សៀមរាប ៖ ភ្ញៀវទេសចរណ៍ជនជាតិអង់គ្លេសម្នាក់ ត្រូវបានម្ចាស់ផ្ទះនិងអ្នកជិតខាងប្រទះឃើញដេកស្លាប់ម្នាក់ឯងនៅក្នុងបន្ទប់ជួល ខណៈសពធុំក្លិនស្អុយ រីឯខាងក្រុមសមត្ថកិច្ចបាននិយាយថា សពនេះស្លាប់ដោយសារប្រើប្រាស់ថ្នាំច្រើនមុខនិងមានជំងឺហឺត។
ហេតុការណ៍បង្កការភ្ញាក់ផ្អើលនេះ កើតឡើងនៅវេលាម៉ោង១៧និង៣០នាទី ថ្ងៃទី១៣ ខែមករា ឆ្នាំ២០១៦ ស្ថិតក្នុងភូមិបន្ទាយចាស់ សង្កាត់ ស្លក្រាម ក្រុងសៀមរាប (ក្នុងបន្ទប់ផ្ទះជួល)។ សាក្សីបានឲ្យដឹងថា សពបុរសជនជាតិអង់គ្លេសនេះគឺរស់នៅតែម្នាក់ឯង ហើយដោយបាត់ដំណឹងយូរពេកពួកគាត់ក៏គ្នាបើកទ្វារបន្ទប់ក៏ប្រទះឃើញដេកស្លាប់ម្នាក់ឯងឃើញដូច្នេះពួកគាត់ក៏បានរាយការណ៍មកសមត្ថកិច្ចដើម្បីឲ្យចុះមកត្រួតពិនិត្យតែម្តង។
លោកវរសេនីយ៍ទោ ដួង សុខា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្តសៀមរាបបានឲ្យដឹងថា សពបុរសជនជាតិអង់គ្លេសនេះមានឈ្មោះGREENBANK PHILIP អាយុ៥៤ឆ្នាំកាន់លខិតឆ្លងដែនលេខ 459966837 ចូលមកទេសចរណ៍ក្នុងប្រទេសកម្ពុជា កាលពីថ្ងៃទី២៣ ខែឧសភា ឆ្នាំ២០១៥ ផុតកំណត់នៅថ្ងៃទី២៥ ខែឧសភា ឆ្នាំ២០១៦។
លោកបន្តថា ជនបរទេសនេះ គឺបានស្លាប់ដោយសារមានជំងឺប្រចាំកាយ ហើយវាមិនមែនជាករណីអំពើឃាតកម្មអ្វីនោះទេ។
លោកវរសេនីយ៍ទោ ផេង ពេជ្រ នាយការិយាល័យបច្ចេកទេសនៃស្នងការខេត្តសៀមរាបបានឲ្យដឹងថា តាមការធ្វើកោសល្យវិច័យរបស់សមត្ថកិច្ចជំនាញបានបង្ហាញថា សពបុរសជាជនជាតិអង់គ្លេសនេះ គឺបានស្លាប់ដោយសារជំងឺ ហើយករណីនេះវាមិនមែនជារឿងឃាតកម្មនោះទេ។
ចំណែកលោកវេជ្ជបណ្ឌិត អ៊ិត ឆបឆររ័ត្ន ឯកទេសផ្នែកកោសល្យវិច័យ នៃមន្ទីរពេទ្យបង្អែកខេត្តសៀមរាបបានឲ្យដឹងថា សពនេះយើងមិនបានពិនិត្យលំអិតនោះទេ ព្រោះយើងខ្វះខាតឧបករណ៍ ពោលគឺយើងត្រួតពិនិត្យតាមការមើលឃើញប៉ុណ្ណោះ។
លោកបន្តថា តាមការពិនិត្យឃើញថា សពនេះគឺស្លាប់ដោយសារមានជំងឺហឺត ព្រោះនៅក្នុងបន្ទប់មានឃើញប្រភេទថ្នាំដូច្នេះ និង ជក់ប្រភេទកញ្ឆាផងដែរ ហើយអាចស្លាប់ប្រហែល២ថ្ងៃទើបដឹង។ លោកបញ្ជាក់ថា បច្ចុប្បន្នសពនេះយើងរក្សាទុកនៅសាលនៃមន្ទីរពេទ្យបង្អែកខេត្ត១យប់សិនលុះព្រឹកឡើងទើបបញ្ជូនទៅភ្នំពេញដើម្បីឲ្យខាងស្ថានទូតដឹកនាំយកទៅឲ្យក្រុមគ្រួសាររបស់ពួកគេ៕
ជនជាតិអង់គ្លេសម្នាក់ត្រូវបានគេប្រទះឃើញដេកស្លាប់ក្នុងបន្ទប់ជួលបន្ទាប់ពីធុំក្លិនស្អុយ
0 Comments