ភ្នំពេញ ៖ គណបក្សសង្គ្រោះជាតិ ដែលមេដឹកនាំ ក៏ដូចជាសកម្មជនតែងតែនិយាយថា ជាគណបក្សដែលមានការដឹកនាំតាមបែបប្រជាធិបតេយ្យតែមួយគត់នៅកម្ពុជានោះ បានទទួលរងការបកអាក្រាតយ៉ាងចាស់ដៃពីអតីតមន្ត្រីជាន់ខ្ពស់របស់ខ្លួន ក្រោយពីអត់ទ្រាំលែងបាន ហើយប្រកាសចាកចេញកាលពីថ្មីៗនេះ។
លោក អ៊ុក ស៊ុយ អតីតសមាជិកគណៈកម្មាធិការនាយក និងជាប្រធាននាយកដ្ឋានកិច្ចការបោះឆ្នោត និងនីតិកម្ម នៃគណបក្សសង្គ្រោះជាតិ ដែលបានចាកចេញពីគណបក្សនោះ បានរៀបរាប់ពីអំពើអយុត្តិធម៌ ក៏ដូចជាអំពើពុករលួយដែលបានកើតឡើងនៅក្នុងជួរគណបក្សសង្គ្រោះជាតិ ជាពិសេសមេដឹកនាំកំពូលៗទាំងពីររូប គឺលោក កឹម សុខា និងលោកសម រង្ស៊ី។
លោក អ៊ុក ស៊ុយបានថ្លែងកាលពីព្រឹកថ្ងៃទី០៤ ខែធ្នូ យ៉ាងនេះថា “មូលហេតុចម្បងដែលខ្ញុំបានចាកចេញពីគណបក្សសង្គ្រោះជាតិ ដែលគេអះអាងថាជាគណបក្សដែលមានប្រជាធិបតេយ្យនៅប្រទេសកម្ពុជានោះ គឺមិនដូចជាការនិយាយទេ គឺនិយាយតែលើបបូរមាត់ថាប្រជាធិបតេយ្យ តែចរឹកដឹកនាំរបស់មេដឹកនាំគណបក្សសង្គ្រោះជាតិនេះ មិនមានប្រជាធិបតេយ្យទេ គ្មានសីលធម៌ ផ្តាច់ការ ធ្វើអ្វីទៅតាមការដឹកនាំ នៃមេដឹកនាំទាំងពីររូប ក្នុងនោះក៏មានលោកយ៉ែម ប៉ុញ្ញឫទិ្ធ លោកអេង ឆៃអ៊ាង លោកយឹម សុវណ្ណ និងលោកស្រីជូឡុង ស៊ូមូរ៉ា តែ ប៉ុណ្ណោះ។ ការដឹកនាំគ្មានគោលការណ៍ច្បាស់លាស់គ្មានសីលធម៌ គ្មានគុណធម៌ជាថ្នាក់ដឹកនាំគណបក្ស ឡើយ ជាពិសេសបានធ្វើទៅលើប្រជាពលរដ្ឋខ្មែររាប់លាននាក់ដែលបានផ្តល់សេចក្តីទំនុកចិត្តទៅឲ្យគណបក្សសង្គ្រោះជាតិនាពេលកន្លងមក។
លោកបញ្ជាក់ដែរថា “ការចាកចេញពីគណបក្សនាពេលនេះ មិនមែនមានតែរូបខ្ញុំអ៊ុក ស៊ុយម្នាក់ប៉ុណ្ណោះទេ គឺមានថ្នាក់ដឹកនាំជាតំណាងរាស្ត្រគណបក្សសង្គ្រោះជាតិមួយចំនួនទៀតបាននិយាយជាមួយខ្ញុំ សម្តែងការសោកស្តាយនិងបានបញ្ជាក់ថា ប្រហែលជាពួកគាត់អត់ទ្រាំរស់នៅជាមួយសង្គ្រោះជាតិតទៅទៀតមិនបានទេ។ ខ្ញុំបានស្នើសុំឲ្យលោកសម រង្ស៊ី និងលោកកឹម សុខា រួមទាំងគូកនរបស់គាត់ធ្វើការកែប្រែកុំឲ្យដឹកនាំរបៀបពាល គ្មានគុណធម៌ គ្មានសុជីវធម៌តទៅទៀត”។ លោកពន្យល់ថា អ្វីដែលលោកនិយាយគ្មានគុណធម៌ គ្មានសីលធម៌នោះ គឺថ្នាក់ដឹកនាំនៅតាមរាជធានីខេត្តបានខិតខំបំពេញការងាររបស់ខ្លួនរហូតទទួលបានសំឡេងគាំទ្រយ៉ាងច្រើនគួរសម ហើយនៅពេលធ្វើការបោះឆ្នោតស្ទង់មតិមិនបានយកលទ្ធផលទាំងនោះមកបង្ហាញដល់ថ្នាក់ដឹកនាំរាជធានីខេត្តដែលបានខិតខំនោះទេ បែរជាឃុបឃិតគ្នាដាក់សាច់ញាតិ ដាក់បក្ខពួករបស់ថ្នាក់ដឹកនាំទាំងនោះ ទើបអាចទៅកាន់តំណែងទាំងនោះបាន។
