ជា​មួយ​ សីហា ដែល​មាន​កម្ពស់​តែ​១,៧១​ម៉ែត្រ​ប៉ុណ្ណោះ។​ អ្នក​ប្រដាល់​ថៃ​រូប​នេះ មាន​ស្នៀត​ទាត់ ជង្គង់ កែង ល្អ​ម៉ា​ចប់​តែម្ដង។ ដូច្នេះ​សីហា អាច​ជួប​ការលំបាក​ដែរ សម្រាប់​ការប្រកួត​ជាមួយ​Rarueng នេះ ។

សីហា គេ​ប្រកួត​ជាមួយ​ថៃ​ជោកជាំ​ហើយ គ្រាន់តែ​ជួប​ប្រកួត​ក្នុងស្រុក​ចំនួន​២៩​នាក់​ទៅ​ហើយ ដោយ​វាយ​ឈ្នះ​ថៃ​១៧​លើក ចាញ់​៩ និង​ស្មើ​៣​លើក។ សីហា ខ្លាំង​កណ្ដាប់ដៃ ​និង​ជើង តែ​បើ​ជួប​អាសន្ន​ ឬ​ប៉ះ​ដៃគូ​ខ្លាំង គេ​ក៏​អាច​វាយ​ប្ដូរ​កែង​បាន​ដែរ។ ជា​មួយ​នេះ គេ​ក៏​មាន​ភាព​អំណត់​ខ្ពស់ និង​មាន​កម្លាំង​គ្រប់​សម្រាប់​តស៊ូ​បាន​៥​ទឹក។

ជា​អ្នក​ប្រដាល់​ដែល​ធ្លាប់​ឡើង​រេញ​៩៧​លើក ឈ្នះ​៧៤​លើក ចាញ់​១៦​លើក ស្មើ​៧​លើក និង​ធ្លាប់​ផ្ដួល​ដៃគូ​ឲ្យ​សន្លប់​ចំនួន​២៦​ដងនោះ គេ​ត្រូវ​តស៊ូ​ជាមួយ​អ្នក​ប្រដាល់​ថៃ​ដែល​ធ្លាប់​ប្រកួត​ចំនួន​៧៨​លើក ឈ្នះ​៦០​លើក ចាញ់​១៧​លើក ស្មើ​១​លើក និង​ធ្លាប់​ផ្ដួល​ដៃគូ​ប្រកួត​ឲ្យ​សន្លប់​ចំនួន​៦​លើក។​

ទោះជា​យ៉ាងណា រវាង​ ពេជ្រ សីហា និង Rarueng Lukchapachai ជួបគ្នា​លើក​ទី​២​នេះ អ្នកណា​ឈ្នះ អ្នកណា​ចាញ់​នោះ គឺ​មិនអាច​ទស្សន៍ទាយ​មុន​បានឡើយ បើទោះជា​Rarueng មានប្រៀប​ខាង​កម្ពស់​ក៏ដោយ។​

សីហា ប្រកួត​ចុងក្រោយ​នេះ វាយ​ចាញ់​ថៃ​Yodsiam Sopasok​ដោយ​ពិន្ទុ ឯ​អ្នក​ប្រដាល់​ថៃ Rarueng Lukchapachai គេ​មក​ប្រកួត​លើកចុងក្រោយ​នៅ​ស្រុក​ខ្មែរ គឺ​វាយ​ឈ្នះ​ឡុង សុវណ្ណ​ឌឿ​ន អ្នក​ប្រដាល់​ក្លិប​សាល​វ័​ន្ត​កីឡា​ដោយ​ពិន្ទុ​(០១​វិច្ឆិកា​២០១៥)។​

ផង់ សុភាព អ្នក​ប្រដាល់​ដែល​ទើប​មានឈ្មោះ​បោះ​សំឡេង​នៅ​កម្ពុជា​នោះ ត្រូវបាន​គេ​ផ្តល់​ឱកាស​ឲ្យ​ឡើង​ប្រកួត​ជាមួយ​អ្នក​ប្រដាល់​ថៃ​ជា​លើកដំបូង។ ​អ្នក​ប្រដាល់​ថៃ​គូ​របស់​ ផង់ សុភាព​ នោះ មានឈ្មោះ​Lek Lai Sor.Takuth Thorng។ ពួកគេ​ទាំងពីរ​នាក់​នេះ​ប្រកួត​ក្នុង​ទម្ងន់​៦៧​គីឡូក្រាម។​

