ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិកម្ពុជា បានបញ្ជាក់ពីការជួយពលករខ្មែរនៅបរទេស និងស្ត្រីខ្មែររងគ្រោះនៅតាមបណ្តាប្រទេសមួយចំនួនដូចជា ប្រទេសឥណ្ឌូណេស៊ី ឡាវ ថៃ និងម៉ាឡេស៊ី នារយៈពេលចុងក្រោយ នេះបើយោងតាមមន្ត្រីអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា។
លោក ជុំ សុន្ទរី បានថ្លែងនៅថ្ងៃទី០៣ ខែធ្នូ ឆ្នាំ២០១៥ ថា ទី១- ស្ថានឯកអគ្គរាជទូតកម្ពុជាប្រចាំប្រទេសឥណ្ឌូណេស៊ី បានអន្តរាគមន៍ជួយឲ្យ មានការដោះលែងពលករខ្មែររងគ្រោះចំនួន០៣ រូប ដែលត្រូវបានគេជួញដូរទៅធ្វើការខុសច្បាប់ នៅប្រទេសឥណ្ឌូណេស៊ី ហើយត្រូវបានអាជ្ញាធរឥណ្ឌូណេស៊ី ឃាត់ខ្លួនរក្សាទុកនៅកន្លែង ឃុំឃាំងអន្តោប្រវេសន៍នៃកោះ Riau ប្រទេសឥណ្ឌូណេស៊ី។ ពលករខ្មែរទាំង០៣ រូប មានឈ្មោះ ១, ខុន ភារៈ អាយុ ២៧ ឆ្នាំ រស់នៅភូមិសាមគ្គី១ ឃុំទឹកថ្លា ស្រុកកំរៀង ខេត្ត បាត់ដំបង ត្រូវបានអាជ្ញាធរឥណ្ឌូណេស៊ីឃាត់ខ្លួនកាលពីថ្ងៃទី ០៣ ខែឧសភា ឆ្នាំ២០១៥ នៅកោះ Tarempa ។ ២, ជ្រាង ប៊ុនរី អាយុ ២៦ ឆ្នាំ រស់នៅភូមិច្រកម្រះ ឃុំអង្គព្រះស្រែ ស្រុករមាសហែក ខេត្តស្វាយរៀង ត្រូវបានអាជ្ញាធរឥណ្ឌូណេស៊ីឃាត់ខ្លួនកាលពីថ្ងៃទី ០៣ ខែ ឧសភា ឆ្នាំ២០១៥ នៅកោះ Tarempa ។ ៣, រិទ្ធ ឌឿ អាយុ ៣៤ ឆ្នាំ មានស្រុកកំណើត នៅភូមិ ស្ទឹងតូច ឃុំរលាភ ស្រុកសំពៅមាស ខេត្តពោធិ៍សាត់ ត្រូវបានអាជ្ញាធរឥណ្ឌូណេស៊ីឃាត់ខ្លួនកាលពី ខែមេសា ឆ្នាំ២០១៥ នៅកោះ Natuna។ ស្ថានទូតបានចេញលិខិតធ្វើដំណើរបណ្ដោះអាសន្នដល់ពលករខ្មែរទាំង០៣ រូប ហើយ បច្ចុប្បន្នស្ថានទូតកំពុងសម្របសម្រួលរៀបចំមាតុភូមិនិវត្តន៍របស់ពលករទាំង ០៣រូបនេះ។
ទី២- ស្ថានឯកអគ្គរាជទូតកម្ពុជាប្រចាំប្រទេសឡាវ បានអន្តរាគមន៍អោយអាជ្ញាធរមានសមត្ថកិច្ច ឡាវ ដោះលែងពលរដ្ឋខ្មែរចំនួន ១៤នាក់ ដែលត្រូវបានប៉ូលិសក្រុងវៀងច័ន្ទឃាត់ខ្លួនដោយពុំ មានលិខិតស្នាមក្នុងការធ្វើដំណើរនៅប្រទេសឡាវ។ ភាគីឡាវ កំពុងដំណើរការសំណុំរឿងនោះ តាមនីតិវិធីច្បាប់ដើម្បីពិនិត្យ និងសម្រួលឲ្យ ពលករខ្មែរទាំង១៤ នាក់ បានធ្វើមាតុភូមិនិវត្តន៍នៅពេលឆាប់ៗនេះ។
ទី៣- ស្ថានអគ្គកុងស៊ុលកម្ពុជាប្រចាំខេត្តសាកែវ បានអន្តរាគមន៍ជាមួយអាជ្ញាធរថៃ អោយ ដោះលែងពលករខ្មែរ៧០ នាក់ ដែលត្រូវឃាត់ខ្លួនពីបទមកធ្វើការដោយខុសច្បាប់នៅប្រទេស ថៃ។
