ប៉ៃលិន ៖ ក្នុងបរិវេណវត្តសន្តិមារាម ហៅវត្តអូរច្រានាព្រឹកថ្ងៃទី២ ខែធ្នូ ឆ្នាំ២០១៦ មានប្រារព្ធពិធីបួងសួង និងសកម្មភាពដើម្បីកុមារ ក្រោមប្រធានបទ«បញ្ឈប់អំពើហិង្សាលើកុមារ» ក្រោមអធិបតីភាពលោកស្រី ជា លាភ អភិបាលរងនៃគណៈអភិបាលខេត្តប៉ៃលិន និងមានការអញ្ជើញចូលរួមពីព្រះគ្រូរតនមុនី ចាន់ គង់ ព្រះមេគណខេត្តប៉ៃលិន ,ព្រះគ្រូសុធារោ សាន់ លី ព្រះមេគណគណៈធម្មយុត្តខេត្តប៉ៃលិន ,លោកស្រី ស៊ុំ ហៀង ប្រធានសភាពាណិជ្ជកម្មខេត្តប៉ៃលិន ,លោក នួន សាវុធ ទីប្រឹក្សាសម្តេចសង្ឃ នន្ទ ង៉ែត និងជាទីប្រឹក្សាសាលាគណ ,លោក ឌឹម គឹម ប្រធានមន្ទីរសាធារណការខេត្ត ,លោក លោកស្រីប្រធានមន្ទីរអភិវឌ្ឍន៏ជនបទខេត្ត ,លោកស្រីអនុប្រធានមន្ទីរសង្គមកិច្ចខេត្ត ,ព្រមទាំងលោកចៅសង្កាត់ លោកមេភូមិ លោកគ្រូ អ្នកគ្រូ សិស្សានុសិស្ស សរុប៣៣៤នាក់។
បន្ទាប់ពីស្តាប់របាយការណ៍របស់នាយិកាសាលាបឋមសិក្សាហ៊ុន សែន អូរច្រា និងប្រសាសន៍របស់លោកស្រី ប៊ុន គឹមហេង អនុប្រធានមន្ទីរសង្គមកិច្ចរួចមក តំណាងសិស្សានុសិស្សបានឡើងប្តេជ្ញាចិត្តដោយធ្វើជាពលរដ្ឋល្អ សិស្សល្អ កូនល្អក្នុងសង្គមនិងធ្វើជាមនុស្សដែលសង្គមត្រូវការ និងជាសសរទ្រូងនៃប្រទេសជាតិ។ ប្តេជ្ញាខិតខំប្រឹងប្រែង និងមានភាពស្និតស្នាលជាមួយសិស្សានុសិស្សក្នុងថ្នាក់ឲ្យបានល្អប្រសើរ និងនិយាយថា ទេចំពោះគ្រឿងញៀន , ព្រមទាំងសំណូមពរឲ្យលោកគ្រូ អ្នកគ្រូ ស្រឡាញ់សិស្សានុសិស្សនិងអប់រំដោយមិនប្រើអំពើហិង្សាគ្រប់បែបយ៉ាងលើសិស្សានុសិស្ស , សូមឲ្យលោកឪពុកអ្នកម្តាយគ្រប់រូប បញ្ឈប់ឲ្យបាននូវការប្រើអំពើហិង្សាលើកុមារ ទប់ស្កាត់នូវការជួញដូរគ្រឿងញៀន ការជួញដូរកុមារ ជាដើម។ល។
ឆ្លៀតក្នុងឱកាសនោះដែរ លោកស្រី ជា លាភ អភិបាលរងនៃគណៈអភិបាលខេត្តប៉ៃលិន តំណាងលោក កើត សុធា អភិបាលនៃគណៈអភិបាលខេត្តប៉ៃលិន បានចូលរួមត្រេកអរ និងយល់ព្រមតាមសំណើរបស់សិស្សានុសិស្ស ដែលឡើងប្តេជ្ញា ហើយលោកស្រីអភិបាលរង បានមានប្រសាសន៍ថា យើងឃើញហើយថា អំពើហិង្សា តែងកើតមានឡើងនៅក្នុងសហគមន៍យើង ក្នុងគ្រួសារយើង ពិសេសទៅលើកុមារ ព្រមទាំងសំណូមពរឲ្យលោកឪពុក អ្នកម្តាយចូលរួមទាំងអស់គ្នាដើម្បីអភិវឌ្ឍន៍សង្គមជាតិ និងគ្រួសាររបស់យើង ហើយមិនត្រូវប្រើអំពើហិង្សាលើកុមារនោះទេ។
លោកស្រីអភិបាលរងបន្តថា អំពើហិង្សាអាចកើតមាននៅលើគ្រួសារពីប្តីវាយប្រពន្ធ ឬប្រពន្ធវាយប្តី ពិសេសការវាយទៅលើកុមារជាដើម ដូច្នោះយើងត្រូវបញ្ឈប់ឲ្យបាននូវការប្រើអំពើហិង្សាលើកុមារគ្រប់រូបភាពទាំងអស់ លោកស្រីអភិបាលរងបញ្ជាក់ថា ប្រសិនបើគ្រួសារមួយ ដែលប្តីឬប្រពន្ធញៀនល្បែងស៊ីសង ស្រវឹងគ្មានថ្ងៃសំរាក ឬជាគ្រួសារដែលប្រើប្រាស់គ្រឿងញៀន វាអាចកើតឡើងនូវអំពើហិង្សាជាក់ជាមិនខាន ដូច្នោះយើងទាំងអស់គ្នាជៀសឲ្យឆ្ងាយពីគ្រឿងញៀនទាំងនោះឲ្យបាន ដើម្បីចូលរួមអភិវឌ្ឍន៍ប្រទេសជាតិយើង គ្រួសារយើង សហគមន៍យើងឲ្យមានការរីកចម្រើននៅក្នុងតំបន់ ក៏ដូចពិភពលោក ព្រមទាំងនិយាយថា ទេចំពោះគ្រឿងញៀន។
ជាចុងបញ្ជាប់ក៏មានការចែកនូវអំណោយជូនដល់លោកគ្រូ អ្នកគ្រូ សិស្សានុសិស្ស នូវសៀវភៅ ប៊ិច និងថវិកាមួយចំនួនផងដែរ៕
អភិបាលរងខេត្ត ចូលរួមពិធីបួងសួងនិងសកម្មភាពដើម្បីកុមារ ក្រោមប្រធានបទ«បញ្ឈប់អំពើហិង្សាលើកុមារ»
0 Comments