ឧត្តរមានជ័យ ៖ ស្ត្រីម្នាក់ ត្រូវបានជនសង្ស័យឡើងទៅ ចាប់រំលោភ សេពសន្ថវៈ រហូតបានសម្រេចនៅខាងលើផ្ទះស្ត្រីរងគ្រោះ ខណៈពេលកំពុងដេកលង់លក់នៅពេលយប់ ហើយស្ត្រីរងគ្រោះបានស្រែកហៅគេ អ្នកជិតខាងឲ្យជួយនៅពេលនោះ ក៏ចាប់បានជនសង្ស័យភ្លាមៗផងដែរ។
ហេតុការណ៍ចាប់រំលោភ បានកើតឡើងកាលពីវេលាម៉ោង២២និង១០នាទីយប់ ថ្ងៃទី១១ ខែមករា ឆ្នាំ២០១៦ នៅចំណុចលើផ្ទះស្ត្រីរងគ្រោះ ស្ថិតនៅក្នុងភូមិអូរបាត់ដាវ សង្កាត់បន្សាយរាក់ ក្រុងសំរោង ខេត្តឧត្តរមានជ័យ។
លោកវរសេនីយ៍ទោ ស៊ុន សាន អធិការនគរបាលក្រុងសំរោងបានឲ្យដឹងថា ជនសង្ស័យ មានឈ្មោះស៊ឹង សុវណ្ណា ភេទប្រុសអាយុ១៦ឆ្នាំ រស់នៅភូមិអូរបាត់ដាវ សង្កាត់បន្សាយរាក់ ក្រុងសំរោង ខេត្តឧត្តរមានជ័យ។ រីឯស្ត្រីរងគ្រោះមានឈ្មោះជ.ស.អ អាយុ៣៥ឆ្នាំ រស់នៅភូមិ សង្កាត់ កើតហេតុខាងលើ។
លោកវរសេនីយ៍ទោ ស៊ុន សាន អធិការនគរបាលក្រុងសំរោង បានឲ្យដឹងទៀតថា បច្ចុប្បន្ន ជនសង្ស័យត្រូវបាន ឃាត់ខ្លួនយកមកអធិការដ្ឋាននគរបាលក្រុងសំរោង ដើម្បីកសាងសំណុំរឿង បញ្ជូនទៅសាលាដំបូងខេត្តឧត្តរមានជ័យ ចាត់ការទៅតាមនីតិវិធីច្បាប់៕
បុរសម្នាក់ឡើងទៅចាប់រំលោភស្ត្រីម្នាក់ដល់លើផ្ទះបានសម្រេច ត្រូវសមត្ថកិច្ចឃាត់ខ្លួន
0 Comments