ភ្នំពេញ ៖ ជនសង្ស័យ២នាក់ ស្លៀកពាក់ឯកសណ្ឋានជាកងទ័ព ត្រូវបានកម្លាំងកងរាជអាវុធ ខណ្ឌទួលគោកធ្វើការឃាត់ខ្លួន ខណៈពេលដែលពួកគេដើរសុំលុយប្រជាពលរដ្ឋនៅតាមផ្ទះ។
ជនសង្ស័យត្រូវបានឃាត់ខ្លួនកាលពីវេលាម៉ោង១០និង៥០នាទី នាថ្ងៃទី០១ ខែធ្នូ ឆ្នាំ២០១៥ នៅចំណុច ផ្លូវ២២១កែង១២២ សង្កាត់ផ្សារដេប៉ូ៣ ខណ្ឌទួលគោក។
ជនសង្ស័យទាំង០២នាក់ ទី១-ឈ្មោះ កើ រនី ភេទប្រុស អាយុ៤០ឆ្នាំ មុខរបរមិនពិតប្រាកដ ស្នាក់នៅផ្ទះជួលម្តុំគីឡូលេខ៩ ផ្លូវជាតិលេខ៥ សង្កាត់ច្រាំងចំរះ ខណ្ឌឫស្សីកែវ រាជធានីភ្នំពេញ (ស្លៀកពាក់សំលៀកបំពាក់បារ៉ាពាក់សក្ដិ៥ក្លែងក្លាយ)។ ទី២-ឈ្មោះ គង់ ប៊ុនធឿន ភេទប្រុស អាយុ៤១ឆ្នាំ មុខរបរមិនពិតប្រាកដ ស្នាក់នៅភូមិមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ (ស្លៀកពាក់អាវបារ៉ា មិនមានសក្ដិទេ)។
ប្រភពព័ត៌មានបានឲ្យដឹងថា នៅមុនពេលកើតហេតុជនទាំងពីរនាក់បានចេញពីគោលដៅស្នាក់នៅរៀងខ្លួន ដោយបានមកជួបគ្នានៅមុខមន្ទីរពេទ្យ១៧៩ ក៏បានបបួលគ្នាដើរសុំលុយតាមផ្ទះប្រជាពលរដ្ឋតាំងពីមុខមន្ទីរពេទ្យ១៧៩ រហូតមកដល់ផ្លូវ២២១ កែង១២២ ទើបត្រូវបានកម្លាំងកងរាជអាវុធហត្ថឃាត់ខ្លួនយកមកសាកសួរនៅអង្គភាពតែម្ដង។
បើយោងតាមការបំភ្លឺរបស់ជនសង្ស័យ ឈ្មោះ កើ រនី ភេទប្រុស បានឲ្យដឹងថា ពីមុនរូបគេជាយោធានៅវរៈសេនាតូច១៤៥ ឈរជើងនៅថ្មដា ក្រោយពេលមានគ្រោះថ្នាក់ចរាចរណ៍អង្គភាពបានចាត់មកសម្រាកព្យាបាលនៅមន្ទីរពេទ្យ១៧៩ រហូតមកដល់បច្ចុប្បន្ន មិនបានវិលចូលអង្គភាពវិញអស់រយៈពេល៥ទៅ៦ឆ្នាំមកហើយ។
មួយទៀតនោះ បើយោងតាមការបំភ្លឺរបស់ជនសង្ស័យឈ្មោះ គង់ ប៊ុនធឿន បានឲ្យដឹងថា ពីមុនរូបគេជាយោធានៅបន្ទាយលង្វែក ក្រោយពេលមានគ្រោះថ្នាក់ចរាចរណ៍ អង្គភាពបានចាត់មកសម្រាកព្យាបាលនៅមន្ទីរពេទ្យ១៧៩ដែរ រហូតមកដល់បច្ចុប្បន្នមិនបានវិលចូលអង្គភាពវិញអស់រយៈពេលជាង១ឆ្នាំហើយ។
សូមបញ្ជាក់ផងដែរថា ក្រោយពីការសាកសួរ ជនទាំងពីរនាក់ដែលស្លៀកពាក់យោធាដើរសុំលុយគេនេះមិនមានឯកសារដែលបញ្ជាក់ថាខ្លួនជាយោធានោះទេ ហើយក្រោយមកទៀតកងរាជអាវុធហត្ថខណ្ឌទួលគោកក៏បាននាំទៅទីបញ្ជាការកងរាជអាវុធហត្ថរាជធានីភ្នំពេញ ដើម្បីចាត់ការបន្តទៀត៕
ជនសង្ស័យ០២នាក់ ក្លែងខ្លួនជាកងទ័ពដើរសុំលុយគេត្រូវបានឃាត់ខ្លួន
0 Comments