ភ្នំពេញ ៖ សម័យប្រជុំពេញអង្គរបស់រដ្ឋសភាលើកទី៥ នីតិកាលទី៥ នៅព្រឹកថ្ងៃទី១៦ ខែធ្នូនេះ បានសម្រេចអនុម័តជាឯកច្ឆន្ទ នូវសេចក្ដីព្រាងច្បាប់ចំនួន៣។
សម័យប្រជុំរដ្ឋសភានេះ ដឹកនាំដោយសម្ដេចពញាចក្រី ហេង សំរិន ប្រធានរដ្ឋសភា និងមានកូរ៉ុមសមាជិកសភាចូលប្រជុំសរុបចំនួន១០២រូប រួមទាំងវត្តមានសម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី និងសមាជិកសភាគណបក្សសង្គ្រោះជាតិចំនួន៣៤រូប ដើម្បីពិភាក្សា និងអនុម័តលើសេចក្ដីព្រាងច្បាប់ចំនួន៣នេះ។
សេចក្ដីព្រាងច្បាប់ទាំង៣រួមមាន សេចក្ដីព្រាងច្បាប់ស្ដីពីការអនុម័តយល់ព្រមលើពិធីសារសម្រាប់ធ្វើវិសោធនកម្ម កិច្ចព្រមព្រៀងម៉ារ៉ាកេស ស្ដីពីការបង្កើតអង្គការពាណិជ្ជកម្មពិភពលោក ដើម្បីបញ្ចូលកិច្ចព្រមព្រៀងស្ដីពីកិច្ចសម្រួលពាណិជ្ជកម្ម ទៅក្នុងឧបសម្ពន្ធ១ក នៃកិច្ចព្រមព្រៀងម៉ារ៉ាកេស ត្រូវបានរដ្ឋសភាអនុម័តដោយសំឡេង១០១ លើ១០១សំឡេង។ សេចក្ដីព្រាងច្បាប់ស្ដីពីការអនុម័តយល់ព្រមលើកិច្ចព្រមព្រៀងស្ដីពីការបង្កើតមជ្ឈមណ្ឌលជីវៈចម្រុះអាស៊ាន ត្រូវបានរដ្ឋសភាអនុម័តដោយសំឡេង១០១ លើ១០១សំឡេង។ និងសេចក្ដីព្រាងច្បាប់ស្ដីពីសុខភាពសត្វ និងផលិតកម្មសត្វ ត្រូវបានរដ្ឋសភាអនុម័ត១០០សំឡេង លើ១០១សំឡេង នៃសមាជិកពេញអង្គដែលបានចូលរួម។
យោងតាមសេចក្ដីថ្លែងហេតុរបស់សេចក្ដីព្រាងច្បាប់ ដែលមាន៣មាត្រា ស្ដីពីការអនុម័តយល់ព្រមលើពិធីសារសម្រាប់ធ្វើវិសោធនកម្ម កិច្ចព្រមព្រៀងម៉ារ៉ាកេស ស្ដីពីការបង្កើតអង្គការពាណិជ្ជកម្មពិភពលោក ដើម្បីបញ្ចូលកិច្ចព្រមព្រៀង ស្ដីពីកិច្ចសម្រួលពាណិជ្ជកម្ម ទៅក្នុងឧបសម្ពន្ធ១ក នៃកិច្ចព្រមព្រៀងម៉ារ៉ាកេសនោះបញ្ជាក់ថា កិច្ចព្រមព្រៀង ស្ដីពីកិច្ចសម្របសម្រួលពាណិជ្ជកម្ម នៃអង្គការពាណិជ្ជកម្មពិភពលោក ត្រូវបានអនុម័តកាលពីខែធ្នូ ឆ្នាំ២០១៣ នៅទីក្រុងបាលីប្រទេសឥណ្ឌូណេស៊ី នាសន្និសីទលើកទី៩ របស់រដ្ឋមន្ត្រីអង្គការពាណិជ្ជកម្មពិភពលោក។ មកដល់បច្ចុប្បន្ន មានប្រទេសជាសមាជិកជាច្រើនហើយ ដែលបានផ្តល់សច្ចាប័ន។ ក្នុងឋានៈជាសមាជិកមួយដែរនោះ កម្ពុជាមានកាតព្វកិច្ចផ្តល់សច្ចាប័នលើពិធីសារសម្រាប់ធ្វើវិសោធនកម្មកិច្ចព្រមព្រៀងម៉ារ៉ាកេសនេះឲ្យបានឆាប់តាមដែលអាចធ្វើបាន ដើម្បីផលប្រយោជន៍របស់កម្ពុជា។
