ភ្នំពេញ ៖ រយៈពេលប៉ុន្មានឆ្នាំចុងក្រោយនេះ គេសង្កេតឃើញមានសិល្បករខ្មែរប្រុស-ស្រី ភាគច្រើនបានសម្រុកចេញទៅរកប្រាក់តាមរយៈការច្រៀង និងសម្តែងនៅក្រៅប្រទេសផ្សេងៗគ្នា តបតាមការអញ្ជើញ និងធានាពីសំណាក់ប្រធានសមាគមខ្មែរ ដែលមានទីតាំងនៅទីនោះ ហើយក៏បានឆ្លៀតពេលដើរលេងកម្សាន្ត និងស្វែងរកចំណូលផ្ទាល់ខ្លួនដើម្បីវិលត្រឡប់មកស្រុកកំណើតវិញ។
ស្របពេលដែលទីផ្សារសិល្បៈរបស់ខ្មែរបច្ចុប្បន្នកំពុងតែមានស្ទុះកើតឡើង និងមានការគាំទ្រនេះដែរ ក៏មានតារាចម្រៀងសម្តែងរបស់ខ្មែរមួយចំនួនត្រូវបានប្រធានសមាគមខ្មែរនៅបណ្ដាប្រទេសផ្សេងៗគ្នាធ្វើការធានាយកចេញទៅសម្តែង-ច្រៀងកម្សាន្តសប្បាយ និងដើម្បីផ្សព្វផ្សាយពីវប្បធម៌ខ្មែរនៅក្រៅប្រទេស។ ប៉ុន្តែទន្ទឹមនឹងការធានាចេញទៅនេះដែរ ក៏មានតារាខ្មែរខ្លះបានគោរពទៅតាមគោលការណ៍របស់សមាគម តែខ្លះទៀតក៏បានបំពានមិនគោរពលើច្បាប់កិច្ចសន្យា ខណៈពេលបានចេញទៅហើយ បែរជាគេចវេះមិនត្រឡប់មកស្រុកខ្មែរវិញតាមការកំណត់នោះឡើយ។
តើទស្សនិកជនចង់ដឹងទេថា មានតារាប្រុស-ស្រីណាខ្លះដែលមានឈ្មោះក្នុងបញ្ជីស្បែកខ្មៅរត់គេចខ្លួនរស់នៅក្រៅប្រទេសនោះ? បើតាមការឲ្យដឹងពីប្រធានសមាគមសិល្បករខ្មែរលោក សុះ ម៉ាច បានប្រាប់កម្ពុជាថ្មីតាមទូរស័ព្ទកាលពីវេលាម៉ោង១០និង៣៣នាទីព្រឹក ថ្ងៃទី១៤ ខែមករា ឆ្នាំ២០១៦ថា គិតរហូតមកទល់ពេលបច្ចុប្បន្ន បើតាមលោកដឹង គឺមានជាង២០នាក់សម្រាប់តារាខ្មែរដែលបានគេចខ្លួនរស់នៅក្រៅប្រទេស និងមានផ្សេងៗគ្នា។
ប៉ុន្តែលោកសុំលើកនិយាយតែ២ប្រទេសប៉ុណ្ណោះ គឺសហរដ្ឋអាមេរិក និងអូស្ត្រាលី ដែលមានតារាប្រុស-ស្រីចំនួន៥រូប ដោយក្នុងនោះមាន៣នាក់ គឺឆ្លងកាត់ការស៊ីញេ និងបោះត្រាពីលោក។
លោក សុះ ម៉ាច បានបញ្ជាក់ថា សហរដ្ឋអាមេរិកមានតារាស្រីខ្មែរចំនួន៤រូប ដែលបានគេចខ្លួនរស់នៅទីនោះ គឺនាង ហង្ស ពិសី និង ស៊ិន សុម៉ាលី។ ចំណែក២នាក់ផ្សេងទៀត គឺលោកមិនបានបញ្ចេញឈ្មោះ ព្រោះការចេញទៅរបស់ពួកគេមិនបានឆ្លងកាត់ពីលោក។
