កណ្តាល ៖ មនុស្ស៤នាក់រងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្តកាលពីវេលាព្រឹកម៉ោង៨និង២០នាទី ថ្ងៃទី១០ ខែធ្នូ ឆ្នាំ២០១៥ តាមបណ្ដោយផ្លូវជាតិលេខ១ ត្រង់ចន្លោះគីឡូម៉ែត្រលេខ៤៨.៤៩ ស្ថិតនៅភូមិពោធិមៀវ ឃុំគគីរធំ ស្រុកកៀនស្វាយ ខេត្តកណ្តាល។
ជនរងគ្រោះទី១-ឈ្មោះ គឹម សំអុន ភេទប្រុស អាយុ៧៦ឆ្នាំ ជាអ្នកបើកបររថយន្តម៉ាកកូរ៉េទម្ងន់១តោន ពណ៌ខៀវ ពាក់ស្លាកលេខភ្នំពេញ 2B.6429 បានរងរបួសស្រាល។ ទី២-ឈ្មោះ ឆេង លីភេទប្រុស អាយុ៤៥ឆ្នាំ អ្នករួមដំណើររងរបួសស្រាល។ ទី៣-ឈ្មោះ ឡាច ធន ភេទប្រុស អាយុ៣៥ឆ្នាំ អ្នករួមដំណើររបួសធ្ងន់ និងទី៤-ឈ្មោះ ឌឿន ភេទប្រុស អាយុ២៧ឆ្នាំ អ្នករួមដំណើររងរបួសធ្ងន់ ។ ជនរងគ្រោះទាំង៤នាក់មានមុខរបរជាងស្ទូចផ្ទះមានទីលំនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល។
យោងតាមប្រភពពីអ្នកបើកបររថយន្តឈ្មោះ គឹម សំអុន បានឲ្យដឹងថា មុនពេលកើតហេតុរូបគាត់ និងក្មួយ៣នាក់ទៀតរួមដំណើរជាមួយគ្នា បើកបររថយន្តដឹកគ្រឿងស្ទូចផ្ទះចេញពីអ្នកលឿង មកផ្ទះនៅក្នុងឃុំសំរោងធំ ស្រាប់តែមកដល់ចំណុចកើតហេតុខាងលើ បានបើកវ៉ាម៉ូតូ១គ្រឿងក្នុងទិសដៅស្របគ្នាបើកវ៉ារួច ក៏បួងចង្កូតមកខាងស្ដាំវិញ ក៏ជ្រុលចង្កូតធ្លាក់មកចិញ្ចើមថ្នល់ខាងស្តាំបណ្តាលឲ្យក្រឡាប់តែម្ដង។
ក្រោយកើតហេតុកម្លាំងនគរបាលប៉ុស្តិ៍បានចុះទៅជួយអន្តរាគមន៍សម្រួលចរាចរណ៍លើដងផ្លូវកុំឲ្យកកស្ទះ។ប៉ូលិសប៉ុស្តិ៍គគីរធំបានឲ្យដឹងថា ករណីគ្រោះថ្នាក់ចរាចរណ៍នេះបង្កឡើងដោយខ្លួនឯង មិនប៉ះពាល់ឲ្យខូចខាតទ្រព្យសម្បត្តិសាធារណៈ និងរងរបួសដល់អ្នកដទៃនោះទេ។ ចំណែកអ្នករងរបួសសុទ្ធសឹងតែកូនក្មួយម្ចាស់ឡានទាំងអស់ ទើបសមត្ថកិច្ចជំនាញអនុញ្ញាតឲ្យរូបគាត់ប្រមូលសម្ភារៈ និងហៅឡានស្ទូចមកស្ទូចរថយន្តយកទៅផ្ទះខ្លួនឯង៕
ក្រឡាប់រថយន្ត ធ្វើឲ្យមនុស្ស៤នាក់រងរបួសធ្ងន់ស្រាល
0 Comments