ភ្នំពេញ ៖ អ្នកបើករថយន្តសាំយ៉ុង១គ្រឿង បើកជែងរថយន្ត និងម៉ូតូជាច្រើនគ្រឿង បានជ្រុលទៅបុកម៉ូតូ១គ្រឿង ដែលបើកបញ្ច្រាសទិសគ្នា ទោះម៉ូតូជនរងគ្រោះខំបើកគេចរហូតដល់ចិញ្ចើមថ្នល់ក៏ដោយ នៅតែរថយន្តបង្កមកកៀរឲ្យដួល ហើយកិនស្លាប់ម្នាក់របួសធ្ងន់ម្នាក់។ ហេតុការណ៍នេះកើតឡើងកាលពីវេលាម៉ោង៥និង៥៥នាទីល្ងាចថ្ងៃទី១៣ ខែមករា ឆ្នាំ២០១៦ នៅតាមបណ្ដោយផ្លូវជាតិលេខ៥ ស្ថិតក្នុងភូមិគ្រួស សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
សមត្ថកិច្ចមូលដ្ឋានបានឲ្យដឹងថា ជនរងគ្រោះដែលស្លាប់ក្នុងហេតុការណ៍នេះ ឈ្មោះ អ៊ូច បញ្ញា ភេទប្រុស អាយុ២១ឆ្នាំ មានទីលំនៅភូមិក្រាំងកណ្ដាល ឃុំប្រាំបីមុំ ស្រុកទ្រាំង ខេត្តតាកែវ ដោយឡែកជនរងគ្រោះជាម្ចាស់ម៉ូតូ ដែលរងរបួសធ្ងន់ត្រូវរថយន្តសង្គ្រោះដឹកទៅព្យាបាលនៅមន្ទីរពេទ្យ មានឈ្មោះ ពៅ កុងគែន ភេទប្រុស មានទីលំនៅផ្ទះលេខ២៤៤ ភូមិប៉ប្រកខាងត្បូង សង្កាត់កាកាប ខណ្ឌដង្កោ រាជធានីភ្នំពេញ។
សមត្ថកិច្ចបន្តថា ជនរងគ្រោះទាំង២នាក់នេះជិះម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1BF-6144 ធ្វើដំណើរក្នុងទិសដៅពីជើងទៅត្បូង ចំណែករថយន្តបង្កម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2AA-5702 បើកបរយ៉ាងលឿនក្នុងទិសដៅពីត្បូងមកជើង។
ប្រភពពីកន្លែងកើតហេតុបានឲ្យដឹងទៀតថា នៅមុនពេលកើតហេតុជនរងគ្រោះទាំង២នាក់ ជិះម៉ូតូ១គ្រឿងតាមបណ្ដោយ ផ្លូវជាតិលេខ៥ ក្នុងទិសដៅពីជើងទៅត្បូង ចំណែករថយន្តសាំងយ៉ុងបើកបរយ៉ាងលឿនក្នុងទិសដៅពីត្បូងទៅជើង (បញ្ច្រាសទិសគ្នា) ដោយរថយន្តវ៉ាជាមួយរថយន្ត និងម៉ូតូជាច្រើនគ្រឿងជ្រុលចូលទៅផ្លូវម្ខាងស្តាំដៃម៉ូតូ រហូតទៅបុកម៉ូតូជនរងគ្រោះ ដែលកំពុងជិះនៅចិញ្ចើមថ្នល់ ហើយកិន និងអូសជាប់ម៉ូតូជាច្រើនម៉ែត្របណ្ដាលឲ្យស្លាប់ម្នាក់របួសធ្ងន់ម្នាក់តែម្តង។ ភ្លាមៗនោះអ្នកបើកបររថយន្ត ត្រូវបានប្រជាពលរដ្ឋឃាត់ខ្លួនប្រគល់ឲ្យសមត្ថកិច្ច ចំណែកជនរងគ្រោះដែលរងរបួសធ្ងន់បានបញ្ជូនទៅសង្គ្រោះនៅមន្ទីរពេទ្យ។ ក្រោយកើតហេតុសមត្ថកិច្ចបានចុះមកធ្វើការវាស់វែង ហើយនាំខ្លួនអ្នកបើកបររថយន្ត ព្រមទាំងរថយន្ត និងម៉ូតូទៅកាន់ការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំដោះស្រាយតាមនីតិវិធីច្បាប់ ចំណែកជនរងគ្រោះដែលស្លាប់សមត្ថកិច្ចបានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
ខំបើកគេចមកចិញ្ចើមផ្លូវហើយ នៅតែត្រូវរថយន្តសាំយ៉ុងបើកមកបុក និងកិនស្លាប់ទៀត
0 Comments