ភ្នំពេញ ៖ មានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចមូលដ្ឋាន ចុះមកស្រាវជ្រាវដើម្បីរកម្ចាស់ដើមរថយន្តមួយគ្រឿងម៉ាកហាយលែនឌ័រ ដែលជនមិនស្គាល់មុខបើកយកមកចតចោលចំនួន៣ថ្ងៃមកហើយមិនឃើញម្ចាស់មកយកវិញ។ រថយន្តនោះត្រូវបានគេយកមកចតចោលលើផ្លូវបេតុងមួយកន្លែងក្នុងភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យតាំងពីយប់ថ្ងៃទី៨ ខែមករា ឆ្នាំ២០១៦មកម្ល៉េះ។
ប្រជាពលរដ្ឋរស់នៅភូមិប៉ប្រកត្បូងបានឲ្យដឹងនៅវេលាម៉ោង១៧និង៣០នាទីថ្ងៃទី១០ ខែមករាថា រថយន្តដែលចតចោលមិនឃើញម្ចាស់មកយកនោះ ម៉ាកហាយលែនឌ័រ ពណ៌ប្រផេះពាក់ស្លាកលេខភ្នំពេញ២Q៣៦៩៥។
ប្រភពបន្តថា ដោយសារតែរថយន្តនោះចតចោលលើផ្លូវ៣ថ្ងៃមិនឃើញម្ចាស់មកយក ទើបប្រជាពលរដ្ឋរាយការណ៍ទៅអាជ្ញាធរ និងសមត្ថកិច្ចចុះមកពិនិត្យស្រាវជ្រាវដើម្បីដឹងការពិតថារថយន្តនោះ ពាក់ព័ន្ធនឹងករណីអ្វីឲ្យប្រាកដ។
នៅល្ងាចថ្ងៃដដែលនេះ សមត្ថកិច្ចបង្ហើបថា រថយន្តនោះ មានការពាក់ព័ន្ធជួលឲ្យជនជាតិចិនបន្ត ពីព្រោះមានចិន២នាក់ ប្រុសម្នាក់ ស្រីម្នាក់ មកអះអាងថាជារថយន្តខ្លួន តែសមត្ថកិច្ចមិនទាន់ធ្វើការប្រគល់ឡើយរង់ចាំម្ចាស់ដើមមានឯកសាររថយន្តបញ្ជាក់ត្រឹមត្រូវ ទើបធ្វើប្រគល់។ ករណីនេះសមត្ថកិច្ចកំពុងដាក់ការសង្ស័យនៅឡើយ៕
យករថយន្តមកទុកចោល៣ថ្ងៃមិនឃើញម្ចាស់ សមត្ថកិច្ចបើកការស្រាវជ្រាវ
0 Comments