កំពង់ឆ្នាំង ៖ ឯកឧត្តមបណ្ឌិត អ៊ុក រ៉ាប៊ុន បានថ្លែងថា “ ខ្ញុំសប្បាយចិត្តខ្លាំងណាស់ ដោយបានឃើញបងប្អូនប្រជាកសិករទទួលបានទិន្នផលខ្ពស់ក្នុងការប្រមូលផលស្រូវឆ្នាំនេះ ហើយនេះក៏ដោយសារបងប្អូនបានយល់ដឹង និងទទួលយកតាមការណែនាំរបស់មន្ទីរកសិកម្មខេត្ត ដែលតែងតែពន្យល់ និងបង្ហាត់បង្រៀនអំពីការដាំដុះដំណាំស្រូវ ដោយយកែប្រែពីការដាំស្រូវធ្ងន់ មកដាំស្រូវកណ្ដាលវិញ” ។
ឯកឧត្តម បណ្ឌិត អ៊ុក រ៉ាប៊ុន មានប្រសាសន៍បែបនេះនៅព្រឹកថ្ងៃទី ០៦ ខែធ្នូ ឆ្នាំ២០១៥ ក្នុងពេលដឹកនាំក្រុមការងារចុះមកត្រួតពិនិត្យការប្រមូលស្រូវ និងជួយច្រូតស្រូវប្រជាពលរដ្ឋក្នុងភូមិប្រខ្លូត ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំង។
នៅក្នុងពេលនោះដែរ ឯកឧត្តមក៏បានសួរ និងបានស្តាប់ចម្លើយស្ត្រីប្រជាកសិករ និងជាម្ចាស់ស្រែឈ្មោះ ម៉ម យួន អាយុ៧០ឆ្នាំ បាននិយាយឲ្យដឹងថា ឆ្នាំមុនក្រុមគ្រួសារគាត់បានធ្វើស្រូវធ្ងន់មិនបានទទួលផលទេ ដោយសារតែគ្មានទឹកគ្រប់គ្រាន់នៅចុងរដូវ។ ប៉ុន្តែនៅក្នុងឆ្នាំនេះដោយសារតែមានការណែនាំពីមន្ទីរកសិកម្មខេត្ត និងកសិកម្មស្រុក ក្រុមគ្រួសារគាត់បានផ្លាស់ប្ដូរមកធ្វើស្រូវកណ្ដាលវិញ ទើបទទួលបានទិន្នផលល្អពេញចិត្តបែបនេះ។ ស្ត្រីជាម្ចាស់ស្រែក៏បានថ្លែងអំណរគុណយ៉ាងជ្រាលជ្រៅដល់ឯកឧត្តមរដ្ឋមន្ត្រី និងក្រុមការងារ ដែលបានចុះមកជួយច្រូតស្រូវរបស់ក្រុមគ្រួសាគាត់នៅពេលព្រឹកនេះ ដែលជាធម្មតា បើគ្មានការជួយច្រូតបែបនេះទេ ក្រុមគ្រួសាររបស់មានគ្នាតែ២នាក់ អាចច្រូតស្រូវ១ហិកតានេះហើយ ក្នុងរយៈពេល ២ទៅ៣ថ្ងៃឯណោះ។
ឯកឧត្តមបណ្ឌិត អ៊ុក រ៉ាប៊ុន ក៏បានផ្តាំផ្ញើដល់លោកប្រធានមន្ទីរកសិកម្មខេត្ត និងការិយាល័យកសិកម្មស្រុកឲ្យយកចិត្តទុកដាក់ចុះអប់រំ និងណែនាំដល់ប្រជាពលរដ្ឋជាបន្តទៀតក្នុងការផ្លាស់ប្ដូរពីទម្លាប់ការធ្វើស្រូវធ្ងន់មកធ្វើស្រូវកណ្ដាល ឬ ស្រូវស្រាលវិញ ព្រោះថា ការកែប្រែទម្លាប់បែបនេះ គឺដើម្បីសម្របសម្រួលទៅនឹងការប្រែប្រួលអាកាសធាតុ ដែលកំពុងកើតឡើងសព្វថ្ងៃនេះ។
ដោយឡែក លោក ងិន ហ៊ុន ប្រធានមន្ទីរកសិកម្មកខេត្តកំពង់ឆ្នាំងបានឲ្យដឹងថា ការប្រមូលផលស្រូវរដូវវស្សាគិតត្រឹមថ្ងៃទី០៦ ខែធ្នូ ឆ្នាំ២០១៥នេះ ប្រជាកសិករបានប្រមូលផលស្រូវបានជាង៣ម៉ឺនហិកតាហើយ នៅលើផ្ទៃដីដែលអនុវត្តន៍បានចំនួន១២៥០៨១ហិកតា ស្មើនឹង២៧ ភាគរយ ដោយទទួលផលបានជាមធ្យម ២តោន៦០០គីឡូក្រាម ក្នុងហិកតា។ ចំណែកស្រូវប្រាំងមកដល់ថ្ងៃនេះធ្វើបានជាង១៦. ០០០ហិកតាហើយ លើផែនការចំនួន២៩. ៧០០ហិកតា ស្មើនឹង៦៧ភាគរយ។
ដោយឡែកការសភាពការណ៍ទឹកស្រោចស្រពស្រូវប្រាំងគឺធានាបានល្អមិនទាន់មានការប្រឈមនៅឡើយទេ៕
ឯកឧត្តមរដ្ឋមន្ត្រីក្រសួងកសិកម្មដឹកនាំក្រុមការងារចុះពិនិត្យការប្រមូលផលស្រូវ និងចុះជួយច្រូតស្រូវប្រជាពលរដ្ឋក្នុងឃុំធ្លកវៀន
0 Comments