បន្ទាយមានជ័យ ៖ នៅព្រឹកថ្ងៃទី២ ខែធ្នូ ឆ្នាំ២០១៥ លោក សួន បវរ អភិបាលរងខេត្តបន្ទាយមានជ័យ និងក្រុមការងារជាច្រើននាក់ទៀតបាននាំយកអំណោយជាគ្រឿងឧបភោគបរិភោគ សម្ភារៈប្រើប្រាស់ ថវិកាមួយចំនួនធំ និងផ្ទះមួយខ្នងទៅចែកជូនគ្រួសារស្ត្រីមេម៉ាយកូនពិការ និងជនក្រីក្រមានជំងឺប្រចាំកាយ៥គ្រួសារនៅស្រុកម៉ាឡៃ ខេត្តបន្ទាយមានជ័យ ដែលសព្វថ្ងៃកំពុងជួបបញ្ហាជីវភាពខ្វះខាតយ៉ាងខ្លាំង។
លោក សួន បវរ បាននិយាយថា ជនក្រីក្រ និងជនពិការគ្មានទីពឹងទាំង៥គ្រួសារនោះ១មានឈ្មោះ នូ ណូត មេម៉ាយកូន៤នាក់ រស់នៅភូមិបល្ល័ង្ក ស្រុកម៉ាឡៃ ២មានឈ្មោះ គួយ ឈីន មេម៉ាយកូន៣នាក់ រស់នៅភូមិទំនប់នារី ៣មានឈ្មោះ ម៉ាត់ ស៊ីន កូន៤នាក់ រស់នៅភូមិតាគង់ ៤មានឈ្មោះ ពយ សំអាត កូន៤នាក់ រស់នៅភូមិតាគង់ ៥មានឈ្មោះ ពយ គីមស កូន៣នាក់ រស់នៅភូមិតាគង់ទាំង៥គ្រួសាររស់នៅស្រុកម៉ាឡៃ ខេត្តបន្ទាយមានជ័យ។
លោក សួន បវរ បាននិយាយបន្តទៀតថា ក្នុងការសួរសុខទុក្ខនេះលោកបានផ្តល់ថវិកាមួយគ្រួសារ ៥០០០០រៀល អង្ករ២០គីឡូក្រាម ស្ករ ទឹកស៊ីអ៊ីវ ទឹកត្រី ត្រីខ មី សារុង អាវ ភួយ ឆ្នាំងដាំបាយ កន្ទេល រួចបានប្រគល់ផ្ទះមួយខ្នងដល់ស្ត្រីមេម៉ាយ កូនពិការ រស់នៅភូមិបល្ល័ង្ក ឃុំតាគង់ ស្រុកម៉ាឡៃ ខេត្តបន្ទាយមានជ័យ ដែលគ្មានទីពឹងផងដែរ។
លោកបានបញ្ជាក់ទៀតថា ក្នុងនាមលោកជាអភិបាលរងខេត្តតំណាងឲ្យលោកឧបនាយករដ្ឋមន្ត្រី កែ គឹមយ៉ាន លោកតែងតែយកចិត្តទុកដាក់ដល់ជនក្រីក្រ ពិការ និងគ្មានទីពឹង ទូទាំងខេត្ត លោកតែងចុះសួរសុខទុក្ខ និងនាំយកអំណោយជូនដល់លំនៅដ្ឋានរបស់ប្រជាពលរដ្ឋផ្ទាល់ដៃ ដើម្បីលើកទឹកចិត្តដល់ពួកគាត់ក្រៅពីកិច្ចការពារសន្តិសុខសណ្ដាប់ធ្នាប់ និងការងារសង្គម៕
លោក សួន បវរ នាំយកអំណោយ និងផ្ទះមួយខ្នងប្រគល់ជូនជនក្រីក្រ៥គ្រួសារក្នុងស្រុកម៉ាឡៃ
0 Comments