កំពង់ធំ ៖ ឃាតកដែលលើកដៃសម្លាប់ដោយសារតែជនរងគ្រោះ បានមកសុំស្នេហ៍ម្តាយរបស់ខ្លួន ត្រូវបានសមត្ថកិច្ចចាប់បាននៅរសៀលម៉ោង២និង៣០នាទីរសៀល ថ្ងៃទី១២ ខែមករា ឆ្នាំ២០១៦ ក្រោយពី បានសម្លាប់បុរសវ័យចំណាស់ ហើយរត់មកសម្ងំក្នុងព្រៃ អស់រយៈពេល៩ថ្ងៃ ទើបសមត្ថកិច្ច អាចចាប់ឃាតកបាន។
ជនដៃដល់ត្រូវបានស្គាល់ឈ្មោះស្វាយ ដេន ភេទប្រុសអាយុ២២ឆ្នាំទីលំនៅភូមិទំអរ ឃុំទំរីងស្រុកសណ្ដាន់ ខេត្តកំពង់ធំ បានយករបស់រឹងវាយក្បាលជនរងគ្រោះ ឈ្មោះ ស្រី អេង ភេទប្រុសអាយុ៥៧ឆ្នាំ មានទីលំនៅភូមិឃុំជាមួយគ្នា នៅនឹងជណ្តើរផ្ទះ បណ្តាលឲ្យប្រកាច់ស្លាប់ភ្លាមៗនៅ កន្លែងកើតហេតុ កាលពីថ្ងៃទី ០៣ ខែ មករា ឆ្នាំ ២០១៦ កន្លងមក។
លោក ឈុំ ឈៀង នាយប៉ុស្តិ៍រដ្ឋបាលឃុំទំរីងបានឲ្យដឹងថា ក្រោយពីឃាតកដែលជាជនដៃដល់បានវ៉ៃសម្លាប់ទៅលើជនរងគ្រោះស្លាប់ហើយហើយរត់ចូលព្រៃ ត្រូវបានកំលាំងប៉ុស្តិ៍របស់លោកសហការជាមួយកម្លាំងអធិការដ្ឋាននគរបាលស្រុកសណ្ដាន់ធ្វើការរុករកជនសង្ស័យដើម្បីមកផ្តន្ទាទោសហើយបានបញ្ជូនមក តុលាការខេត្តកំពង់ធំ នៃរសៀលថ្ងៃទី ១៣ ខែមករា ឆ្នាំ ២០១៦ ដើម្បីផ្តន្ទាទោសតាមច្បាប់។
ប្រជាពលរដ្ឋសម្តែងនូវការកោតសរសើរ ចំពោះការខិតខំប្រឹងប្រែង របស់សមត្ថកិច្ច ដែលបានដុតដៃដុតជើង ស្រាវជ្រាវរកឃាតករ រហូតឈានដល់ការឃាត់ខ្លួនបានសម្រេច និងបានធ្វើឲ្យប្រជាពលរដ្ឋមានភាពកក់ក្តៅ នូវការអនុវត្តច្បាប់របស់សមត្ថកិច្ច ដោយមិនព្រងើយកន្តើយនឹង ហេតុការណ៍ដែលបាន កើតឡើងនៅក្នុង មូលដ្ឋាន៕
ឃាតកសម្លាប់បុរសដែកសុំស្នេហ៍ម្តាយត្រូវបានសមត្ថកិច្ចក្របួចបានហើយ
0 Comments