លោក ជុំ សុន្ទរី បានបញ្ជាក់ថា ពលករចំនួន២៧នាក់ ជាពលករដែលទៅធ្វើការ តាមរយៈសមាគមកសិកម្មព្រំដែនបូរ៉ាផា ត្រូវបានអាជ្ញាធរថៃដោះលែងឲ្យទៅធ្វើការជាធម្មតាវិញហើយ តាមការធានាពីប្រធានសមាគមខាងលើ តាមការរៀបចំរបស់ស្ថានអគ្គកុងស៊ុល។ ចំណែកពលករខ្មែរ៤៣នាក់ ទៀត ដោយពុំមានថៅកែមកធានា ស្ថានអគ្គកុងស៊ុលកម្ពុជា បានសហការជាមួយអាជ្ញាធរថៃ ដើម្បីជួយសម្រួលដល់ពួកគេឲ្យបានវិលត្រឡប់មកកម្ពុជាវិញ តាមច្រកទ្វារអន្តរជាតិបោយប៉ែត កាលពីថ្ងៃទី ៣០ ខែ វិច្ឆិកា ឆ្នាំ២០១៥។
ទី៤- ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានអន្តរាគមន៍ជួយពលការិនីខ្មែរ០១ រូប ឈ្មោះ រ៉ាន់ ផល្លី អាយុ ១៩ឆ្នាំ នៅភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ ក្រុងភ្នំពេញ បានទៅធ្វើការជាអ្នកបម្រើនៅក្នុងភោជនីយដ្ឋាននៅប្រទេសម៉ាឡេស៊ី កាលពីថ្ងៃទី ០៩ ខែ មេសា ឆ្នាំ២០១៥ តាមរយៈក្រុមហ៊ុន Master Cam ហើយជួបការលំបាកក្នុងការងារពេក ក៏បានមកសុំឲ្យស្ថានទូតជួយនៅថ្ងៃទី ១៩ ខែ វិច្ឆិកា ឆ្នាំ ២០១៥ ឲ្យបានវិលត្រឡប់មកកម្ពុជាវិញ។
ក្នុងឱកាសចូលរួមកិច្ចប្រជុំកំពូលអាស៊ានលើកទី២៧ នៅទីក្រុងកូឡាឡាំពួរ ពីថ្ងៃទី ២០-២២ ខែវិច្ឆិកា ឆ្នាំ ២០១៥ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានឧបត្ថម្ភថ្លៃសំបុត្រយន្តហោះនិងបង់ពិន័យឲ្យការិយាល័យអន្តោប្រវេសន៍ម៉ាឡេស៊ី ដើម្បីឲ្យពលការិនី រ៉ាន់ ផល្លី បានវិលត្រឡប់មកកម្ពុជាវិញ។
តាមមន្ត្រីអ្នកនាំពាក្យបានបញ្ជាក់ថា អំឡុងពេលរង់ចាំការត្រឡប់មកកម្ពុជាវិញ ស្ថានទូតបានចេញលិខិតធ្វើដំណើរបណ្ដោះអាសន្ន និងបានផ្តល់កន្លែងស្នាក់នៅ និងហូប-ចុក ដល់ពលការិនីនេះ។ ពលការិនី រ៉ាន់ ផល្លី នឹងមកដល់អាកាសយានដ្ឋានអន្តរជាតិភ្នំពេញ នៅថ្ងៃទី ០៤ ខែធ្នូ ឆ្នាំ ២០១៥ វេលាម៉ោង៤រសៀល តាមជើងយន្តហោះ AK៥៣៤។
សូមបញ្ជាក់ថា ក្រសួងការបរទេស និងសហប្រតិបត្តិការអន្តរជាតិ តែងតែបានធ្វើការ ណែនាំជាប់ជាប្រចាំដល់ស្ថានតំណាងកម្ពុជានៅក្រៅប្រទេសទាំងអស់ ឲ្យយកចិត្តទុកដាក់ខ្ពស់ ក្នុងការជួយដោះស្រាយបញ្ហារបស់ពលរដ្ឋកម្ពុជា ពិសេសគឺពលករខ្មែរនៅបរទេស និងស្ត្រីខ្មែរ ដែលរងគ្រោះ ពីការជួញដូរមនុស្សនៅបរទេស។
ស្ថានតំណាងកម្ពុជានៅក្រៅប្រទេសទាំងអស់ ជានិច្ចកាលតែងបានសហការជាមួយអាជ្ញាធរ មានសមត្ថកិច្ចនៃប្រទេសម្ចាស់ផ្ទះ ក្នុងការជួយអន្តរាគមន៍ដោះស្រាយរាល់បញ្ហាដែលកើតមាន ចំពោះពលរដ្ឋកម្ពុជាគ្រប់រូប ដែលជាជនរងគ្រោះពីការជួញដូរមនុស្ស ឬ ពីការរំលោភបំពានផ្សេងៗ ពីសំណាក់និយោជក ការធ្វើចំណាកស្រុកទៅធ្វើការនៅក្រៅប្រទេសដោយខុសច្បាប់ ផ្ដល់ការ គាំទ្រផ្នែកច្បាប់ការទាមទារសំណងផ្សេងៗ និងសម្រួលដល់ការធ្វើមាតុភូមិនិវត្តន៍ជាដើម៕
ក្រសួងការបរទេសកម្ពុជាបញ្ជាក់ពីការជួយពលករខ្មែររងគ្រោះនៅប្រទេសឥណ្ឌូណេស៊ី ឡាវ ថៃ និងម៉ាឡេស៊ី
0 Comments