ព្រលានយន្ដហោះនៅរដ្ឋ Tamil Nadu នៃប្រទេសឥណ្ឌា ដែលជន់លិចដោយសារភ្លៀងនោះ បានបើកដំណើរការឡើងវិញហើយកាលពីថ្ងៃអាទិត្យ ខណៈពេលដែលក្រុមបុគ្គលិកសង្គ្រោះបន្ទាន់វិញបានជួយដល់អ្នកស្រុកដល់ទៅរាប់ពាន់នាក់ ដែលរងការបង្ខំឲ្យភៀសខ្លួនចេញពីលំនៅដ្ឋានរបស់ពួកគេដែលរងការលិចលង់។
ព្រលានយន្ដហោះអន្ដរជាតិនៅក្រុង Chennai ប្រចាំរដ្ឋបានបិទទ្វារកាលពីថ្ងៃពុធ បណ្ដាលឲ្យអ្នកដំណើរវាល់ពាន់នាក់ត្រូវគាំងដំណើរ បន្ទាប់ពីភ្លៀងធ្លាក់មកយ៉ាងខ្លាំងបង្កឲ្យកើតជាជំនន់យ៉ាងធ្ងន់បំផុត ហើយបានឆក់យកជីវិតមនុស្សដល់ទៅជិត៣០០នាក់ ចាប់តាំងពីថ្ងៃទី០៩ ខែវិច្ឆិកា កន្លងមក។
អ្នកស្រុកដល់ទៅរាប់ពាន់នាក់ត្រូវបានជួយសង្គ្រោះដោយទូក ឲ្យចាកចេញពីលើដំបូលផ្ទះរបស់ពួកគេ បន្ទាប់ពីទឹកជំនន់បានពន្លិចក្រុង Chennai ដែលមានមនុស្សរស់នៅដល់ទៅជាង៤លាននាក់នោះ។ សូម្បីតែការផ្គត់ផ្គង់ទឹកស្អាត និងបណ្ដាញទូរស័ព្ទក៏រងការកាត់ផ្ដាច់ទាំងស្រុង។
កងទ័ព ព្រមទាំងបុគ្គលិកសង្គ្រោះបន្ទាន់ផ្សេងៗទៀតដែលបានសម្រុកចូលទៅកាន់រដ្ឋភាគអាគ្នេយ៍ប្រទេសនោះ ឥឡូវនេះកំពុងតែប្រញាប់ប្រញាល់ដឹកជញ្ជូនស្បៀងអាហារ ទឹកស្អាត ព្រមទាំងបរិក្ខារពេទ្យទៅឲ្យអ្នកស្រុកដែលរងការប៉ះពាល់ដោយសារតែទឹកជំនន់នោះហើយ។
ទោះជាយ៉ាងណា ក៏ភ្លៀងបែរជាធ្លាក់ចុះមកម្ដងទៀតនៅក្រុង Chennai នោះកាលពីថ្ងៃអាទិត្យ ជាការគំរាមកំហែងរំខានដល់ការខិតខំប្រឹងប្រែងក្នុងការជួយអន្ដរាគមន៍សម្អាតដងផ្លូវនានា ព្រមទាំងកម្ទេចកម្ទីរាយប៉ាយដោយសារតែអណ្ដែតតាមទឹកជន់។ ដោយឡែកការខឹងសម្បានៅតែកើតមានឡើងក្នុងចំណោមអ្នកស្រុកមួយចំនួន ដែលចោទប្រកាន់ទៅលើអាជ្ញាធរក្នុងតំបន់ពីការខកខានមិនបានជួយជនទាំងឡាយណាដែលរងការប៉ះពាល់ឲ្យបានទាន់ពេលវេលានោះ៕
AFP
ព្រលានយន្ដហោះនៅភាគខាងត្បូងប្រទេសឥណ្ឌា ដែលរងការជន់លិចដោយភ្លៀង បានបើកវិញហើយ
0 Comments