លោក មាស ចាន់ណា គ្រូបង្វឹករបស់ក្រុមណាហ្គាវើល បានលើកទឹកចិត្តកូនក្រុមមុនមុនពេលប៉ះក្រុមភ្នំពេញក្រោន នៅវគ្គផ្តាច់ព្រ័ត្រជើងទី២ ក្នុងពានរង្វាន់លីកមិត្តហ្វូនខេមបឌានលីក២០១៥ (Metfone Cambodian League 2015) បើទោះជាកាលពីជើងទី១ ក្រុមលោកបរាជ័យក្រោមថ្វីជើងភ្នំពេញក្រោន ដោយលទ្ធផល ២ ទល់ ០ ក៏ដោយ។
លោកគ្រូបង្វឹកវ័យ៣០ឆ្នាំប្លាយរូបនេះបានលើកឡើងថា «យើងនៅមានពេល ៩០ នាទីទៀតនៅក្នុងដៃសូមកុំអស់សង្ឃឹម ដូច្នេះសូមបងប្អូន ត្រូវខំប្រមូលអារម្មណ៍ហ្វឹកហាត់បន្តទៀត និង មានទំនុកចិត្តឡើង។ ខ្ញុំនៅតែមានជំនឿចិត្តថា បងប្អូននឹងធ្វើវាបាន»។
កាលប្រកួតជើងទី១ នាល្ងាចថ្ងៃអាទិត្យ ទី ២២ ខែ វិច្ឆិកា ឆ្នាំ ២០១៥ កន្លងទៅ ភ្នំពេញក្រោន បានយកឈ្នះណាហ្គាវើល ២ ទល់ ១ ដែល ២ គ្រាប់របស់ភ្នំពេញក្រោន រកបានដោយកីឡាករ Bisan Goerge នៅនាទី ៥០ និងកីឡាករ Booysen Shane នៅនាទី ៩០។ ណាហ្គាវើល ជាក្រុមចំណាត់ថ្នាក់លេខ៤ នៅវគ្គសន្សំពិន្ទុ ហើយនៅវគ្គពាក់កណ្ដាលផ្ដាច់ព្រ័ត្រក្រុមមួយនេះបានឈ្នះក្រុមជើងឯករងឆ្នាំចាស់ បឹងកេតអង្គរ ក្នុងលទ្ធផលសរុបទាំង២ជើង ៤ ទល់ ៣។
និយាយពីលោក មាស ចាន់ណា ទើបតែចូលកាន់តំណែងនៅរដូវកាលនេះប៉ុណ្ណោះ ប៉ុន្ដែកាលពីដើមឆ្នាំ ២០១៥ លោកបានជួយក្រុមឱ្យឡើងដល់វគ្គផ្ដាច់ព្រ័ត្រ ក្នុងពានរង្វាន់សម្ដេច ហ៊ុន សែន (Hun Sen Cup) ឆ្នាំ២០១៥ តែត្រូវរកបរាជ័យក្រោមថ្វីដៃក្រុមម្ចាស់ផ្ទះស្វាយរៀងអែហ្វស៊ី។ នេះជាលើកទី២ ហើយដែលលោកដឹកនាំក្រុមឡើងដល់វគ្គផ្ដាច់ព្រ័ត្រ សាជាថ្មី។
ក្រុមលោក មាស ចាន់ណា កំពុងដឹកនាំកូនក្រុមសំងំហ្វឹកហាត់លើទីលានបាល់ទាត់សាលាជាតិកសិកម្មព្រែកលៀប។ សម្រាប់វគ្គផ្ដាច់ព្រ័ត្រនៅជើងទី២ រវាងក្រុមណាហ្គាវើល និងភ្នំពេញក្រោន ក្នុងពានរង្វាន់លីកកំពូលកម្ពុជានេះ នឹងធ្វើឡើងនៅពហុកីឡដ្ឋានជាតិ ក្នុងរាជធានីភ្នំពេញ សាជាថ្មីនាថ្ងៃទី ១២ ខែ ធ្នូ ឆ្នាំ២០១៥ ម៉ោង៦ល្ងាច ព្រមទាំងមានផ្សាយផ្ទាល់តាមប៉ុស្ដិ៍ BTV ផងដែរ៕
MCL 2015 ៖ គ្រូណាហ្គាវើល នៅសល់ ៩០ នាទីទៀតក្នុងការវាយបកវិញក្នុងវគ្គផ្ដាច់ព្រ័ត្រ
0 Comments