នេះ​ជា​ឱកាស​ដែល​ ផង់ សុភាព ត្រូវ​ពង្រីក​កេរ្តិ៍ឈ្មោះ​របស់​គេ​ឲ្យ​ល្បី​រន្ទឺ​ហើយ ព្រោះ​ក្នុង​ប្រវត្តិ​ប្រកួត​ជាច្រើនលើក​កន្លងមក​នោះ គេ​មិនដែល​ប្រកួត​ជាមួយ​អ្នក​ប្រដាល់​បរទេស​ម្តង​ណា​នៅឡើយ ។ សុភាព ចុងក្រោយ​នេះ គេ​បាន​ឈ្នះ​ខ្សែក្រវាត់​ជើងឯក​គូ​បូ​តា ទម្ងន់​៦៧​គ​.​ក្រ។​

សម្រាប់​ការ​ជួប​អ្នក​ប្រដាល់​ថៃ​នេះ ផង់ សុភាព ប្រហែលជា​មិន​មាន​បញ្ហា​អ្វី​នោះ​ឡើយ បើ​ទោះ​ជា​គេ​មិនដែល​ជួប​ប្រកួត​ជាមួយ​អ្នក​ប្រដាល់​បរទេស​ក្តី ព្រោះ​គេ​មាន​លក្ខណៈ​សម្បត្តិ​កាយ​សម្បទា ​និង​សមត្ថភាព​បច្ចេកទេស​ប្រហាក់ប្រហែល​គ្នា​ទេ។ ចាំ​មើល​រវាង ​អ៊ុំ ចំរើន និង Rarueng Lukchapachai តើ​អ្នកណា​ជា​អ្នកឈ្នះ​សម្រាប់​ការ​ជួប​ប្រកួត​គ្នា​នេះ?

ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ ម៉ូ រដ្ឋា អ្នក​ប្រដាល់​ក្លិប​ព្រៃទទឹង​ខេត្ត​បាត់ដំបង ត្រូវ​ជួប​ប្រកួត​ជាមួយ ​ចាន់​ សុខ​ហួន អ្នក​ប្រដាល់​ក្លិប និរោធ​មានជ័យ។ ពីរ​នាក់​នេះ​ប្រកួត​គ្នា​ក្នុង​ទម្ងន់​៧៤​គីឡូក្រាម។

ម៉ូ រដ្ឋា មិន​ធ្លាប់​ដែល​ជួប​ជាមួយ​ ចាន់ សុខ​ហួន​ នោះ​ទេ។ ពួកគេ​ទាំងពីរ​នាក់​សុទ្ធតែ​ជា​អ្នក​ប្រដាល់​ជើងចាស់​ដូចគ្នា។ ដូច្នេះ​អ្នកណា​ឈ្នះ ក៏​ឈ្នះ​ដោយ​លក្ខណៈ​តឹងតែង ​និង​វេទនា​ដែរ។​

ចាន់ រ៉ា​ដេ​ត អ្នក​ប្រដាល់​ក្លិប​និរោធ​មានជ័យ នឹង​ជួប​ប្រកួត​ជាមួយ​ វ៉ាន់ សារ៉ាត់ អ្នក​ប្រដាល់​ក្លិប​កុមារ​ទេព​មាន​រិ​ទ្ធ ខណៈ​ដែល អន ខៀវ អ្នក​ប្រដាល់​ក្លិប​សុភា​នូ​មានជ័យ ត្រូវ​ជួប​ប្រកួត​ជាមួយ​ម៉ឺន មេ​ឃា ក្លិប​អេ​ភូ​ថង​កីឡា ក្នុង​ទម្ងន់​៥១​គីឡូក្រាម៕

ពេជ្រ សីហា ​និង​ផង់ សុភាព ជួប​ថៃ​នៅ​សង្វៀន​បាយ័ន​បឹង​ស្នោ​ ​