លោក អ៊ុក ស៊ុយ បានលើកឡើងទៀតថា សម្រាប់តួនាទីឬតំណែងជាប្រធានប្រតិបត្តិរាជធានីខេត្ត និងស្រុកជាដើម លោកមិនបានឃើញច្បាស់ពីការសូកលុយកាក់ដើម្បីទទួលតំណែងទាំងនោះទេ ដោយសារគេមិនឲ្យយើងដឹង ប៉ុន្តែបើផ្អែកទៅលើសកម្មភាពជាក់ស្តែងដូចនៅខេត្តតាកែវជាដើម ដែលគាត់បានធ្វើការងារដាច់ដៃ ដាច់ជើងបែរជាត្រូវបានធ្វើការស្ទង់មតិក្លែងបន្លំដាក់ឈ្មោះសុផលឯណាផ្សេងទៅវិញ។ ដោយឡែកទាក់ទងទៅនឹងសកម្មភាពនយោបាយថ្មីៗដូចជាការដកតំណែងអនុប្រធានទី១រដ្ឋសភា ពីលោកកឹម សុខាជាដើម លោកអ៊ុក ស៊ុយបានអះអាងថា លោកមិនភ្ញាក់ផ្អើលទេ ដោយសារតែជាទង្វើរបស់គណបក្សសង្គ្រោះជាតិដែលចង់ធ្វើបែបនេះ។ លោកបញ្ជាក់ថា “ហេតុអីបានជាខ្ញុំនិយាយបែបនេះ ពីព្រោះប្រជាពលរដ្ឋប្រាប់ថា កុំចូលរដ្ឋសភា ប្រជាពលរដ្ឋបានបញ្ជាក់ច្បាស់ណាស់។ គេថា គេចូលដើម្បីចង់ដឹងការពិត ស្វែងរកការពិត ហើយមុនដំបូងគេថា ចូលស្មើនឹងអាចម៍គោ ហើយលោក សម រង្ស៊ី ថាបើចូលស្មើនឹងចោរ ដល់តែឥឡូវនេះប្រជាពលរដ្ឋសួរ អំពីការចូលសភា គេថា កុំអាលសួរ កុំអាលថា ចាំឲ្យគាត់ធ្វើសិន ឥឡូវខ្ញុំឃើញហើយ ដល់ពេលខ្លួនធ្វើផ្ដេសផ្ដាស គេដេញក្បាលចេញពីប្រធានទី១រដ្ឋសភា ដូច្នេះខ្ញុំអត់មានអីភ្ញាក់ផ្អើលទេ ហើយនេះគឺជារង្វាន់របស់គណបក្សសង្គ្រោះជាតិ ដែលចង់បាន ហើយដោយឡែកលោកសម រង្ស៊ី និយាយថា ចាំមើលសិនបងប្អូន បើចង់ចាប់ចោរត្រូវតែធ្វើចោរ ចង់ចាប់ខ្លា ត្រូវតែធ្វើខ្លា ឥឡូវដល់តែមនុស្សមែនទែន ចង់ទៅធ្វើខ្លា នោះខ្លាដេញខាំហើយ។ អាហ្នឹងវាជាធម្មតា ធ្វើមនុស្សចង់នៅក្បែរខ្លា គឺត្រូវខ្លាដេញខាំ ហើយមនុស្សចង់ទៅធ្វើចោរ ឥឡូវត្រូវតុលាការកោះហៅហើយ អានេះគឺជាលទ្ធផលរបស់ខ្លួន ដូច្នេះខ្ញុំអត់មានការភ្ញាក់ផ្អើលអីទេ។
តាមការលើកឡើងរបស់លោក អ៊ុក ស៊ុយ បានឲ្យដឹងដែរថា “អ្វីដែលជាទង្វើរបស់មេដឹកនាំគណបក្សទាំងពីររូប ឬថ្នាក់ដឹកនាំមួយចំនួនទៀតនោះ គឺគ្រាន់តែជាថ្នូរនិងតំណែងប៉ុណ្ណោះ។មេកនាំទាំងពីរនេះ បង្កើតព្រឹត្តិការណ៍ ដោះស្រាយបញ្ហា ដូច្នេះនេះជាបញ្ហាដដែលៗដែលយើងធ្លាប់បានឃើញហើយ គ្មានដែលដោះស្រាយបញ្ហាអ្វីមួយចេញនោះទេ ចំណងរបស់គាត់ចងហើយចងទៀត ហើយដើរអួតប្រាប់គេថាជាមេដឹកនាំមានសមត្ថភាព ខ្ញុំអត់ឲ្យតម្លៃទេ មេដឹកនាំរបៀបនេះ។ គាត់ដឹកនាំគ្មានគោលការណ៍ធ្វើអ្វីស្រេចតែចិត្ត ដូច្នេះរមែងតែងតែវិនាសអន្តរាយដល់ខ្លួនឯងវិញហើយ យ៉ាងហោចណាស់ក៏មានសេចក្តីក្ដៅក្រហាយមកលើខ្លួនឯងនោះដែរ ពីព្រោះទង្វើរបស់ខ្លួនធ្វើមិនសុចរិត មិនស្មោះសរនៅក្នុងខ្លួន។