ចំពោះសេចក្ដីព្រាងច្បាប់ ស្ដីពីការអនុម័តយល់ព្រមលើកិច្ចព្រមព្រៀង ស្ដីពីការបង្កើតមជ្ឈមណ្ឌលជីវៈចម្រុះអាស៊ាន ដែលមាន២មាត្រា និងមាន១៤ប្រការ តាមសេចក្ដីថ្លែងហេតុបានបញ្ជាក់ថា ការផ្តល់សច្ចាប័នរបស់កម្ពុជាទៅលើច្បាប់នេះ នឹងរួមចំណែកយ៉ាងសំខាន់ធានាបាននូវនិរន្តរភាពសម្រាប់មជ្ឈមណ្ឌលជីវចម្រុះអាស៊ាន សម្រាប់អនុវត្តការងារថ្នាក់តំបន់ និងកិច្ចសហប្រតិបត្តិការ រវាងស្ថាប័នអាស៊ាន សំដៅធានាបាននូវប្រសិទ្ធភាព នៃការគ្រប់គ្រងធនធានជីវចម្រុះ ការរៀបចំយុទ្ធសាស្ត្រអាទិភាពទាក់ទង ការគ្រប់គ្រងបរិស្ថាន ធនធានធម្មជាតិ និងការគាំទ្រដល់គំនិតផ្ដួចផ្ដើមសកល នៃការធានាបាននូវការប្រើប្រាស់ធនធានធម្មជាតិប្រកបដោយនិរន្តរភាព។ ម្យ៉ាងទៀត ការផ្តល់សច្ចាប័នរបស់កម្ពុជាទៅលើកិច្ចព្រមព្រៀង ស្ដីពីការបង្កើតមជ្ឈមណ្ឌលនេះនឹងរួមចំណែកលើកកម្ពស់ការបង្រួបបង្រួម និងការពង្រឹងទំនាក់ទំនង ចំណងសាមគ្គីភាព នៃបណ្តាប្រទេសក្នុងតំបន់អាស៊ាន ដើម្បីសម្រេចទិសដៅសហគមន៍អាស៊ាន។ ការចុះសច្ចាប័ននេះកម្ពុជាត្រូវបង់វិភាគទានចំនួន៥០.០០០ដុល្លារ ដើម្បីយកទៅរក្សាទុកក្នុងធនាគារជាមួយមូលនិធិសម្រាប់មជ្ឈមណ្ឌលនេះ។
ចំណែកសេចក្ដីព្រាងច្បាប់ ស្ដីពីសុខភាពសត្វ និងផលិតកម្មសត្វ ដែលមាន២២ជំពូក និងមាន១២៤មាត្រា តាមសេចក្ដីថ្លែងហេតុបញ្ជាក់ថា ដើម្បីលើកកម្ពស់ការចិញ្ចឹមសត្វឲ្យមានការរីកចម្រើន សម្រាប់បម្រើការងារកសិកម្ម និងសម្រាប់ផ្គត់ផ្គង់សាច់ក្នុងស្រុកនិងនាំចេញក្រៅប្រទេស ពិសេសពេលសហគមន៍អាស៊ានសេដ្ឋកិច្ចអាស៊ានចូលជាធរមាននៅចុងឆ្នាំ២០១៥នោះ ចាំបាច់ត្រូវមានកំណែទម្រង់រចនាសម្ព័ន្ធ ការគ្រប់គ្រងផ្នែកសុខភាពសត្វ និងផលិតកម្មសត្វដើម្បីជំរុញការងារនេះពីថ្នាក់កណ្ដាលរហូតដល់មូលដ្ឋានធ្វើឲ្យទំនើបកម្ម និងភាពទាន់សម័យ ការពារសុខភាពមនុស្សសត្វ សុខុមាលភាពសត្វ សម្រួលពាណិជ្ជកម្មសត្វ និងផលិតផលសត្វប្រកបដោយប្រសិទ្ធភាព៕
រដ្ឋសភា អនុម័តជាឯកច្ឆន្ទសេចក្ដីព្រាងច្បាប់ចំនួន៣
0 Comments