ភ្នំពេញ ៖ សម្តេចតេជោ ហ៊ុន សែន បានសរសេរលើផេកហ្វេសប៊ុកកាលពីល្ងាចថ្ងៃទី០៣ ខែមករា ថា នៅល្ងាចមិញនេះ ខ្ញុំបានទទួលដំណឹងតាម Facebook ខ្ញុំថាអតីតមិត្តរួមអាវុធ លោក ញ៉ឹក ហួន មានជំងឺជាទម្ងន់។
សម្តេចបញ្ជាក់ថា ខ្ញុំបានចុះទៅសួរសុខទុក្ខគាត់ និងបានលើកទឹកចិត្តឲ្យគាត់ទៅព្យាបាលនៅមន្ទីរពេទ្យទោះបីស្ថានភាពជំងឺបែបណាក៏ដោយ។ ចំពោះរូបខ្ញុំគឺតែងតែនឹករលឹក និងចងចាំជានិច្ចចំពោះសហការី មិត្តរួមអាវុធទាំងអស់ដែលបានចូលរួមតស៊ូរំដោះប្រទេសពីរបបខ្មែរក្រហម ដូចជារូបលោក ញ៉ឹក ហួន ផ្ទាល់ដែលនៅក្រោយឆ្នាំ ១៩៧០ បានចូលរួមតស៊ូនៅអង្គភាពជាមួយគ្នា។ នៅថ្ងៃទី ២០ ខែមិថុនា ឆ្នាំ១៩៧៧ គាត់បានរួមជាមួយខ្ញុំចាប់ផ្តើមវាយពួក ប៉ុល ពត។ គាត់ក្លាយជាអ្នកចូលរួមកសាងកម្លាំងប្រដាប់អាវុធផ្តួលរំលំរបបខ្មែរក្រហម ហើយក៏បានក្លាយជាមេបញ្ជាការកងអនុសេនាធំមុនគេនៅពេលនោះ។ ជាបន្តបន្ទាប់ នៅពេលបង្កើតកងវរៈសេនាតូច គឺគាត់ជាមេបញ្ជាការមុនគេ។ ក្រោយពេលរំដោះប្រទេសថ្ងៃ ៧ មករា ១៩៧៩ បង្កើតកងពលតូចលេខ១ ការពារភ្នំពេញ គាត់ជាមេបញ្ជាការដំបូងទៀត។ នៅពេលបង្កើតកងពលធំលេខ ១៩៦ គាត់ក៏ជាមេបញ្ជាការលើកដំបូងទៀត។ លោក ញឹក ហួន មានស្នាដៃច្រើនចំពោះជាតិ។ សព្វថ្ងៃលោក ញ៉ឹក ហួន ជាឧត្តមសេនីយ៍ផ្កាយមាសបួន មានមុខងារជាអគ្គមេបញ្ជាការរងនៃកងយោធពលខេមរភូមិន្ទ។
ថ្ងៃនេះពេលខ្ញុំទៅដល់ផ្ទះគាត់ នាយទាហានជាន់ខ្ពស់ដែលទៅសួរសុខទុក្ខបានប្រាប់ខ្ញុំថា គាត់មិនផ្តាំផ្ញើអ្វីច្រើនទេគឺមានតែពាក្យថាត្រូវតែការពារ សម្តេច ហ៊ុន សែន ឱ្យបាន។ មានន័យថាជីវិតគាត់មិនសំខាន់ជាងជីវិតខ្ញុំទេ ដូចដែលគាត់បានធ្វើនៅយប់ ថ្ងៃទី២០ ខែ មិថុនា ឆ្នាំ១៩៧៦ ពេលឆ្លងកាត់ចំការមីនជាប់ព្រំដែនកម្ពុជា វៀតណាម គឺគាត់ជាអ្នករាវរកនិងដោះមីនមុននឹងឱ្យខ្ញុំដើរមួយជំហានៗម្តង។ ពេលនោះគាត់ក៏និយាយថា បើខ្ញុំស្លាប់ក៏ស្លាប់ចុះឱ្យតែបង ហ៊ុន សែន ឯងនៅរស់ដឹកនាំការតស៊ូរំដោះជាតិ។ របៀបនេះតើឱ្យខ្ញុំទប់ទឹកភ្នែកម្ដេចបាន។ ខ្ញុំបន់ស្រន់ឱ្យបង ញ៉ឹក ហួន បន្តការព្យាបាលបានឆាប់ជាសះស្បើយ។
បើទោះបីខ្ញុំនៅឆ្ងាយពីបងប្អូន ឬមិនបានជួបប្រាស្រ័យសន្ទនាដោយផ្ទាល់ គឺខ្ញុំតែងតែនឹករលឹកដល់បងប្អូនអតីតមិត្តរួមអាវុធទាំងអស់។ តែគួរឲ្យសោកស្តាយដែលបងប្អូនមួយចំនួនក៏បានលាចាកលោក ហើយមួយចំនួនទៀតកំពុងរស់នៅដោយសុខសប្បាយជាមួយក្រុមគ្រួសារ។ ខ្ញុំនៅតែបន្តយកចិត្តទុកដាក់ចំពោះបងប្អូនជានិច្ចទៅតាមលទ្ធភាពជាក់ស្តែងដែលខ្ញុំអាចធ្វើបាន។
ខ្ញុំសូមជូនពរប្អូនអតីតមិត្តរួមអាវុធតស៊ូរំដោះជាតិទាំងអស់ សូមជួបតែសំណាងល្អ និងសេចក្តីសុខគ្រប់ពេលជានិច្ច៕
សម្តេចតេជោ ហ៊ុន សែន អញ្ជើញទៅសួរសុខទុក្ខអតីតមិត្តរួមអាវុធ
0 Comments