អាជ្ញាធរបានបិទសាលារៀន ហើយផ្អាកការនេសាទ ព្រមទាំងសេវានាវាចម្លង នៅតំបន់ភាគកណ្ដាលប្រទេសហ្វីលីពីន កាលពីថ្ងៃចន្ទ ទី១៤ ខែធ្នូ ខណៈពេលដែលព្យុះទីហ្វុងប្រភេទ Category 3 typhoon បោកបក់ក្នុងល្បឿនខ្យល់យ៉ាងខ្លាំងក្លា នៅតាមបណ្ដោយឆ្នេរសមុទ្រភាគខាងកើត ដោយនាំទាំងភ្លៀងធ្លាក់មកយ៉ាងខ្លាំង ដែលអាចបណ្ដាលឲ្យកើតទៅជាជំនន់ និងរអិលបាក់ដី។
ការិយាល័យផ្នែកឧតុនិយមនិយាយថា ព្យុះទីហ្វុង Melor ដែលត្រូវបានគេស្គាល់នៅក្នុងប្រទេសនេះ ហៅថា ព្យុះ Nona ស្ថិតនៅចម្ងាយប្រមាណ ២០៥ គីឡូម៉ែត្រភាគខាងកើតកោះ Samar ហើយបានបង្កើនឥទ្ធិពលកាន់តែខ្លាំងឡើងថែមទៀត ពីប្រភេទព្យុះ Category 2 Storm កាលពីយប់មិញ ដោយខ្យល់បក់មានល្បឿន ១៥០ គីឡូម៉ែត្រក្នុងមួយម៉ោង។
ព្យុះនេះមានកម្លាំងខ្លាំងដូចគ្នាទៅនឹងព្យុះ Haiyan ដែលជាប្រភេទ Category 5 typhoon បានបោកបក់នៅភាគកណ្ដាលប្រទេសហ្វីលីពីន កាលពីឆ្នាំ ២០១៣។ កាលណោះព្យុះ Haiyan បានសម្លាប់មនុស្សអស់ដល់ទៅ ៨,០០០នាក់ ដោយក្នុងនោះក៏នៅមានអ្នកបាត់ខ្លួនទៀតផង។
ព្យុះ Melor នេះត្រូវបានគេរំពឹងថា នឹងឡើងគោកនៅយប់ថ្ងៃចន្ទ នៅខេត្ដ Sorsogon ដែលនៅភាគអាគ្នេយ៍នៃកោះ Luzon។ អាជ្ញាធរទទួលបន្ទុកផ្នែកមហន្ដរាយដោយគ្រោះថ្នាក់ធម្មជាតិបានចេញបទបញ្ជាឲ្យបិទទ្វារសាលារៀន និងការិយាល័យរដ្ឋបាលមួយចំនួនស្របពេលចាប់ផ្ដើមធ្វើការជម្លៀសចេញ។
មានមនុស្សប្រមាណ ៨,០០០ នាក់ជាប់នៅតាមកំពង់ផែនានា បន្ទាប់ពីឆ្មាំឆ្មេរសមុទ្របានបញ្ឈប់រាល់សេវាកម្មស្រឡាងចម្លង និងផ្អាកការធ្វើនេសាទ នៅភាគកណ្ដាលប្រទេសហ្វីលីពីននោះ។
លោក Alexander Pama នាយកប្រតិបត្ដិនៃអាជ្ញាធរជាតិទទួលបន្ទុកកាត់បន្ថយគ្រោះមហន្ដរាយ និងក្រុមប្រឹក្សាផ្នែកគ្រប់គ្រងបានលើកយកមកនិយាយថា ព្យុះទីហ្វុង Melor ត្រូវបានរំពឹងថា នឹងបណ្ដាលឲ្យកើតជាជំនន់ទឹកភ្លៀងបាក់រអិលដី ជាមួយនឹងទឹករលកអាចមានកម្ពស់ដល់ទៅ ៤ ម៉ែត្រកាត់ផ្ដាច់ទាំងថាមពល និងប្រព័ន្ធគមនាគមន៍។
មានប្រមាណ ២០ ខេត្ដក្នុងនោះមានទាំងក្រុងម៉ានីលទៀតផង ស្ថិតនៅក្រោមការប្រកាសអាសន្នពីព្យុះទីហ្វុង ដោយសារតែខ្យល់បក់យ៉ាងខ្លាំងជាមួយនឹងភ្លៀង ដែលមានកម្រិតទឹកដល់ទៅ ៣០០ មីល្លីម៉ែត្រ(12 inches) ស្ថិតនៅក្នុងរង្វង់ ៣០០ គីឡូម៉ែត្រ។
ជារៀងរាល់ឆ្នាំ ប្រទេសហ្វីលីពីនរងការឆ្លងកាត់ដោយសារព្យុះធំប្រមាណ ២០ ដង៕
Reuters
ព្យុះទីហ្វុងដ៏មានកម្លាំង គំរាមកំហែងភាគកណ្ដាលនៃប្រទេសហ្វីលីពីន
0 Comments