អ្នកចាត់ការក្លិបមាន់ខ្នាយមាស Tottenham Hotspur លោក Mauricio Pochettino បានឲ្យដឹងថា ខ្សែប្រយុទ្ធ Clinton N’Jie នឹងអវត្តមានចូលលេងឲ្យក្លិបមួយនេះយ៉ាងហោចណាស់រយៈពេល ២ខែ បន្ទាប់ពីមានបញ្ហារបួសជង្គង់។
កីឡាករសញ្ជាតិកាមេរ៉ូន វ័យ២២ឆ្នាំរូបនេះបានធ្វើការវះកាត់កាលពីសប្ដាហ៍មុន បន្ទាប់ពីរងរបួសសរសៃពួរជង្គង់ អំឡុងពេលមានការប៉ះទង្គិចគ្នានៅក្នុងតង់ទីពីរនៃជំនួបរវាងក្លិបមាន់ខ្នាយមាស Tottenham Hotspur ជាមួយនឹងក្លិប Monaco ក្នុងព្រឹត្តិការណ៍បាល់ទាត់ Europa League កាលពីថ្ងៃទី១០ ខែធ្នូកន្លងទៅនេះ។
ថ្លែងនៅក្នុងសន្និសីទសារព័ត៌មានមួយអ្នកចាត់ការ Mauricio Pochettino បានឲ្យដឹងថា ក្នុងជំនួបជាមួយក្លិបចាបលឿង Norwich City នៅថ្ងៃសៅរ៍នេះនឹងមិនមានវត្តមានខ្សែប្រយុទ្ធ Clinton N’Jie មកចូលរួមឡើយ ហើយយើងក៏មិនទាន់ដឹងច្បាស់ពីស្ថានភាពជំងឺរបស់កីឡាកររូបនេះនៅឡើយដែរ ដោយគ្រាន់តែដឹងថា Clinton N’Jie នឹងសម្រាកព្យាបាលរបួសមួយនេះប្រហែលជា ២ខែទៅ២ខែកន្លះ។
Mauricio Pochettino បន្ថែមថា យើងកំពុងតែមានការព្រួយបារម្ភចំពោះបញ្ហារបួសរបស់ខ្សែប្រយុទ្ធ Clinton N’Jie ព្រោះថាកីឡាករវ័យក្មេងមួយរូបនេះកំពុងមានការកោតសរសើរ និងស្ញប់ស្ញែងពីសំណាក់អ្នកគាំទ្រ បន្ទាប់ពីបង្ហាញទម្រង់លងបានយ៉ាងល្អនៅក្នុងការប្រកួតនាពេលកន្លងមកនេះ។
បើទោះជាខ្សែប្រយុទ្ធ Clinton N’Jie មានបញ្ហារបួសក៏ដោយ អ្នកចាត់ការ Mauricio Pochettino ជឿជាក់ថា ក្លិប Tottenham Hotspur នឹងអាចរកជ័យជម្នះបានលើក្លិប Norwich City នៅថ្ងៃ Boxing Day ដើម្បីរំកិលខ្លួនទៅលំដាប់លេខរៀងទី៣ក្នុងតារាងចំណាត់ថ្នាក់ក្របខ័ណ្ឌ English Premier League៕
ខ្សែប្រយុទ្ធ Clinton អវត្តមានចូលលេងឲ្យក្លិបTottenham Hotspur រយៈពេល២ខែកន្លះដោយសាររបួសសរសៃពួរជង្គង់
0 Comments