បន្ទាយមានជ័យ ៖ ជនសង្ស័យម្នាក់ ត្រូវបានកងរាជអាវុធហត្ថខេត្តបន្ទាយមានជ័យឃាត់ខ្លួនក្នុងករណីចែកចាយគ្រឿងញៀនខុសច្បាប់នៅវេលាម៉ោង៣រសៀល ថ្ងៃទី៩ ខែមករា ឆ្នាំ២០១៦ នៅចំណុចលើខ្នងប្រឡាយ ស្ថិតក្នុងភូមិកោះកែវ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
កម្លាំងការិយាល័យប្រឆាំងបទល្មើសគ្រឿងញៀនបានសហការជាមួយកម្លាំងកងរាជអាវុធហត្ថមូលដ្ឋានស្រុកមង្គលបូរី ដឹកនាំដោយលោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលលើការងារបទល្មើសគ្រឿងញៀនបានចុះប្រតិបត្តិការបង្ក្រាបករណីជួញដូរគ្រឿងញៀន ឈានដល់ឃាត់ខ្លួនជនសង្ស័យបានចំនួន១នាក់ ឈ្មោះ ហឿន ម៉ានិត ភេទប្រុស អាយុ១៦ឆ្នាំ មានទីលំនៅក្នុងភូមិឫស្សីក្រោក ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ព្រមទាំងដកហូតវត្ថុតាងគ្រឿងញៀនមេតំហ្វេតាមីន ម៉ាទឹកកកចំនួន២កូនថង់កិប ទម្ងន់២,៣ក្រាម។
លោក ស ប៊ុនសៀង បាននិយាយថា តាមការសួរចម្លើយរបស់អាវុធហត្ថជនសង្ស័យបានឆ្លើយសារភាពថា រូបគេពិតជាធ្លាប់បានលក់គ្រឿងញៀនពិតប្រាកដមែន។
ជនសង្ស័យ ត្រូវបានកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់៕
ឃាត់ខ្លួនជនសង្ស័យម្នាក់ ពាក់ព័ន្ធករណីគ្រឿងញៀន
0 Comments