ភ្នំពេញ ៖ នៅវេលាម៉ោង១៤និង៣០នាទីរសៀល ថ្ងៃទី៦ ខែធ្នូ ឆ្នាំ២០១៥នេះ មន្ត្រីសង្ឃបានកោះប្រជុំរកមូលហេតុ ដែលសង្ឃខ្មែរកម្ពុជាក្រោម យកព្រះពុទ្ធរួបជាច្រើនអង្គ ទម្លាក់ចូលទឹកស្អុយ នៅវត្តស្ទឹងមានជ័យ។
សេចក្ដីរាយការណ៍បានឲ្យដឹងថា មន្ត្រីសង្ឃនោះរួមមានខាងមន្ទីរ ធម្មការរាជធានីភ្នំពេញ អនុគណៈកម្មការ វត្តស្ទឹងមានជ័យរួមនឹងអ្នកពាក់ព័ន្ធមួយចំនួនទៀត។
សេចក្ដីរាយការណ៍បន្តថា ព្រះសង្ឃខ្មែរកម្ពុជាក្រោមដែលយកព្រះពុទ្ធរូបជាច្រើនអង្គ ទម្លាក់ចូលក្នុងទឹកស្អុយនេះ ជាសមាជិកសមាគម សង្ឃវត្តសាមគ្គីរង្ស៊ី ក្នុងវត្តស្ទឹងមានជ័យ ហើយរហូតមកទល់ ពេលនេះមិនទាន់ដឹងមូលហេតុពិតប្រាកដនៅឡើយទេ។ ក្នុងការកោះប្រជុំនោះ ព្រះសង្ឃដែលបង្កនោះមិនចូលរួមទេ ដោយសារតែមានសមាគម កម្ពុជាក្រោម និងសង្ឃ កម្ពុជាក្រោម នៅវត្តសាមគ្គីរង្សី និងមានសមាជិក បក្សសង្គ្រោះជាតិ ជាអ្នករារាំង មិនឲ្យលោកនៅកុដិលេខ៤៣ នោះចូល ព្រោះខ្លាច អាជ្ញាធរ និងមន្ត្រី សង្ឃចាប់លោកផ្សឹក។
គួរបញ្ជាក់ថា កាលពីព្រឹកថ្ងៃទី៥ ខែធ្នូ ឆ្នាំ២០១៥ ព្រះពុទ្ធរូបជាច្រើនអង្គ ដែលព្រះពុទ្ធបរិស័ទគោរពប្រតិបត្តិនោះ ត្រូវបានព្រះសង្ឃខ្មែរកម្ពុជាក្រោមមួយអង្គ គង់នៅកុដិលេខ៤៣ វត្តស្ទឹងមានជ័យ ខណ្ឌមានជ័យ យកទៅ ទម្លាក់ចូលក្នុងទឹកស្រះស្អុយ ដោយមិនដឹងពីមូលហេតុ។ ករណីនេះនាំឲ្យមាន ការភ្ញាក់ផ្អើលដល់យាយជី តាជី សិស្ស និងនិស្សិត ដែលស្នាក់នៅក្នុង វត្តស្ទឹងមានជ័យ។ ចំពោះហេតុការណ៍ខាងលើនេះ ទាំងប្រជាពលរដ្ឋ យាយជី តាជី ព្រះសង្ឃ និងសិស្សនិស្សិត ដែលគង់ និងស្នាក់នៅ វត្តស្ទឹងមានជ័យស្នើសុំឲ្យ ខាងក្រសួងធម្មការ និងអាជ្ញាធរ មូលដ្ឋាន ធ្វើការសួរនាំ និងចាត់វិធានការទៅតាមច្បាប់សាសនាផងដែរ៕
មន្ត្រីសង្ឃកោះប្រជុំរកមូលហេតុ ដែលសង្ឃខ្មែរកម្ពុជាក្រោម យកព្រះពុទ្ធរូបជាច្រើនអង្គទម្លាក់ចូលទឹកស្អុយ
0 Comments