បាត់ដំបង ៖ យុវជនពីរនាក់បានដួលដេកដោយមានស្នាមរងរបួសពេញខ្លួន បន្ទាប់ពីពួកគេបានផឹកស៊ីឡើងស្រវឹង ហើយបានបើកបរក្នុងល្បឿនយ៉ាងលឿនថែមទៀត បណ្ដាលឲ្យយកចង្កូតមិនទាន់ក៏រេទៅបុកនឹងរបងវត្តយ៉ាងពេញទំហឹង បើទោះបីជាពួកគេខំប្រឹងជាន់ហ្វ្រាំងក៏ឥតប្រយោជន៍ដែរ ព្រោះហ្វ្រាំងមិនស៊ីទាល់តែសោះ។
ករណីគ្រោះថ្នាក់ចរាចរណ៍ដោយខ្លួនឯងនេះបានកើតឡើងនាយប់ថ្ងៃទី១១ ខែធ្នូ ឆ្នាំ២០១៥វេលាម៉ោង២និង៤០នាទីរំលងអធ្រាត្រលើកំណាត់ផ្លូវក្រាលកៅស៊ូមួយកន្លែង ដែលស្ថិតនៅជាប់នឹងរបងវត្តបាសែត ក្នុងក្រុមទី២៩ ភូមិបាសែត ឃុំតាប៉ុន ស្រុកសង្កែ ខេត្តបាត់ដំបង ដែលបានបង្កឡើងដោយម៉ូតូមួយគ្រឿងម៉ាកឌ្រីម គ្មានស្លាកលេខ គ្មានកញ្ចក់ គ្មានពាក់មួក ដោយជិះគ្នាពីរនាក់ក្នុងល្បឿនយ៉ាងលឿនផងដែរ។
តាមកាអះអាងពីលោកមេប៉ុស្តិ៍តាប៉ុនបានបញ្ជាក់ថា នៅមុនពេលកើតហេតុគឺយុវជនទាំងពីររូបនេះបានធ្វើដំណើរមកពីផឹកស៊ីជាមួយមិត្តភក្ដិក្នុងភូមិឡើងស្រវឹងជោកជាំផង ដោយពួកគេបានជិះម៉ូតូយ៉ាងលឿន លុះទៅដល់ក្បែររបងវត្តបាសែត ដែលនៅទីនោះគឺផ្លូវមានសភាពកោងផងនោះទើបធ្វើឲ្យពួកគេយកចង្កូតមិនទាន់ ក៏បានជ្រុលឡើងទៅលើចិញ្ចើម ហើយបុកទៅលើរបងវត្តយ៉ាងពេញទំហឹងបណ្ដាលឲ្យអ្នកទាំងពីរហោះផ្លោងទៅបោកនឹងចំរឹងរបងរងរបួសយ៉ាងធ្ងន់ធ្ងរទាំងពីរនាក់។
លោកមេប៉ុស្តិ៍បានបន្ថែមថា ជាទម្លាប់របស់យុវជននៅភូមិនេះគឺគេបើកបរម៉ូតូមិនចេះយឺតឡើយ ដោយគេលែងពេញៗល្បឿនតែម្តង ហើយក្រោយពេលត្រួតពិនិត្យគឺសង្កេតឃើញថា ពួកគេទាំងពីរនាក់គ្មានពាក់មួយសុវត្ថិភាពទេ ហើយម៉ូតូគ្មានកញ្ចក់ គ្មានស្លាកលេខ ថែមទាំងហ្វ្រាំងមិនស៊ីទៀត ទើបបណ្ដាលឲ្យគ្រោះថ្នាក់បែបនេះ ដោយអ្នកបើកបរមានឈ្មោះ យ៉ូត ញ៉ាញ់ ភេទប្រុស អាយុ២៤ឆ្នាំ និងអ្នករួមដំណើរ ឈ្មោះ ឈឿប សុខ ភេទប្រុស អាយុ២៩ឆ្នាំ អ្នកទាំងពីររស់នៅក្នុងភូមិ ឃុំកើតហេតុខាងលើ។
ភ្លាមៗនោះដែរកម្លាំងជំនាញនៃអធិការដ្ឋាននគរបាលស្រុកសង្កែទៅមិនទាន់នោះទេ ដោយសារតែជនរងគ្រោះទាំងពីរនាក់ ត្រូវបានបងប្អូន និងសាច់ញាតិនាំយកទៅកាន់មន្ទីរពេទ្យមុនបាត់ទៅហើយដើម្បីសង្គ្រោះ ព្រោះសភាពនៃមុខរបួសកំពុងតែមានសភាពធ្ងន់ធ្ងរផង៕
ស្រវឹងជិះម៉ូតូគ្មានហ្វ្រាំង ទៅព្រលះរបងវត្តដេកពេទ្យពីរនាក់
0 Comments