ភ្នំពេញ ៖ តំណាងសហព័ន្ធសហជីព និងសមាគម ដែលធ្វើការលើវិស័យការងារកម្មករតាមបណ្តារោងចក្រនៅកម្ពុជា កាលពីព្រឹកថ្ងៃទី០៣ ខែធ្នូ ឆ្នាំ២០១៥ នាំគ្នាឡើងទៅដល់មុខរដ្ឋសភា ដើម្បីស្នើសុំជួបគណៈកម្មការនីតិកម្ម និងយុត្តិធម៌នៃរដ្ឋសភា ដើម្បីពិភាក្សាលើសេចក្តីព្រាងច្បាប់ស្តីពីសហជីព និងស្នើដាក់បញ្ចូលសំណើរួមរបស់សហជីពមួយចំនួនចូលទៅក្នុងសេចក្តីព្រាងច្បាប់នោះ។
សេចក្តីព្រាងច្បាប់សហជីព មាន១៧ ជំពូក និង៩១ មាត្រា កាលពីថ្ងៃទី១៣ ខែវិច្ឆិកា ឆ្នាំ២០១៥ ត្រូវបានគណៈរដ្ឋមន្ត្រីសម្រេចឆ្លងមករដ្ឋសភា ហើយរដ្ឋសភាបានបញ្ជូនសេចក្តីព្រាងនេះឲ្យគណៈកម្មការនីតិកម្ម និងយុត្តិធម៌ ដើម្បីត្រួតពិនិត្យកាលពីពេលថ្មីៗនេះ។
នៅក្នុងលិខិត ដែលដាក់ជូនសម្តេចអគ្គមហាពញាចក្រី ហេង សំរិន ប្រធានរដ្ឋសភាជាតិ ក្រុមតំណាងសហព័ន្ធសហជីព និងសមាគមបានលើកឡើងថា សហជីពមានការខកចិត្តយ៉ាងខ្លាំងដោយក្រសួងការងារមិនបានបន្តពិភាក្សាលើចំណុច ដែលជាក្តីបារម្ភរបស់សហជីពឲ្យបានទូលំទូលាយ និងគ្រប់គ្រាន់ក្នុងការធានាគុណភាព នៃសេចក្តីព្រាងច្បាប់នេះ ហើយខ្លឹមសារក្នុងមាត្រាខ្លះចែងមិនច្បាស់លាស់ និងបង្កប់ន័យអាចនាំឲ្យមានការបកស្រាយរៀងៗខ្លួនបង្កជា ជម្លោះនៅពេលច្បាប់នេះត្រូវបានអនុម័តឲ្យប្រើប្រាស់។
តាមការពិនិត្យ ជាទូទៅ ច្បាប់នេះមានគោលបំណងរឹតត្បិតសិទ្ធិសេរីភាពរបស់កម្មករនិយោជិត ក្នុងការអនុវត្តសិទ្ធិសហជីព ដើម្បីលើកកម្ពស់លក្ខខណ្ឌការងារសមរម្យនិងជីវភាពរស់នៅបានល្អប្រសើរជូនបងប្អូនកម្មករនិយោជិតនៅក្នុងព្រះរាជាណាចក្រកម្ពុជា។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្ពុជា បានថ្លែងទៅកាន់អ្នកសារព័ត៌មាននៅខាងមុខរដ្ឋសភាថា តំណាងសហជីពលើកមកនាពេលនេះ ដើម្បីសុំឲ្យសភាជាតិពិនិត្យឡើងវិញទៅលើសេចក្តីព្រាងច្បាប់សហជីព ពីព្រោះសហជីពមើលឃើញថា ច្បាប់នេះមិនបានផ្តល់សិទ្ធិសេរីភាពពេញសម្រាប់កម្មករ និយោជិតឡើយ ជាពិសេសទាក់ទងទៅ និងការអនុវត្តសិទ្ធិសេរីភាពរបស់សហជីព។
លោកបន្តថា ច្បាប់នេះប្រសិនបើអនុវត្តទៅអ្វីដែលប៉ះពាល់ធំបំផុត ស្ថាប័នសហជីព គឺត្រូវរលាយទាំងអស់។ ជាពិសេសប្រភេទសហជីពដែលធ្វើការជុំវិញការទាមទារលក្ខខណ្ឌការងារ ដែលមានប្រាក់ឈ្នួលឲ្យកម្មករជាដើម។
ទាក់ទងបញ្ហានេះ ការិយាល័យកម្ពុជាថ្មីមិនអាចសុំការបញ្ជាក់ពីមន្ត្រីអ្នកនាំពាក្យរដ្ឋសភា លោក ឡេង ប៉េងឡុង បានទេ កាលពីរសៀលថ្ងៃដដែល ប៉ុន្តែលោកបានថ្លែងប្រាប់អ្នកសារព័ត៌មានថា លោកមិនទាន់ឃើញសំណើនោះទេ ហើយគណៈកម្មការជំនាញជាអ្នកសម្រេចថា តើនឹងជួបពិភាក្សា ឬយ៉ាងណា។
សូមបញ្ជាក់ថា សេចក្តីព្រាងច្បាប់នេះ ក្រសួងការងារធ្លាប់បានបញ្ជាក់ថា ច្បាប់សហជីព ត្រូវបានរៀបចំតាក់តែង៧ ឆ្នាំមកហើយ បង្កើតឡើង ក្នុងគោលដៅ ដើម្បីការពារសិទ្ធិ និងផលប្រយោជន៍ស្របច្បាប់របស់កម្មករ ព្រមទាំងធានានូវសិទ្ធិសេរីភាព នៃអង្គការវិជ្ជាជីវៈរបស់កម្មករ និយោជិត និងនិយោជក។ ក្នុងនោះ ក៏ដើម្បីជំរុញឲ្យមានសុខដុមរមនានៃទំនាក់ទំនងវិជ្ជាជីវៈ រួមចំណែកក្នុងការបង្កើតការងារសមរម្យ បង្កើនផលិតភាព ដើម្បីអភិវឌ្ឍប្រទេសជាតិ និងលើកកម្ពស់ជីវភាពរបស់កម្មករផងដែរ៕
តំណាងសហព័ន្ធសហជីពស្នើសុំជួបពិភាក្សាជាមួយគណៈកម្មការជំនាញនៃរដ្ឋសភាលើសេចក្តីព្រាងច្បាប់សហជីព
0 Comments