ប្រទេសថៃបាននិយាយកាលពីថ្ងៃអាទិត្យថា ខ្លួនកំពុងស្វែងរកជនជាតិស៊ីរីចំនួនបួននាក់ដែលទិដ្ឋាការរបស់ពួកគេហួសពេលកំណត់ ខណៈដែលប្រទេសនេះគឺមានការប្រុងប្រយ័ត្នខ្ពស់ បន្ទាប់ពីរុស្ស៊ីបានព្រមានពីលទ្ធភាពនៃការវាយប្រហារដោយសមាជិកនៃក្រុមរដ្ឋឥស្លាមស៊ីរី។
អាជ្ញាធរមិនបានលើកឡើងថា បុរសទាំងបួននាក់នោះគឺជាការគំរាមកំហែងសន្តិសុខនោះទេ ប៉ុន្តែបាននិយាយថា ពួកគេបានបាត់ខ្លួនហើយ ពេលដែលបានចេញផ្សាយឈ្មោះ និងរូបថតរបស់ពួកគេ។
កាលពីសប្ដាហ៍មុនសេវាស៊ើបការណ៍សម្ងាត់របស់រុស្ស៊ីបានព្រមានប្រទេសថៃថា ជនជាតិស៊ីរីចំនួន១០នាក់ ដែលជាប់ទាក់ទងជាមួយនឹងក្រុមរដ្ឋឥស្លាមបានចូលក្នុងប្រទេសថៃកាលពីខែតុលាក្នុងគោលបំណងវាយប្រហារផលប្រយោជន៍របស់រុស្ស៊ី។
ការព្រមាននេះបានជំរុញឲ្យប្រទេសថៃរឹតបណ្ដឹងសន្តិសុខ នៅជុំវិញគោលដៅដ៏មានសក្ដានុពលដោយរួមបញ្ចូលទាំងនៅទីក្រុងប៉ាតាយ៉ា និងខេត្តភូកេតផងដែរ ដែលទីតាំងទាំងពីរនេះមានប្រជាប្រិយភាពជាមួយភ្ញៀវទេសចរ និងជាប្រភពរបស់សហគមន៍ជនជាតិរុស្ស៊ី។
ទោះជាយ៉ាងណាក៏ដោយ ការិយាល័យអន្តោប្រវេសន៍បានថ្លែងថា បុរសជនជាតិស៊ីរីចំនួនបួននាក់បានព្យាយាមចូលក្នុងប្រទេសថៃចន្លោះពីខែមេសា ដល់ ខែតុលា ដែលមិនស្ថិតនៅក្នុងរយៈពេលដែលបានបញ្ជាក់ដោយសេវាស៊ើបការណ៍សម្ងាត់របស់រុស្ស៊ីនោះទេ។
ស្នងការការិយាល័យអន្តោប្រវេសន៍ Nathathorn Prausoontorn បាននិយាយថា សម្រាប់អ្នកដែលបាត់ខ្លួនទាំងបួននាក់នោះគឺយើងគ្រាន់តែចង់រកពួកគេដើម្បីចោទប្រកាន់ដោយសារតែពួកគេស្នាក់នៅហួសពេលកំណត់តែប៉ុណ្ណោះ។
ស្ថានទូតបរទេសមួយចំនួននៅក្នុងទីក្រុងបាងកក ហើយអង្គការសហប្រជាជាតិដែលមានទីស្នាក់ការកណ្ដាលប្រចាំតំបន់របស់ខ្លួននៅក្នុងរដ្ឋធានីថៃមួយនេះបានចេញការព្រមានផ្នែកសន្តិសុខចំពោះបុគ្គលិក បន្ទាប់ពីមានការព្រមានពីប្រទេសរុស្ស៊ី។
គួរបញ្ជាក់ថា ក្នុងខែសីហា មនុស្ស២០នាក់ត្រូវបានសម្លាប់ក្នុងការបំផ្ទុះគ្រាប់បែកមួយ នៅទីសក្ការៈបូជាទីក្រុងបាងកក ដែលវាជាឧប្បត្តិហេតុដ៏អាក្រក់បំផុតនៅក្នុងប្រវត្តិសាស្ត្ររបស់ប្រទេសថៃ៕
Reuters
ប៉ូលិសថៃ ៖ ជនជាតិស៊ីរីបួននាក់បានបាត់ខ្លួន ក្រោយពេលបានចេញផ្សាយឈ្មោះ និងរូបថតរបស់ពួកគេ
0 Comments