ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងថា យើងចាំបាច់ត្រូវបន្តពង្រឹងសុខដុមនីយកម្មរវាងសាសនិកនៃគ្រប់សាសនា ដោយប្រឆាំងការរើសអើង និងការបែងចែកក្នុងចំណោមប្រជាជន ដែលបណ្ដាលមកពីភាពខុសគ្នាខាងសាសនា សំដៅប្រែក្លាយសក្ដានុពលរបស់សាសនាទាំងអស់ ឱ្យទៅជាកម្លាំងជំរុញការអភិវឌ្ឍសង្គម-សេដ្ឋកិច្ច ពង្រឹងសន្តិភាព សាមគ្គីភាព ការថែរក្សាប្រពៃណីជាតិ និងលើកកម្ពស់តម្លៃសីលធម៌ ខណៈដែលកម្ពុជាកំពុងតែអបអរសាទរនូវលទ្ធផលនៃសុខដុមនីយកម្មក្នុងវិស័យសាសនា ដោយកម្ពុជាបញ្ចៀសបាននូវអំពើហិង្សាសាសនា ដែលជាឧត្ដមប្រយោជន៍ និងកាលានុវត្តភាពធំធេងរបស់កម្ពុជាយើង។
សម្ដេចតេជោបានថ្លែងដូច្នេះ ក្នុងកិច្ចប្រជុំផ្សព្វផ្សាយ «ការបញ្ជ្រាបទស្សនាទានសីលធម៌សាសនាដើម្បីសុខដុមនីយកម្មនៅកម្ពុជា» ក្នុងឱកាសឧទ្ទិសចំពោះទិវាបួងសួងនិងសកម្មភាពសាសនាដើម្បីកុមារ ដែលមានអ្នកចូលរួមមកពីនិកាយសាសនា នានាចំនួនជាង៤០០០នាក់ នាព្រឹកថ្ងៃទី១៤ ខែធ្នូ ឆ្នាំ២០១៥ នៅសាលមហោស្រពកោះពេជ្រ។
សម្ដេចនាយករដ្ឋមន្ត្រីថ្លែងបន្តថា ដោយឈរលើជំហរនយោបាយស្មើភាព ស្មើសិទ្ធិនិង ការអនុវត្តកាតព្វកិច្ចដូចៗគ្នា ដែលកម្ពុជាត្រូវបានប្រកាន់យកតាំងពីដើមរហូតមកនេះ បានធ្វើឱ្យសង្គមកម្ពុជាយើងស្ថិតក្នុងស្ថានភាពមួយងាយស្រួលចុះសម្រុង ទោះបីមានជនជាតិដទៃច្រើន និងសាសនាច្រើនក៏ដោយ។ ចំណុចនេះ មិនត្រឹមតែមានមោទនភាពសម្រាប់កម្ពុជាតែប៉ុណ្ណោះទេ ក៏ប៉ុន្តែក៏ជាមោទនភាពសម្រាប់ប្រទេសក្នុងតំបន់និងពិភពលោកផងដែរ ចំពោះភាពជោគជ័យនៃសុខដុមនីយកម្មសាសនានេះ។ ទោះជាយ៉ាងនេះក្ដី ការពង្រឹងសុខដុមនីយកម្មសាសនា គឺជាកិច្ចការចាំបាច់ចំពោះមុខមួយដែលរាជរដ្ឋាភិបាលត្រូវបន្តកិច្ចខិតខំប្រឹងប្រែងព្យាយាមអនុវត្តគ្រប់កាលៈទេសៈ មិនអាចមើលរំលងបានឡើយ ក្នុងនោះត្រូវធ្វើឱ្យគ្រប់ជនជាតិ និង សាសនិកទាំងអស់នៅកម្ពុជាអនុវត្តកាតព្វកិច្ចជាតិដូចៗគ្នា គឺ រួបរួមសាមគ្គីគ្នា ស្នេហាជាតិ និង គោរពរដ្ឋធម្មនុញ្ញតែមួយ ព្រះមហាក្សត្រតែមួយ ស្របតាមបាវចនា ជាតិ សាសនា ព្រះមហាក្សត្រ។ សម្ដេចតេជោ សង្ឃឹមយ៉ាងមុតមាំថា តាមរយៈកិច្ចប្រជុំផ្សព្វផ្សាយ«ទស្សនាទានសីលធម៌សាសនាដើម្បីសុខដុមនីយកម្មនៅកម្ពុជា» នេះ ថ្នាក់ដឹកនាំ និង បរិស័ទនៃឥស្លាមសាសនិក គ្រិស្តសាសនិក និង សាសនិកនៃគ្រប់សាសនា នឹងជួយជំរុញកិច្ចសហការគ្នាកាន់តែសកម្មរស់រវើក ក្នុងការពង្រឹងសុខដុមនីយកម្មខាងផ្នែកសាសនានៅកម្ពុជា ដែលនឹងឆ្លុះបញ្ចាំងយ៉ាងច្បាស់នូវស្មារតីទទួលខុសត្រូវ កិច្ចខិតខំប្រឹងប្រែងរួមគ្នារបស់យើង ហើយបន្តប្ដេជ្ញាចិត្តរួមគ្នា ក្នុងការលើកកម្ពស់ការបណ្ដុះបណ្ដាលធនធានមនុស្ស ពិសេសយុវជន និងកុមារ ដែលជាទំពាំងស្នងឫស្សី រួមគ្នាទប់ស្កាត់រាល់សកម្មភាពរំលោភបំពាន អំពើហិង្សាចំពោះកុមារ និង ស្ត្រី ជាដើម ដើម្បីភាពរីកចម្រើន សុខដុមរមនា និង ធានាបាននូវផលប្រយោជន៍សម្រាប់ទាំងអស់គ្នា។
ឯកឧត្ដម មិន ឃិន រដ្ឋមន្ត្រីក្រសួងធម្មការ និងសាសនាថ្លែងថា មកដល់បច្ចុប្បន្ននេះ សាសនាទាំងអស់នៅកម្ពុជាមានការរីកចម្រើនគួរជាទីមោទនៈ ក្នុងនោះព្រះពុទ្ធសាសនា មានពីរនិកាយ គឺ គណៈមហានិកាយ និងគណៈធម្មយុត្តិកនិកាយ ដែលមានព្រះសង្ឃសរុបជិត ៥០០០០អង្គ វត្តជិត ៥០០០ ដែលមានបរិស័ទប្រមាណ៩៥% ឥស្លាមសាសនា មានពីរនិកាយ ដែលមានព្រះវិហារជាង ៤០០ ស្នាក់ការថ្វាយបង្គំជាង ៨០០ និងមានបរិស័ទ ជាង៣០ម៉ឺននាក់ ហើយនិងមានគ្រិស្តសាសនាដែលមានពីរនិកាយធំៗ សហគមន៍កាតូលិក និងប្រូតេស្តង់ ហើយមាននិកាយតូចៗជាច្រើនទៀត ដែលនៅក្នុងនិកាយប្រូតេស្តង់។ មិនតែប៉ុណ្ណោះក៏មានសាសនាផ្សេងៗរួមមានសាសនាមហាយានជាដើម ដែលមានបរិស័ទសរុប ០,២៥% និងមានវិហារ ស្នាក់ការថ្វាយបង្គំមួយចំនួនផងដែរ៕
សម្ដេចតេជោ ៖ ចាំបាច់ត្រូវបន្តពង្រឹងសុខដុមនីយកម្មរវាងសាសនិកនៃគ្រប់សាសនា
0 Comments