ភ្នំពេញ ៖ បន្ទាប់ពីសាងកេរ្តិ៍ឈ្មោះល្បីល្បាញនៅផលិតកម្មហង្សមាសអស់រយៈពេលជាច្រើនឆ្នាំមកនេះតារាចម្រៀងស្រីថ្គាមខ្លាអ្នកនាង ពេជ្រ សោភា ថ្មីៗនេះបានបង្ហាញភាពភ្ញាក់ផ្អើលលើបណ្ដាសង្គមហ្វេសប៊ុករបស់ខ្លួន ខណៈដែលមហាជនអ្នកគាំទ្របានប្រទះឃើញតារារូបនេះសរសេរសារបង្ហោះជាសាធារណៈថា ពេលនេះនាងបានសម្រេចចិត្តលាឈប់ពីផលិតកម្មហង្សមាសជាផ្លូវការ។ ប៉ុន្តែការពិតយ៉ាងណានោះគេពុំទាន់ដឹងច្បាស់ពីមូលហេតុនៅឡើយទេ។
តារាស្រីធ្លាប់រងព្យុះអាស្រូវព័ត៌មានអ្នកនាង ពេជ្រ សោភា បានបង្ហាញសារនៅលើទំព័រ Pege ហ្វេសប៊ុកនាងខ្ញុំ ពេជ្រ សោភា នឹងលាឈប់ធ្វើនៅហង្សមាស និងរស្មីមាសហើយ តែនាងខ្ញុំនឹងធ្វើការងាររបស់នាងឲ្យចប់គឺ(the voice Cambodia)អគុណដល់ក្រុមហ៊ុនហង្សមាស ដែលធ្វើឲ្យជីវិតគ្រួសារបានល្អរហូតមកដល់ថ្ងៃនេះ ខ្ញុំមានថ្ងៃគឺបានមកពីហង្សមាសទាំងអស់។
ជាមួយការបង្ហោះសារប្រកាសប្រាប់ពីដំណឹងនៃការលាឈប់ពីសំណាក់តារាចម្រៀងអ្នកនាង ពេជ្រ សោភា នេះដែរ គេសង្កេតឃើញមានអ្នកគាំទ្ររបស់នាងក៏ដូចជាបណ្ដាអ្នកនិយមលេងបណ្ដាញសង្គមហ្វេសប៊ុកជាច្រើនបានសម្ដែងអារម្មណ៍សោកស្ដាយ និងស្នើកុំឲ្យនាងឈប់ពីហង្សមាសពិសេសវិស័យសិល្បៈនេះតែម្តង។
តារាចម្រៀងអ្នកនាង ពេជ្រ សោភា នៅវេលាម៉ោង០៩ព្រឹកថ្ងៃទី០៧ ខែធ្នូ ឆ្នាំ២០១៥ មិនទាន់អាចសុំការបញ្ជាក់បន្ថែមពីសាមីខ្លួនអ្នកនាង ពេជ្រ សោភា ជុំវិញមូលហេតុនៃការសម្រេចចិត្តចាកចេញពីផលិតកម្មហង្សមាសតាមទូរស័ព្ទបាននៅឡើយទេ ខណៈលេខទូរស័ព្ទនាងធ្លាប់ប្រើពីមុនត្រូវស្ត្រីចំណាស់ម្នាក់ជាអ្នកទទួល ហើយប្រាប់ថា មិនមែនជាលេខរបស់អ្នកនាងពេជ្រ សោភា ទេ។ ចំណែកឯភាគីខាងផលិតកម្មហង្សមាសក៏យើងមិនទាន់ទទួលបានបញ្ជាក់ច្បាស់លាស់ណាមួយដែរ។