តារាស្រីទាំងពីរ នាង ហង្ស ពិសី និង ស៊ិន សុម៉ាលី នេះបានចេញទៅច្រៀងសម្ដែងនៅទីនោះអំឡុងឆ្នាំ២០០៨ តបតាមការធានារបស់ប្រធានសមាគមខ្មែរនៅទីនោះ ប៉ុន្តែជិតដល់ពេលវេលាកំណត់ត្រូវវិលមកវិញ បែរជារត់គេចខ្លួនរហូតដល់សព្វថ្ងៃ។
លោក សុះ ម៉ាច បានបន្តថា សម្រាប់ប្រទេសអូស្ត្រាលីមានចំនួន១រូប គឺលោក សា រ៉ាវុធ តារាចម្រៀងប្រុសរូបនេះក៏មិនខុសគ្នានឹងតារាស្រីខាងលើដែរ គឺបានបំពានលើកិច្ចសន្យា ដោយការព្យាយាមរត់គេចខ្លួននៅទីនោះអំឡុងពេលចេញទៅច្រៀង និងសម្តែង ដែលទង្វើបែបនេះនាំឲ្យប៉ះពាល់ខ្លាំងដល់តម្លៃសិល្បករខ្មែរឯទៀត ក៏ដូចជាកិត្តិយសថ្លៃថ្នូរសិល្បៈដទៃផងដែរ។
ដោយឡែក ប្រធានសមាគមខ្មែរកាណាដា លោក ឃុន ដេវិត ក៏ធ្លាប់បានបង្ហាញប្រាប់ពីផងដែអំពីឈ្មោះរបស់តារាចម្រៀង-សម្ដែងខ្មែរ ដែលបានចេញទៅហើយ តែមិនត្រឡប់មកខ្មែរវិញតាមការកំណត់ ដែលក្នុងនោះរួមមាន នូ វ៉ាន់ឌី, ង៉ែត ម៉ារាឌី, អ៊ឹង ស្រីពេជ្រ, ម៉ាយ៉ាដា, អ៊ឹម លីដាលី, ពេជ្រ ចរណៃ, វង្ស ម៉ាលីន និង កញ្ញា លីន ធីតា ជាដើម។
លោក ឃុន ដេវិត បន្ថែមថា មូលហេតុនេះហើយ ទើបបច្ចុប្បន្នធ្វើឲ្យសមាគមលោកពិបាកក្នុងការធានាយកសិល្បករខ្មែរ ចេញទៅសម្តែងនៅទីនោះ។
គួររម្លឹកថា ថ្មីៗមុននេះ ក៏មានព័ត៌មានពីការបាត់ខ្លួនតារាចម្រៀងខ្មែរនាង យ៉ុង ចាន់សុធាវី នៅលើទឹកដីប្រទេសមហាអំណាចសហរដ្ឋអាមេរិកផងដែរ ខណៈពេលដែលតារារូបនេះចេញទៅស្នាក់នៅ ច្រៀង និងសម្តែង ដោយកាលនោះមានប្រភពខ្លះបានដាក់ការសង្ស័យថា អាចជាការរត់គេចខ្លួន។ ប៉ុន្តែក្រោយពីមានការផ្សព្វផ្សាយព័ត៌មានកក្រើកពេញផ្ទៃប្រទេសនោះ នាង យ៉ុង ចាន់សុធាវី ក៏បានបង្ហាញខ្លួនវិញ ហើយអះអាងប្រាប់ទស្សនិកជនថា ខ្លួនគ្មានចេតនាព្យាយាមរត់គេចខ្លួនទេ ហេតុផលគឺនាងចេញទៅដើរកម្សាន្តជាមួយមិត្តភ័ក្ដិ ហើយចៃដន្យក៏ខូចទូរស័ព្ទទើបមិនអាចធ្វើការទំនាក់ទំនងដើម្បីផ្តល់ដំណឹង៕
តារាខ្មែរណាខ្លះមានឈ្មោះក្នុងបញ្ជីស្បែកខ្មៅរត់គេចខ្លួនទៅរស់នៅក្រៅប្រទេស?
0 Comments