ពោធិ៍សាត់ ៖ ជនល្មើសបានទម្លាក់វត្ថុតាងឧបករណ៍បទល្មើសអូសអួនទឹកសាបទំនើប (យុំាងកាវ) នៅដែនអភិរក្សជលផលអតីតឡូត៍លេខ៦ រួចបើកកាណូតល្បឿនលឿនជាងរបស់ជំនាញជលផលគេចខ្លួនឆ្លងចូលទឹកដីខេត្តសៀមរាបបាត់។
ហេតុការណ៍នេះបានកើតឡើងកាលពីវេលាម៉ោង៤ទៀបភ្លឺថ្ងៃទី១០ ខែមករា ឆ្នាំ២០១៦ ត្រង់ចំណុចតំបន់ប្រឡាយអភិរក្សជលផលអតីតឡូត៍លេខ៦ ក្នុងសង្កាត់កណ្ដៀង ខេត្តពោធិ៍សាត់។
លោកពុទ្ធ ស៊ុនលី នាយរងផ្នែកជលផលក្រគរបានឲ្យដឹងថា ក្នុងករណីនេះ លោកបានត្រៀមជាមុន ដោយប្រើប្រាស់កាណូតតូចធំចំនួន៧គ្រឿង បំពាក់ដោយគ្រឿងម៉ាស៊ីន និងកម្លាំងជំនាញជលផល មានសង្កាត់កណ្ដៀងខាងអភិរក្ស សហគមន៍ ព្រមទាំងកម្លាំងប្រដាប់អាវុធទាំងបីប្រភេទ សរុបចំនួន២៥នាក់ ដើម្បីស្ទាក់ការពារតំបន់អភិរក្សជលផលខាងលើនេះ។
លោកបន្តថា ស្រាប់តែរំលងទៀបភ្លឺថ្ងៃកើតហេតុនោះ យើងបានទទួលព័ត៌មានពីប្រជានេសាទនៅតាមដងទន្លេសាប ថាបានឃើញជនល្មើស ប្រើឧបករណ៍បទល្មើសអួនអូសទឹកសាប ពីរគ្រឿង ដោយបើកចេញមកពីទឹកដីខេត្តសៀមរាប ឆ្ពោះត្រង់មកកាន់តំបន់អភិរក្សខាងលើ។ គ្រាន់តែកម្លាំងទទួលបានព័ត៌មាននេះភ្លាម ផ្ទៃមេឃចាប់ផ្ដើមប្រែជាមានពពកខ្មៅ ហើយភ្លៀងមួយមេយ៉ាងធំងងឹតឈឹងរកមើលអ្វីពុំដឹងកោះត្រើយឡើយ សូម្បីតែសំឡេងម៉ាស៊ីនកាណូត ក៏មិនឮដែរ ព្រោះសំឡេងគ្រាប់ភ្លៀងខ្លាំងពេក។ លុះម៉ោងទៀបភ្លឺមេឃក៏ប្រែពណ៌ ហើយភ្លៀងក៏រាំងដាច់អស់ ទើបកម្លាំងចាប់ផ្ដើមចេញប្រតិបត្តិការ នៅតំបន់អភិរក្សនោះ បានចម្ងាយប្រមាណជា៤ទៅ៥រយម៉ែត្រ ក៏ឃើញជនល្មើសកំពុង ប្រើឧបករណ៍បទល្មើសអូសអួនទឹកសាបក្នុងតំបន់នោះចំនួន២វង់ យ៉ាងសកម្ម។ ភ្លាមនោះកម្លាំង ដែលបានបែងចែកជាស្រេច ក៏បង្កើនល្បឿនម៉ាស៊ីនកាណូតទាំង៧គ្រឿងតូចធំដេញ ព័ទ្ធចាប់ជនល្មើសនោះ ហើយពួកគេ ក៏បានទម្លាក់ឧបករណ៍ល្មើសទាំងនោះចោល រួចនាំគ្នាបើកកាណូត របស់គេពីរគ្រឿងដែលទំនើប និងមានល្បឿនលឿន ជាងរបស់ប្រើប្រាស់ជំនាញសមត្ថកិច្ចយើង គេចឆ្លងទៅទឹកដីខេត្តសៀមរាបបាត់ស្រមោលតែម្ដង។ ពេលនោះពួកគេ បានបន្សល់ទុកតែឧបករណ៍បទល្មើសអួនអូសទឹកសាបទាំងពីរវង់(យុំាងកាវ) និងត្រីចម្រុះនៅក្នុងសាច់អួននោះរាប់រយគីឡូ ហើយកម្លាំងក៏ចាក់ចូលទៅតំបន់អភិរក្សនោះវិញ រួចយកវត្ថុតាងនេះ មកកាន់ស្នាក់ការរក្សាទុកដុតកម្ទេចចោល។
លោកពុទ្ធ ស៊ុនលី បានបញ្ជាក់ចុងក្រោយថា ជារឿយៗ ពួកបទល្មើសទាំងនេះ តែងតែចាំមើលឧកាសហុចឲ្យទេ ជាពិសេសមេឃធ្លាក់ខ្យល់ខ្លាំង និងធ្លាក់ភ្លៀង ពួកគេច្រើនតែចេញពីតំបន់ទឹងដីខេត្តសៀមរាប ដោយប្រើសុទ្ធតែទូកកាណូតបំពាក់គ្រឿងម៉ាស៊ីនទំនើប ដែលមានល្បឿនលឿន ឆ្លងមកតំបន់អភិរក្សខេត្តពោធិ៍សាត់ធ្វើសកម្មភាព រួចឆ្លងទៅវិញ។ នៅពេលសមត្ថកិច្ចយើងដេញចាប់ពួកគេ គឺមិនងាយនឹងបើកកាណូតដេញទាន់ឡើយ ហើយពួកនេះសាហាវៗខ្លាំងណាស់៕
កម្លាំងជំនាញបានត្រឹមតែដកហូតវត្ថុតាង ដោយសាររបស់ប្រើប្រាស់ជនល្មើសទំនើបជាង
0 Comments