ដោយឡែកបើតាមប្រភពក្រៅផ្លូវការខ្លះបានលួចបង្ហើបប្រាប់ថា ការសម្រេចចិត្តចាកពេញអ្នកនាង ពេជ្រ សោភា ពីទ្រនំចាស់ហង្សមាសពេលនេះគឺមានហេតុផលពីរយ៉ាងផ្សេងគ្នាគឺទីមួយអាចបញ្ចប់កុងត្រា និងមួយវិញទៀតបូករួមបណ្ដាលពីផ្ទៃក្នុង ដែលរហូតធ្វើឲ្យនាងអាក់អន់ចិត្តជាមួយផលិតកម្មទើបសម្រេចចាកចេញបែបនេះ។ ស្របពេលពេលនៃដំណឹងលាឈប់ពីតារាចម្រៀង ពេជ្រ សោភា នេះដែរនៅលើហ្វេសប៊ុករបស់តារាចម្រៀងរ៉េប ដែលជាដៃគូរួមដំបូលលោក ងួន ចាន់ដេវិត ក៏បានសរសេរបង្ហោះសារខ្លីបែបនេះថា បើ ពេជ្រ សោភា ចេញខ្ញុំក៏ចេញដែរ…..សមិទ្ធផលថ្មីដែលខ្ញុំនឹងគាត់បានត្រៀមសម្រាប់ឆ្នាំ២០១៦ក៏ទៅតាមហ្នឹងដែរ….អរគុណ។
ជាមួយគ្នានេះដែរសម្រាប់កវីនិពន្ធទំនុកច្រៀងល្បីឈ្មោះរបស់ផលិតកម្មហង្សមាសលោកសុខ ជំនោ ឯណោះវិញក៏បានបញ្ចេញសារសម្ដែងអារម្មណ៍សោកស្ដាយនៅលើបណ្ដាញសង្គមហ្វេសប៊ុករបស់ខ្លួនថា បើសិនជាការពិតមែន: ខ្ញុំសូមបង្ហាញភាពសោកស្ដាយចំពោះ ពេជ្រសោភា ក្នុងការសម្រេចចិត្តនេះ តែមិនសោកស្ដាយចំពោះការសម្រេចចិត្តចាកចេញទេ គឺស្ដាយចំពោះ ការខិតខំប្រឹងប្រែងខ្លាំងក្នុងកំឡុង៤ឆ្នាំចុងក្រោយនេះ ទាំងការខំទាក់ទងអ្នកខាងក្រៅ អ្នកនិពន្ធភ្លេង ផ្តល់ឱកាសឲ្យក្មេងៗ អ្នកRap (រ៉េប) បង្កើតក្រុមរាំ ចំណាយផ្ទាល់ខ្លួន។
លោក សុខ ជំនោ បាននិយាយបញ្ជាក់ថា មិនមែនតែ ពេជ្រ សោភា តែអ្នកផ្សេងក៏បាននិងកំពុងប្រឹងបែបនេះ។ ខ្ញុំសង្ឃឹមថា ពេជ្រ សោភា នឹងមានគោលការណ៍ច្បាស់លាស់លើអាជីពសិល្បៈ ជាពិសេសនឹងបង្ហាញភាពជោគជ័យចំពោះដួងវិញ្ញាណឪពុករបស់នាង ដែលនាងតែងបានបង្ហាញអារម្មណ៍តាមហ្វេសប៊ុគក្នុងគ្រាបាត់បង់អ្នកមានគុណ។ សោភា ក៏ដូចខ្ញុំ ហង្សមាសជាកន្លែងដែលផ្តល់ឱកាសសម្រាប់ថ្ងៃនេះ តែទាស់ត្រង់ខ្ញុំមានស្ទឹងសង្កែជាចំណុចចាប់ផ្តើម។ (រវាងសាច់និងបន្លែ បើស្លកកូរ បន្លែមានតម្លៃជាងសាច់) / សជន៕
ងួន ចាន់ដេវិត ប្រកាសចាកចេញពីហង្សមាសតាម ពេជ្រ សោភា ឯកវី សុខ ជំនោ បានត្រឹមសោកស្ដាយ
0 Comments