ចាន់ ប៊ុនហឿន អ្នកប្រដាល់ក្លិបនិរោធមានជ័យ និង ធី តុងហ៊ី អ្នកប្រដាល់ក្លិបសាលវ័ន្តកីឡា ពួកគេទាំងពីរនាក់នេះ ត្រៀមជួបជាមួយអ្នកប្រដាល់ថៃ ដែលនឹងមកប្រកួតនៅលើសង្វៀនBlack Cat របស់SEA-TV នាយប់ថ្ងៃអាទិត្យ ទី០៣ ខែមករា ឆ្នាំ២០១៦នេះ។
ប៊ុនហឿន នឹងត្រូវជួបជាមួយអ្នកប្រដាល់ថៃ Yorth Sayam ដោយប្រកួតគ្នាក្នុង ទម្ងន់៦០ គ.ក្រ។ ជាលើកទី៥របស់ ប៊ុនហឿន ហើយ ដែលគេឡើងប្រកួតជាមួយថៃនេះ។ ប៊ុនហឿន ប្រកួតជាមួយថៃ៤លើកកន្លងមកនេះ គឺឈ្នះ៣លើក និងចាញ់១លើក ដែលលើកទី១គេប្រើពេលតែមួយទឹកប៉ុណ្ណោះ ផ្ដួលថៃ Lao Py ឲ្យសន្លប់ ,លើកទី២គេផ្ដួល Phom Phayak ក្នុងទឹកទី៤ , លើកទី៣គេវាយចាញ់ Yorth Sing ដោយពិន្ទុ និងលើកទី៤ គេវាយឈ្នះ Thung Mo m ដោយពិន្ទុ។
អ្នកប្រដាល់ថៃ Yorth Sayam ដែលជាគូរបស់ ចាន់ ប៊ុនហឿន នេះ ធ្លាប់មកប្រកួតនៅSEA-TVនេះ ចំនួន២លើកហើយ។ មកប្រកួត២លើកកន្លងមកនេះ Yorth Sayam មិនដែលចាញ់ទេ។ មកប្រកួតលើកទី១ គេវាយឈ្នះ រិទ្ធ អារុណ អ្នកប្រដាល់សមាគមកីឡាក្រសួងការពារជាតិដោយពិន្ទុ និងលើកទី២ វាយឈ្នះ ឈឿន ឆៃដែន អ្នកប្រដាល់ក្លិបនិរោធមានជ័យដោយពិន្ទុ។
Yorth Sayam នេះ ជាជើងខ្លាំងទម្ងន់៦០គីឡូក្រាមប្រចាំនៅស្រុកថៃ។ គេមានកំណត់ត្រាប្រកួតច្រើនជាង ប៊ុនហឿន។ អ្នកប្រដាល់ថៃនេះ មានប្រវត្តិប្រកួត៧៥លើក ក្នុងនោះវាយឈ្នះ៦៥លើក ចាញ់០៩លើក និងស្មើ០១លើក បើធៀបជាមួយ ប៊ុនហឿន នោះ គឺច្រើនជាងតែ៣៤លើកឯណោះ។
ចាន់ ប៊ុនហឿន គេមានប្រវត្តិប្រកួតចំនួន៤១លើក ឈ្នះ៣៦លើក និងចាញ់០៥លើក មិនដែលស្មើ។ ប៉ុន្តែយ៉ាងណា ប៊ុនហឿន គេមានថ្វីកែង និងជង្គង់ល្អណាស់។ ប៉ុន្តែយ៉ាងណា ការឈ្នះចាញ់រវាងចាន់ ប៊ុនហឿន និង Yorth Sayam នេះ ពុំមាននរណាហ៊ានទាយមុនថា អ្នកណាឈ្នះនោះទេ ?។
ធី តុងហ៊ី នឹងត្រូវជួបជាមួយអ្នកប្រដាល់ថៃឈ្មោះ Play Noy ដែលពីរនាក់នេះជួបគ្នាក្នុងប្រភេទទម្ងន់៦៥គីឡូក្រាម។ តុងហ៊ី អ្នកប្រដាល់របស់កម្ពុជារូបនេះ ធ្លាប់ជួបអ្នកប្រដាល់បរទេសទើបតែបាន៣នាក់ប៉ុណ្ណោះ ក្នុងនោះធ្លាប់ប៉ះថៃ២នាក់ ដោយផ្ដួលអ្នកប្រដាល់ថៃនោះ (Yor Tonthy) ឲ្យសន្លប់ក្នុងទឹកទី៣ និងវាយចាញ់Neerachai Menayuthin ក្នុងទឹកទី៣។