តាម លោក អ៊ុក ស៊ុយ អះអាងថា ការលើកឡើងខាងលើនេះគ្រាន់តែជាបញ្ហាត្រួសៗបន្តិចបន្តួចប៉ុណ្ណោះ នៅមានបញ្ហាជាច្រើនទៀត ដែលលោកនឹងទំលាយចេញនៅក្នុងសន្និសីទសារព័ត៌មាននាពេលឆាប់ៗខាងមុខនេះ។ លោកបន្តថា ក្រោយពីលោកបានចាកចេញ ហើយប្រកាសប្រាប់សមាជិក សមាជិក នៅតាមបណ្តាខេត្តមួយចំនួននោះ មានសមាជិក សមាជិកានៃគណបក្សសង្គ្រោះជាតិប្រមាណ២០០០ នាក់ហើយបានប្រកាសចេញមកជាមួយលោកដែរ។
លោក អ៊ុក ស៊ុយ បានប្រាប់ឲ្យដឹងដែរថា បន្ទាប់ពីលាលែងពីគណបក្សសង្គ្រោះជាតិ លោកបានសម្រេចចិត្តចូលរួមនៅក្នុងគណបក្សសំបុកឃ្មុំសង្គមប្រជាធិបតេយ្យ ដែលមានលោក ម៉ម សូណង់ដូ ជាប្រធាន ហើយការដែលលោកសម្រេចចិត្តចូលគណបក្សនេះ ដោយសារតែមើលឃើញមាន គោលជំហរច្បាស់លាស់ គឺមានគោលជំហរច្បាស់លាស់ សំឡុតមិនខ្លាច ហើយក៏សុខចិត្តជិះយន្តហោះមកឲ្យគេចាប់ដាក់គុកផងដែរ ដោយមិនខ្លាចការជាប់គុកច្រវាក់ ដូចមេដឹកនាំគណបក្សសង្គ្រោះជាតិលោកសម រង្ស៊ី នោះទេ។
ទាក់ទងនិងការចាកចេញ និងការលើកឡើងរបស់លោក អ៊ុក ស៊ុយ ខាងលើនេះ ការិយាល័យរបស់យើងនៅមិនទាន់ទទូលបានប្រតិកម្មជាមួយពីលោក កឹម សុខា ប្រធានស្តីទីគណបក្សសង្គ្រោះជាតិ បាននៅឡើយទេ ប៉ុន្តែលោក អេង ឆៃអ៊ាង មន្ត្រីជាន់ខ្ពស់ និងជាតំណាងរាស្ត្រគណបក្សសង្គ្រោះជាតិ មណ្ឌលខេត្តកណ្តាលបានលើកឡើងថា “ជាធម្មតា អ្នកចាកចេញមិនដែលនិយាយល្អពីគណបក្សចាស់ ដែលខ្លួនធ្លាប់នៅជាមួយនោះទេ”។ ចំណែកលោក យ៉ែម បុញ្ញប្ញទ្ធិ ថ្លែងដែរថា “ជាធម្មតានៅពេលមានការចាកចេញ តែងតែមានការលើកឡើងពីហេតុផលនោះខ្លះហើយ ដែលជារឿងធម្មតា។
សូមបញ្ជាក់ថា លោក អ៊ុក ស៊ុយ សមាជិកគណៈកម្មាធិការនាយក និងជាប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ ប្រកាសលាលែងពីគណបក្ស តាមលិខិតចុះថ្ងៃទី០៣ ខែធ្នូ ឆ្នាំ២០១៥ ដោយសំអាងថា មេដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា ព្រមទាំងថ្នាក់ដឹកនាំមួយចំនួនទៀតក្នុងបក្សដឹកនាំបក្សគ្មានសីលធម៌ គ្មានគុណធម៌ អយុត្តិធម៌ ពុករលួយ និងបក្សពួកនិយម៕
ស្ដាប់អតីតមន្ត្រីជាន់គណបក្សសង្គ្រោះជាតិ រៀបរាប់ពីភាពអយុត្តិធម៌ និងអំពើពុករលួយក្រោយពីចាកចេញ
0 Comments