ពានរង្វាន់បាល់ទាត់ឈ្មោះថា Soccer League 2015 ដែលរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក) សហការជាមួយសហព័ន្ធកីឡាបាល់ទាត់ជាតិកម្ពុជា (FFC) កំពុងដំណើរការប្រកួតជុំទី២ របស់ខ្លួន។
សម្រាប់លទ្ធផលប្រកួតនៅថ្ងៃទី ២ ខែ ធ្នូ ឆ្នាំ ២០១៥ នេះក្រុមស.ស.យ.ក ខណ្ឌពោធិ៍សែនជ័យ ចាញ់ ក្រុមយុវជនវិចតូរីអែហ្វស៊ី ២ ទល់ ០ លើទីលានកីឡដ្ឋានវេស្ទើន ហើយគូបន្ទាប់ ក្រុមយុវជនកសិកម្ម ចាញ់ក្រុម ស.ស.យ.ក ខេត្តស្វាយរៀង ៦ ទល់ ១។ ចំណែកក្រុមព្រីមៀមស្ព័តក្លិប ចាញ់ក្រុម ស.ស.យ.ក ខេត្តកណ្ដាល ៣ ទល់ ១ លើទីលានពហុកីឡដ្ឋានជាតិ ហើយគូបន្ទាប់ក្រុមបាល់ទាត់ព្រែកជ័យកីឡា ចាញ់ក្រុមពេទ្យស្ម័គ្រចិត្តយុវជនសម្ដេចតេជោ ២ ទល់ ១។
ចំពោះលទ្ធផលនៅថ្ងៃទី៣ ខែ ធ្នូ ឆ្នាំ ២០១៥ ម្សិលមិញក្រុម យុវជនខេត្តកំពង់ចាម ឈ្នះក្រុម ស.ស.យ.ក ខេត្តព្រះសីហនុ ៣ ទល់ ១ នៅទីលានកីឡដ្ឋានវេស្ទើន ហើយក្រុមសម្ព័ន្ធ គ.ស.ន.ប.ក ឈ្នះ ក្រុមសកម្មជនយុវជន ក.៧៧ ដោយលទ្ធផល ២ ទល់ ០។ ចំណែកក្រុមសាកលវិទ្យាល័យ មេគង្គកម្ពុជា ឈ្នះក្រុម ស.ស.យ.ក ខេត្តពោធិ៍សាត់ នៅទីលានពហុកីឡដ្ឋានជាតិ ហើយក្រុម ស.ស.យ.ក ខេត្តកំពង់ស្ពឺ ស្មើគ្នាជាមួយ សាលាខ័ណ្ឌទួលគោក ៣ ទល់ ៣។
ចំណែកកម្មវិធីប្រកួតសម្រាប់ថ្ងៃសុក្រ ទី ៤ ខែ វិច្ឆិកា ឆ្នាំ ២០១៥ នេះក្រុមកងទ័ពជើងគោក ប្រកួតជាមួយក្រុមពិស្ណុការអេហ្វស៊ី លើទីលានកីឡដ្ឋានវេស្ទើន វេលាម៉ោង ១៤:០០ ហើយក្រុមយុវជនក្នុងបុព្វហេតុមាតុភូមិ ត្រូវជួប ស.ស.យ.ក ខេត្តកំពង់ចាម វេលាម៉ោង ១៦:០០ ខណៈក្រុម ស.ស.យ.ក ក្រុងកំពង់ឆ្នាំង ប៉ះក្រុម អេន ធី ស្ព័ត ហ្វេសស៊ី វេលាម៉ោង ១៤:០០ លើទីលានពហុកីឡដ្ឋាននិងចុងក្រោយក្រុម ភ្នំពេញកុំព្យូរទ័រ ប៉ះក្រុម ឱម៉ាល់ ទ្រូប្រ៊េន។
សូមបញ្ជាក់ថាជុំទី២នេះគណៈកម្មការបានបែងចែកក្រុមដែលនៅសល់ចំនួន ៣២ ទៅជា ៨ពូល ក្នុងមួយពូលមាន៤ក្រុម ដើម្បីប្រកួតជម្រុះ រកក្រុមមានពិន្ទុច្រើន ជាងគេក្នុងពូលនីមួយៗ ឡើងទៅលេងវគ្គបន្ដ។ ការប្រកួតពានរង្វាន់ Soccer League 2015 នេះរៀបចំជាវគ្គជម្រុះបឋម និង វគ្គជម្រុះជុំផ្ដាច់ព្រ័ត្រ នៅ ៣ កីឡដ្ឋានផ្សេងៗគ្នា។ សម្រាប់ការប្រកួតជម្រុះវគ្គបឋមពីចាប់ផ្ដើមពីថ្ងៃទី ១ ដល់ ១០ ខែ វិច្ឆិកា ឆ្នាំ ២០១៥ ចំណែកវគ្គ៣២ ក្រុមចុងក្រោយដែលជាជុំជម្រុះផ្ដាច់ព្រ័ត្រចាប់ដំណើរការពីថ្ងៃទី ២១ វិច្ឆិកា ដល់ ២៦ ខែធ្នូ ឆ្នាំ ២០១៥៕
លទ្ធផលពានរង្វាន់ Soccer League 2015 ចំនួន ២ ថ្ងៃចុងក្រោយ
0 Comments