Play Noy វិញ គេធ្លាប់មកប្រកួតនៅកម្ពុជា៥លើកហើយ ដោយវាយឈ្នះអ្នកប្រដាល់ខ្មែរ៣លើក ចាញ់១លើក និង ស្មើមួយលើក។ ក្នុងនោះ គេប្រកួតជាមួយ ផាន់ គ្រាន់ ២លើក ដោយស្មើ១លើ និងឈ្នះលើកទី១ គេឈ្នះ កន ចន្ថា ដោយពិន្ទុ ឈ្នះ ឈិន ក្វាន់ង៉ុយ ដោយពិន្ទុ និងចុងក្រោយវាយចាញ់ មឿន សុខហ៊ុច ដោយពិន្ទុ។
Play Noy នេះ គេជាជើងខ្លាំងម្នាក់នៅប្រទេសថៃ ដែលតាមអ្នកផ្គូផ្គងឲ្យដឹងនោះថា ជាអ្នកប្រដាល់ថៃម្នាក់ដែលរឹងមាំ និងវាយខ្លាំង។ អ្នកប្រដាល់ថៃរូបនេះ មានប្រវត្តិប្រកួតចំនួន៩៨លើក ឈ្នះ៨២លើក ចាញ់១៤លើក និងស្មើ ០២លើក។ ពេលនេះ គេប៉ះប្រកួតជាមួយ ធី តុងហ៊ី ដែលធ្លាប់ឆ្លងកាត់សង្វៀន៩០លើក ឈ្នះ៦០លើក ចាញ់២០លើក ស្មើ១០លើក មិនដឹងថា Play Noy ជួបសំណាងល្អដូចមុនទៀតឬអត់ ?។
ទោះជាយ៉ាងណា រវាង ធី តុងហ៊ី និង Play Noy នេះ មិនដឹងថា អ្នកណាជាអ្នកឈ្នះទេ សម្រាប់ការជួបគ្នានេះ ?។ ព្រោះថា អ្នកប្រដាល់កម្ពុជា ធី តុងហ៊ី នេះ ថ្វីត្បិតតែគេមានប្រវត្តិប្រកួតតិចជាង Play Noy ក្តី ប៉ុន្តែគេមានស្នៀតប្រដាល់ល្អ និងវាយខ្លាំង ដែល Play Noy មិនអាចមើលស្រាលគេបានឡើយ។ ចាំមើល តើ ធី តុងហ៊ី និង Play Noy នរណាជាអ្នកឈ្នះនោះ ?។
ចំពោះការប្រកួតរវាងអ្នកប្រដាល់រួមជាតិវិញ ចាប សុភា អ្នកប្រដាល់ក្លិបតាកដំបងដែកមានរិទ្ធ ត្រូវជួបសាកកណ្ដាប់ដៃជាមួយ ធឿន គឹមហៀង អ្នកប្រដាល់ក្លិបកងពលតូចអន្តរាគមន៍លេខ៨ ដោយប្រកួតគ្នាក្នុងទម្ងន់៦០គីឡូក្រាម។
ពីរនាក់នេះ មិនដែលប៉ះគ្នាទេពីមុនមក ព្រោះគេជាអ្នកប្រដាល់ថ្មីស្រករក្រោយដូចគ្នា។ សម្រាប់ការជួបគ្នារវាងអ្នកប្រដាល់ជើងថ្មីទាំងពីរនាក់នេះមិនដឹងថា នរណាឈ្នះនោះឡើយ។
ម៉ី ស៊ីផាត់ អ្នកប្រដាល់ក្លិបម្កុដរាជសីហ៍ នឹងជួបប្រកួតជាមួយ សេង ឈឿន អ្នកប្រដាល់ក្លិបពន្លឺវិបុលរិទ្ធី ក្នុងទម្ងន់៦០គីឡូក្រាមដែរ។ អ្នកប្រដាល់ទាំងពីរនាក់នេះ ពុំដែលជួបគ្នាទេកន្លងមក។ ចាំមើល ពួកគេពីរនាក់នេះ តើនរណាជាអ្នកឈ្នះ ?៕
ចាន់ ប៊ុនហឿន ប៉ះ Yorth Sayam ឯ ធី តុងហ៊ី ប៉ះ Play Noy លើសង្វៀន Black Cat
0 Comments