ភ្នំពេញ ៖ កាលពីថ្ងៃទី០៩ ខែធ្នូ ឆ្នាំ២០១៥ នៅសាលប្រជុំ ទីស្តីការក្រសួងធនធានទឹក និងឧតុនិយម លោក វេង សាខុន រដ្ឋលេខាធិការ នៃក្រសួងធនធានទឹក និងឧតុនិយម បានទទួលជួបជាមួយលោក លូ ស៊ាង សេង អគ្គនាយករងនៃសហប្រតិបត្តិការអន្តរជាតិ វិទ្យាសាស្ត្រ និងបច្ចេកវិទ្យា នៃគណៈកម្មការគ្រប់គ្រងធនធានទឹកទន្លេយ៉ាងសេ និងសហការី។
លោកវេង សាខុន បានឲ្យដឹងនៅក្នុងផេកហ្វេកបុករបស់លោកថា ការអនុញ្ញាតឲ្យ គណៈកម្មការគ្រប់គ្រងធនធានទឹកទន្លេយ៉ាងសេ និងសហការី ចូលជួបគឺ ដើម្បីពិនិត្យមើល ១-សេចក្តីត្រូវការចាំបាច់ ដែលត្រូវគ្រោងឡើងសម្រាប់ក្រសួងធនធានទឹក និងឧតុនិយម ទាក់ទងទៅនឹងកម្មវិធីបណ្តុះបណ្តាលនិស្សិតវិស្វករ និងជំនាញបច្ចេកទេសវ័យក្មេងជាអ្នកបន្តវេនក្រសួងធនធានទឹក និងឧតុនិយម និងសម្ភារៈនិងឧបករណ៍សម្រាប់បំពាក់ឲ្យដល់មន្ទីរពិសោធន៍នានា នៅក្នុងវិទ្យាស្ថានជាតិធនធានទឹកដែលនឹងត្រូវបង្កើតនាពេលដ៏ខ្លីខាងមុខនេះ នៅកម្ពុជា និង២-ការពិនិត្យមើលឡើងវិញទៅលើទិន្នន័យចាំបាច់មួយចំនួន នីតិវិធី និងយន្តការដែលត្រូវប្រកាន់យកដើម្បីបង្កើនល្បឿន នៃកិច្ចសហប្រតិបត្តិការលើការរៀបចំផែនការមេរយៈពេលវែងនៃការអភិវឌ្ឍន៍ធនធានទឹកនៅកម្ពុជា។ ៣-ពិនិត្យមើលស្ថានភាពទូទៅ នៃការគ្រប់គ្រង និងប្រើប្រាស់ទឹកទន្លេមេគង្គ និងបឹងទន្លេសាប។
សូមបញ្ជាក់ថា កាលពីថ្ងៃទី១៥ រហូតដល់ថ្ងៃទី ១៩ ខែមិថុនា ឆ្នាំ២០១៥ លោក វេង សាខុន បានដឹកនាំប្រតិភូក្រសួងធនធានទឹកនិងឧតុនិយម កម្ពុជាដែលមានសមាជិកអមដំណើរចំនួន៥នាក់ បានធ្វើការពិភាក្សាការងារ និងការផ្លាស់ប្តូរទស្សនៈគ្នាទាក់ទងទៅនឹងការអភិវឌ្ឍន៍ និងគ្រប់គ្រងវិស័យធនធានទឹក ជាមួយប្រធានគណៈកម្មការធនធានទឹកទន្លេយ៉ាងសេ និងវិទ្យាស្ថាន សិក្សាគ្រោងប្លង់ ការរៀបចំផែនការនិងស្រាវជ្រាវនៃទន្លេយ៉ាងសេ ហើយនិងវិទ្យាស្ថាន ស្រាវជ្រាវវិទ្យាសាស្ត្រនៅទីក្រុងវូហាន ខេត្ត Hubei នៃសាធារណរដ្ឋប្រជាមានិតចិន។
លើសពីនេះទៅទៀត ការពិភាក្សាក៏បានផ្តោតទៅលើ ១-ការរៀបចំផែនការមេនៃការគ្រប់គ្រង និងអភិវឌ្ឍធនធានទឹក រយៈពេលមធ្យម និងវែងនៅកម្ពុជា។ ២-ការកសាងផែនការសកម្មភាពក្នុងការបង្កើតវិទ្យាស្ថានធនធានទឹកនៅកម្ពុជា។ ក្រោយពីបញ្ចប់កិច្ចប្រជុំពិភាក្សាការងារនេះមក គណប្រតិភូកម្ពុជារួមដំណើរដោយតំណាងក្រសួងធនធានទឹកចិន និងគណៈកម្មការធនធានទឹកទន្លេយ៉ាងសេ បានអញ្ជើញទៅពិនិត្យមើលពីលក្ខបច្ចេកទេស នៃការកសាងសង់ប្រព័ន្ធទំនប់ការពារទឹកជំនាន់ក្នុងតំបន់ទន្លេយ៉ាងសេ សំណង់សិល្បការ និងទំនប់វារីអគ្គិសនី Three Gorges Dam ដើម្បីពិនិត្យមើល និងស្វែងយល់នូវបច្ចេកទេសថ្មីៗផងដែរ ដែលបាននឹងកំពុងអនុវត្តន៍៕
លោកវេង សាខុនអនុញ្ញាតឲ្យគណៈកម្មការគ្រប់គ្រងធនធានទឹកទន្លេយ៉ាងសេចូលជួបពិភាក្សាការងារ
0 Comments