កំពង់ឆ្នាំង ៖ ក្រុមការងារនាយកដ្ឋានធារាសាស្ត្រកសិកម្មនៃក្រសួងធនធានទឹក និងឧតុនិយមសហការជាមួយមន្ទីរធនធានទឹក និងឧតុនិយមខេត្តកំពង់ឆ្នាំងបានដឹកនាំគ្រឿងចក្រចុះស្ដារប្រឡាយមួយខ្សែប្រវែងជាង ៧.០០០ ម៉ែត្រ ដើម្បីនាំពីប្រឡាយអាងត្រាំក្របីទៅបញ្ចូលក្នុងអាងទឹកតាកុយ សម្រាប់បម្រើឲ្យការងារបង្កបង្កើនផលស្រូវប្រាំងរបស់បងប្អូនប្រជាកសិករក្នុងឃុំព្រៃគ្រី ស្រុកជលគិរី ខេត្តកំពង់ឆ្នាំង។
លោក ឈា ប៊ុនរិទ្ធ ប្រធាននាយកដ្ឋានធារាសាស្ត្រកសិកម្មនៃក្រសួងធនធានទឹក និងឧតុនិយម បានប្រាប់ឲ្យដឹងថា កន្លងមកទឹកក្នុងអាងតាកុយនេះ យើងបានប្រមូលពីប្រភពផ្សេងៗមកបំពេញម្តងរួចមកហើយ ប៉ុន្តែត្រូវបានប្រជាកសិករទាញយកមកប្រើប្រាស់ក្នុងការងារបង្កបង្កើនផលស្រូវដើមរដូវអស់ចំនួនធំ។ លោកបន្តថា នៅពេលនេះបរិមាណទឹកនៅសល់ក្នុងអាងមានកម្រិតតួចតួច មិនអាចបន្តផ្គត់ផ្គង់ឲ្យដំណាំស្រូវ ដែលប្រជាកសិករទើបនឹងដាំដុះប្រមាណ ៤៥០ ហិកតា បាននោះទេ។
លោក ឈា ប៊ុនរិទ្ធ បានបន្តថា ពិនិត្យឃើញស្ថានភាពនេះ ក្រុមការងាររបស់យើងបានសម្រេចធ្វើការស្ដារប្រឡាយមួយខ្សែប្រវែងជាង ៧.០០០ ម៉ែត្រ ដើម្បីនាំទឹកពីប្រឡាយអាងត្រាំក្របី ទៅបំពេញបន្ថែមក្នុងអាងទឹកតាកុយ។ ការងារស្ដារប្រឡាយមួយខ្សែនេះ យើងបានចាប់ដំណើរការកាលពីថ្ងៃទី ២៦ ខែធ្នូ ឆ្នាំ២០១៥ ហើយគ្រោងនឹងបញ្ចប់នៅរសៀលថ្ងៃទី២៨ ខែធ្នូ ឆ្នាំ២០១៥នេះ។
លោកបន្តថា បន្ទាប់ពីស្ដារប្រឡាយរួច ក្រុមការងាររបស់យើងនឹងរៀបចំដំឡើងម៉ាស៊ីនបូមទឹកខ្នាតមធ្យម (៦៥សេះ) ចំនួន០២គ្រឿង សម្រាប់បូមទឹកពីប្រឡាយអាងត្រាំក្របី ទម្លាក់ចូលប្រឡាយដែលយើងបាននិងកំពុងស្ដារនេះ ដើម្បីបញ្ជូនទឹកទៅបញ្ចូលក្នុងអាងតាកុយតែម្តង៕
ក្រុមការងារក្រសួងធនធានទឹក បន្តដោះស្រាយទឹកស្រោចស្រពស្រូវប្រាំងជូនប្រជាកសិករ
0 Comments