រដ្ឋាភិបាលប្រទេសឥណ្ឌា បានអនុម័តគម្រោងធានារ៉ាប់រងទឹកប្រាក់១.៣ពាន់លានដុល្លារសម្រាប់កសិករ ដើម្បីការពារប្រឆាំងនឹងការដាំដំណាំមិនបានទទួលផល ដោយនិយាយថា ខ្លួនមានគោលបំណង ដើម្បីបញ្ឈប់ការធ្វើអត្តឃាតយ៉ាងគំហុក។
គ្រោះរាំងស្ងួតរយៈពេលពីរឆ្នាំជាប់ៗគ្នាបានបង្កផលប៉ះពាល់យ៉ាងធ្ងន់ធ្ងរដល់តំបន់ជនបទរបស់ប្រទេសមួយនេះ ខណៈដែលចំនួនកសិករធ្វើអត្តឃាត នៅតាមបណ្ដាតំបន់ជនបទបានកើនឡើងជាលំដាប់។
ប្រជាកសិករជាង៣០០០០០នាក់ បានសម្លាប់ខ្លួនឯង នៅក្នុងប្រទេសឥណ្ឌាចាប់តាំងពីឆ្នាំ១៩៩៥មក។
រដ្ឋាភិបាលបាននិយាយថា តាមគម្រោងថ្មីនេះ កសិករនឹងត្រូវបង់ថ្លៃធានារ៉ាប់រងយ៉ាងតិចតួចប្រមាណជា១,៥ភាគរយនៃតម្លៃដំណាំរបស់ពួកគេ ហើយអនុញ្ញាតឲ្យពួកគេទាមទារតម្លៃពេញលេញវិញនៅក្នុងករណីនៃការខូចខាតពីធម្មជាតិ។
រដ្ឋមន្ត្រីក្រសួងលំនៅដ្ឋាន Rajnath Singh បាននិយាយកាលពីថ្ងៃពុធ បន្ទាប់ពីគណៈរដ្ឋមន្ត្រីបានអនុម័តគម្រោងនេះថា “គម្រោងនេះនឹងក្លាយជាខែលការពារប្រឆាំងនឹងករណីនៃការធ្វើអត្តឃាត ដោយសារតែការដាំដំណាំមិនទទួលបានផល ឬខូចខាតបណ្ដាលមកពីធម្មជាតិ”។
គម្រោងធានារ៉ាប់រងដំណាំរបស់នាយករដ្ឋមន្ត្រីនេះក៏ជាការប៉ុនប៉ងមួយផងដែរ ដោយរដ្ឋាភិបាលរបស់លោក Narendra Modi ដើម្បីទាក់ទាញសហគមន៍កសិកម្មដ៏មានឥទ្ធិពលរបស់ប្រទេសនេះ បន្ទាប់ពីការបរាជ័យក្នុងការបោះឆ្នោតរដ្ឋពីរលើកចុងក្រោយ។
គួរបញ្ជាក់ថា គម្រោងធានារ៉ាប់រងដំណាំលើកមុនត្រូវបានរិះគន់ដោយសហគមន៍កសិកម្មថា ជាការស្មុគស្មាញពេក ឬរារាំងពួកគេពីការទាមទារមកវិញនូវតម្លៃពាណិជ្ជកម្មពេញលេញនៅក្នុងករណីនៃការខូចខាត៕
The Guardian
ការធ្វើអត្តឃាតរបស់កសិកររាប់ម៉ឺននាក់ បានជំរុញឲ្យឥណ្ឌាបង្កើតគម្រោងធានារ៉ាប់រងដំណាំ
0 Comments